ਈ. ਡੀ. ਨੇ ਸ਼ੈਰੀ ਮਾਨ ਨੂੰ ਭੇਜਿਆ ਸੰਮਨ

ਚੰਡੀਗੜ੍ਹ  (ਸੁਸ਼ੀਲ) - ਚੰਡੀਗੜ੍ਹ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ. ਡੀ.) ਨੇ ਪੰਜਾਬੀ ਗਾਇਕ ਸ਼ੈਰੀ ਮਾਨ ਨੂੰ ਮਨੀ ਲਾਂਡਰਿੰਗ ਐਕਟ ਤਹਿਤ ਸੰਮਨ ਭੇਜ ਕੇ 4 ਜਨਵਰੀ ਨੂੰ ਪੇਸ਼ ਹੋਣ ਲਈ ਕਿਹਾ ਹੈ। ਜਾਣਕਾਰੀ ਅਨੁਸਾਰ ਦੋ ਮਹੀਨੇ ਪਹਿਲਾਂ ਈ. ਡੀ. ਨੂੰ ਮੋਹਾਲੀ ਦੀ ਸੀ-ਬਰਡ ਇਮੀਗ੍ਰੇਸ਼ਨ ਕੰਪਨੀ 'ਤੇ ਛਾਪੇਮਾਰੀ ਦੌਰਾਨ ਕੁਝ ਦਸਤਾਵੇਜ਼ ਮਿਲੇ ਸਨ। ਉਥੋਂ ਈ. ਡੀ. ਨੂੰ ਇਕ ਡਾਇਰੀ ਵੀ ਮਿਲੀ ਸੀ, ਜਿਸ ਵਿਚ ਸ਼ੈਰੀ ਮਾਨ ਦੇ ਨਾਂ ਸਾਹਮਣੇ ਲੱਖਾਂ ਰੁਪਏ ਦੇ ਲੈਣ-ਦੇਣ ਦੀ ਜਾਣਕਾਰੀ ਲਿਖੀ ਹੋਈ ਸੀ। ਈ. ਡੀ. ਨੇ ਕੰਪਨੀ  ਦੇ ਪ੍ਰਬੰਧਕਾਂ ਦੇ ਘਰ ਵੀ ਛਾਪੇਮਾਰੀ ਕੀਤੀ ਸੀ। ਈ. ਡੀ. ਨੂੰ ਉਥੋਂ 20 ਲੱਖ ਰੁਪਏ ਦੀ ਨਕਦੀ ਤੋਂ ਇਲਾਵਾ ਜਾਅਲੀ ਸਟੈਂਪ ਮਿਲੀ ਸੀ, ਜੋ ਤਹਿਸੀਲਦਾਰ ਅਤੇ ਕਾਰਜਕਾਰੀ ਨਿਆਂ ਅਧਿਕਾਰੀ ਦੇ ਨਾਂ 'ਤੇ ਸੀ। ਕੰਪਨੀ ਦੇ ਪ੍ਰਬੰਧਕਾਂ 'ਤੇ ਦੋਸ਼ ਹੈ ਕਿ ਉਹ ਫਰਜ਼ੀ ਦਸਤਾਵੇਜ਼ ਤਿਆਰ ਕਰ ਕੇ ਨੌਜਵਾਨਾਂ ਨੂੰ ਵਿਦੇਸ਼ ਭੇਜਣ ਦੇ ਨਾਂ 'ਤੇ ਠੱਗੀ ਮਾਰਦੇ ਸਨ।