IPL 2018 : ਦੋ ਨਵੇਂ ਬਦਲਾਅ ਕਰਨ ਦੀ ਤਿਆਰੀ ''ਚ ਬੋਰਡ, ਦਰਸ਼ਕ ਅਤੇ ਖਿਡਾਰੀ ਹੋ ਜਾਣਗੇ ਖੁਸ਼

ਨਵੀਂ ਦਿੱਲੀ, (ਬਿਊਰੋ)— ਇੰਡੀਅਨ ਪ੍ਰੀਮੀਅਰ ਲੀਗ ਦੇ ਨਵੇਂ ਸੀਜ਼ਨ ਵਿੱਚ ਦੋ ਵੱਡੇ ਬਦਲਾਅ ਹੋ ਸਕਦੇ ਹਨ। 10 ਸਾਲ ਦੇ ਪਹਿਲੇ ਪੜਾਅ ਦੇ ਬਾਅਦ ਹੁਣ ਆਈ.ਪੀ.ਐੱਲ. ਨਵੇਂ ਸੀਜ਼ਨ ਦੀ ਤਿਆਰੀ ਵਿੱਚ ਹੈ ਅਤੇ ਨਵੇਂ ਸੀਜ਼ਨ ਤੋਂ ਪਹਿਲਾਂ ਬਹੁਤ ਕੁੱਝ ਬਦਲਣ ਵਾਲਾ ਹੈ। ਇੱਕ ਪਾਸੇ ਜਿੱਥੇ ਸਾਰੇ ਖਿਡਾਰੀ ਆਕਸ਼ਨ ਲਈ ਜਾਣਗੇ (ਰਿਟੇਨ ਪਾਲਿਸੀ ਉੱਤੇ ਹੁਣੇ ਸਹਿਮਤੀ ਨਹੀਂ) ਉਥੇ ਹੀ ਦੂਜੇ ਪਾਸੇ ਅਸੀਂ ਪਹਿਲਾਂ 10 ਸਾਲ ਤੱਕ ਕ੍ਰਿਕਟ ਦੇ ਇਸ ਮਹਾਂ ਮਨੋਰੰਜਨ ਨੂੰ ਸੋਨੀ ਦੇ ਚੈਨਲਾਂ ਉੱਤੇ ਵੇਖਦੇ ਸੀ ਹੁਣ ਉਹ ਸਟਾਰ ਇੰਡੀਆ 'ਤੇ ਵਿਖਾਇਆ ਜਾਵੇਗਾ। 

