ਮੇਸੀ ਦੇ ਹਾਂਗਕਾਂਗ ''ਚ ਨਾ ਖੇਡਣ ਕਾਰਨ ਅਰਜਨਟੀਨਾ ਦਾ ਚੀਨ ਦੌਰਾ ਹੋਇਆ ਰੱਦ

ਹਾਂਗਕਾਂਗ: ਸਟਾਰ ਫੁਟਬਾਲਰ ਲਿਓਨਲ ਮੇਸੀ ਦੇ ਹਾਂਗਕਾਂਗ ਵਿੱਚ ਇੱਕ ਪ੍ਰਦਰਸ਼ਨੀ ਕਲੱਬ ਮੈਚ 'ਚ ਨਹੀਂ ਖੇਡਣ ਕਾਰਨ ਸਥਾਨਕ ਫੁੱਟਬਾਲ ਅਧਿਕਾਰੀਆਂ ਨੇ ਅਗਲੇ ਮਹੀਨੇ ਚੀਨ ਦੇ ਦੌਰੇ 'ਤੇ ਅਰਜਨਟੀਨਾ ਦੇ ਦੋਵੇਂ ਦੋਸਤਾਨਾ ਮੈਚਾਂ ਨੂੰ ਰੱਦ ਕਰ ਦਿੱਤਾ ਹੈ। ਬੀਜਿੰਗ ਫੁੱਟਬਾਲ ਐਸੋਸੀਏਸ਼ਨ ਨੇ ਸ਼ਨੀਵਾਰ ਨੂੰ ਕਿਹਾ ਕਿ ਉਹ ਮਾਰਚ ਵਿੱਚ ਬੀਜਿੰਗ ਵਿੱਚ ਆਈਵਰੀ ਕੋਸਟ ਦੇ ਖਿਲਾਫ ਅਰਜਨਟੀਨਾ ਦੇ ਦੋਸਤਾਨਾ ਮੈਚ ਦਾ ਆਯੋਜਨ ਨਹੀਂ ਕਰੇਗਾ। ਐਸੋਸੀਏਸ਼ਨ ਨੇ ਸਥਾਨਕ ਮੀਡੀਆ ਨੂੰ ਦੱਸਿਆ, 'ਬੀਜਿੰਗ ਫਿਲਹਾਲ ਉਸ ਮੈਚ ਨੂੰ ਆਯੋਜਿਤ ਕਰਨ ਦੀ ਯੋਜਨਾ ਨਹੀਂ ਬਣਾ ਰਿਹਾ ਹੈ ਜਿਸ 'ਚ ਲਿਓਨਲ ਮੇਸੀ ਨੇ ਹਿੱਸਾ ਲੈਣਾ ਸੀ।' ਇਕ ਦਿਨ ਪਹਿਲਾਂ ਚੀਨੀ ਖੇਡ ਅਧਿਕਾਰੀਆਂ ਨੇ ਅਰਜਨਟੀਨਾ ਦਾ ਨਾਈਜੀਰੀਆ ਖਿਲਾਫ ਪ੍ਰਦਰਸ਼ਨੀ ਮੈਚ ਰੱਦ ਕਰ ਦਿੱਤਾ ਸੀ।
ਮੇਸੀ ਦੀ ਕਪਤਾਨੀ 'ਚ ਵਿਸ਼ਵ ਕੱਪ ਚੈਂਪੀਅਨ ਅਰਜਨਟੀਨਾ ਨੇ 18 ਤੋਂ 26 ਮਾਰਚ ਤੱਕ ਅੰਤਰਰਾਸ਼ਟਰੀ ਬ੍ਰੇਕ ਦੌਰਾਨ ਚੀਨ ਦਾ ਦੌਰਾ ਕਰਨਾ ਸੀ। ਇਸ ਦੌਰੇ 'ਤੇ ਅਰਜਨਟੀਨਾ ਨੂੰ ਬੀਜਿੰਗ 'ਚ ਆਈਵਰੀ ਕੋਸਟ ਅਤੇ ਹਾਂਗਜ਼ੂ 'ਚ ਨਾਈਜੀਰੀਆ ਦੇ ਖਿਲਾਫ ਮੈਚ ਖੇਡਣਾ ਸੀ। ਪਰ ਮੇਸੀ ਨੇ ਆਪਣੇ ਇੰਟਰ ਮਿਆਮੀ ਕਲੱਬ ਦੇ ਨਾਲ ਦੌਰੇ ਦੌਰਾਨ ਹਾਂਗਕਾਂਗ ਵਿੱਚ ਪ੍ਰਸ਼ੰਸਕਾਂ ਨੂੰ ਨਾਰਾਜ਼ ਕੀਤਾ ਸੀ। ਉਹ ਪਿਛਲੇ ਐਤਵਾਰ ਨੂੰ ਇੱਥੇ ਹੋਏ ਕਲੱਬ ਦੇ ਦੋਸਤਾਨਾ ਮੈਚ ਵਿੱਚ ਗਲੇ ਦੀ ਸੱਟ ਕਾਰਨ ਨਹੀਂ ਖੇਡਿਆ ਸੀ ਅਤੇ ਬੈਂਚ 'ਤੇ ਬੈਠੇ ਰਹੇ ਸੀ।
ਬੁੱਧਵਾਰ ਨੂੰ ਟੋਕੀਓ 'ਚ ਵਿਸੇਲ ਕੋਬੇ ਦੇ ਖਿਲਾਫ ਮੈਚ 'ਚ ਉਹ 30 ਮਿੰਟ ਤੱਕ ਮੈਦਾਨ 'ਤੇ ਆਇਆ, ਜਿਸ ਕਾਰਨ ਖੇਡ ਪ੍ਰੇਮੀਆਂ ਨੂੰ ਉਨ੍ਹਾਂ ਦੀ ਸੱਟ ਦੀ ਖਬਰ 'ਤੇ ਯਕੀਨ ਨਹੀਂ ਹੋਇਆ ਅਤੇ ਉਹ ਕਾਫੀ ਗੁੱਸੇ 'ਚ ਆ ਗਏ। ਅਰਜਨਟੀਨਾ ਅਤੇ ਨਾਈਜੀਰੀਆ ਵਿਚਾਲੇ ਸ਼ੁੱਕਰਵਾਰ ਨੂੰ ਹੋਣ ਵਾਲਾ ਦੋਸਤਾਨਾ ਮੈਚ ਰੱਦ ਕਰ ਦਿੱਤਾ ਗਿਆ ਸੀ।