ਆਈ.ਪੀ.ਐੱਲ. 11 ਵਿੱਚ ਜਿਸ ਪਹਿਲੇ ਬਦਲਾਅ ਦੀ ਗੱਲ ਕੀਤੀ ਜਾ ਰਹੀ ਹੈ ਉਸਦਾ ਨਿਰਧਾਰਨ ਬਰਾਡਕਾਸਟਰ ਹੀ ਕਰ ਸਕਦੇ ਹਨ।  ਬੀ.ਸੀ.ਸੀ.ਆਈ. ਅਤੇ ਆਈ.ਪੀ.ਐੱਲ. ਗਵਰਨਿੰਗ ਕਾਉਂਸਿਲ ਨੇ ਆਈ.ਪੀ.ਐੱਲ. ਦੇ ਸਮੇਂ ਵਿੱਚ ਬਦਲਾਅ ਦੇ ਸੰਕੇਤ ਦਿੱਤੇ ਹਨ। ਜੇਕਰ ਬਰਾਡਕਾਸਟਰ ਬੀ.ਸੀ.ਸੀ.ਆਈ. ਦੀਆਂ ਗੱਲਾਂ ਨਾਲ ਸਹਿਮਤ ਹੋ ਗਿਆ ਤਾਂ ਹੁਣ ਤੱਕ ਰਾਤ 8 ਵਜੇ ਤੋਂ ਸ਼ੁਰੂ ਹੋਣ ਵਾਲੇ ਮੁਕਾਬਲੇ ਸ਼ਾਮ 7 ਵਜੇ ਤੋਂ ਸ਼ੁਰੂ ਹੋਣਗੇ। ਖਬਰਾਂ ਮੁਤਾਬਕ ਪਿਛਲੇ 10 ਸਾਲ ਵਿੱਚ ਕਈ ਵਾਰ ਵੇਖਿਆ ਗਿਆ ਕਿ ਰਾਤ 8 ਵਜੇ ਤੋਂ ਸ਼ੁਰੂ ਹੋਣ ਵਾਲੇ ਮੈਚ ਖਤਮ ਹੁੰਦੇ-ਹੁੰਦੇ 12 ਵਜਾ ਦਿੰਦੇ ਸਨ, ਜਿਸ ਕਾਰਨ ਸਟੇਡੀਅਮ ਵਿੱਚ ਮੈਚ ਦੇਖਣ ਆਏ ਦਰਸ਼ਕਾਂ  ਦੇ ਨਾਲ ਘਰ ਵਿੱਚ ਸਕੂਲ-ਕਾਲਜ ਜਾਣ ਵਾਲੇ ਬੱਚਿਆਂ ਨੂੰ ਕਾਫ਼ੀ ਪਰੇਸ਼ਾਨੀ ਹੁੰਦੀ ਸੀ। ਇਸ ਤਰ੍ਹਾਂ ਦੇ ਬਦਲਾਅ ਦੀ ਮੰਗ ਪਹਿਲਾਂ ਵੀ ਕੀਤੀ ਜਾ ਰਹੀ ਸੀ ਪਰ ਇਸ ਵਾਰ ਆਈ.ਪੀ.ਐੱਲ ਵੱਲੋਂ ਇਸ ਨੂੰ ਮੰਨ ਲਿਆ ਗਿਆ ਹੈ। 

ਸ਼ਾਮ 7 ਵਜੇ ਜੇਕਰ ਦੂਜਾ ਮੈਚ ਸ਼ੁਰੂ ਹੁੰਦਾ ਹੈ ਤਾਂ ਇਸਦਾ ਅਸਰ ਦਿਨ ਦੇ ਪਹਿਲੇ ਮੁਕਾਬਲੇ ਉੱਤੇ ਹੋਵੇਗਾ ਅਤੇ ਇਸ ਲਈ ਹੁਣ ਤੱਕ ਚਾਰ ਵਜੇ ਤੋਂ ਸ਼ੂਰੂ ਹੋਣ ਵਾਲੇ ਇਹ ਮੁਕਾਬਲੇ ਨਵੇਂ ਪ੍ਰਸਤਾਵਿਤ ਬਦਲਾਵਾਂ ਦੇ ਤਹਿਤ ਦੁਪਹਿਰ ਤਿੰਨ ਵਜੇ ਤੋਂ ਸ਼ੁਰੂ ਕੀਤੇ ਜਾ ਸਕਦੇ ਹਨ। ਆਈ.ਪੀ.ਐੱਲ. ਕਾਉਂਸਿਲ ਦੀ ਮੀਟਿੰਗ ਵਿੱਚ ਆਈ.ਪੀ.ਐੱਲ. ਕਮਿਸ਼ਨਰ ਰਾਜੀਵ ਸ਼ੁਕਲ ਨੇ ਸਮੇ ਵਿੱਚ ਬਦਲਾਅ ਦਾ ਪ੍ਰਸਤਾਵ ਰੱਖਿਆ ਜਿਨੂੰ ਸਾਰੇ ਫ੍ਰੈਂਚਾਈਜ਼ੀਆਂ ਨੇ ਮੰਨ ਲਿਆ ਹੈ। ਪਰ ਬਦਲਾਅ ਉਦੋਂ ਹੀ ਸੰਭਵ ਹੈ ਜਦੋਂ ਬਰਾਡਕਾਸਟਰ ਇਸ ਪ੍ਰਸਤਾਵ ਨੂੰ ਮੰਨ ਲੈਣ। 

ਦੂਜੇ ਪਾਸੇ ਇਸ ਬੈਠਕ ਵਿੱਚ ਇੱਕ ਹੋਰ ਵੱਡੇ ਬਦਲਾਵ ਨੂੰ ਸਾਰੀਆਂ ਫਰੈਂਚਾਈਜ਼ੀਆਂ ਨੇ ਮੰਨ ਲਿਆ ਹੈ। ਇਸ ਪ੍ਰਸਤਾਵ ਦੇ ਤਹਿਤ ਹੁਣ ਆਈ.ਪੀ.ਐੱਲ. ਮੁਕਾਬਲੇ ਦੇ ਦੌਰਾਨ ਵੀ ਖਿਡਾਰੀਆਂ ਦਾ ਟਰਾਂਸਫਰ ਕੀਤਾ ਜਾ ਸਕਦਾ ਹੈ।  ਇੰਗਲਿਸ਼ ਪ੍ਰੀਮੀਅਰ ਲੀਗ ਦੀ ਤਰ੍ਹਾਂ ਹੁਣ ਆਈ.ਪੀ.ਐੱਲ. ਮੁਕਾਬਲੇ ਦੇ ਦੌਰਾਨ ਖਿਡਾਰੀਆਂ ਦੀ ਜਰਸੀ ਬਦਲ ਸਕਦੀ ਹੈ। ਹਾਲਾਂਕਿ ਇਸ ਟਰਾਂਸਫਰ ਵਿੱਚ ਉਹੀ ਖਿਡਾਰੀ ਆ ਸਕਣਗੇ ਜੋ ਲੀਗ ਦੇ 7 ਮੁਕਾਬਲਿਆਂ ਵਿੱਚ ਸਿਰਫ ਦੋ ਮੈਚ ਵਿੱਚ ਪਲੇਇੰਗ ਇਲੇਵਨ ਖੇਡ ਸਕੇ ਹੋਣ।  

ਰਾਜੀਵ ਸ਼ੁਕਲ ਨੇ ਦੱਸਿਆ ਕਿ ਪੰਜ ਦਸੰਬਰ ਨੂੰ ਆਈ.ਪੀ.ਐੱਲ. ਗਵਰਨਿੰਗ ਕਾਉਂਸਿਲ ਦੀ ਬੈਠਕ ਹੋਵੇਗੀ ਅਤੇ ਦੂਜੀ ਗੱਲਾਂ ਉੱਤੇ ਚਰਚਾ ਕੀਤੀ ਜਾਵੇਗੀ। ਉਨ੍ਹਾਂ ਨੇ ਕਿਹਾ ਕਿ ਵਿੱਚ ਮੁਕਾਬਲੇ ਵਿੱਚ ਖਿਡਾਰੀਆਂ ਦੇ ਟਰਾਂਸਫਰ ਨੂੰ ਲੈ ਕੇ ਇੱਕ ਆਈਡੀਆ ਆਇਆ ਹੈ ਜਿਸ ਨੂੰ ਸਾਰੇ ਫਰੈਂਚਾਈਜ਼ੀਆਂ ਨੇ ਮੰਨ ਲਿਆ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਸ ਨਾਲ ਉਨ੍ਹਾਂ ਖਿਡਾਰੀਆਂ ਨੂੰ ਫਾਇਦਾ ਹੋਵੇਗਾ ਜੋ ਚੰਗੇ ਕਰਿਕਟਰ ਹਨ ਪਰ ਕਿਸੇ ਵੀ ਕਾਰਨ ਤੋਂ ਪਲੇਇੰਗ ਇਲੈਵਨ ਵਿੱਚ ਜਗ੍ਹਾ ਨਹੀਂ ਬਣਾ ਸਕੇ ਹੋਣ।