ਸੰਗਰੂਰ ਤੋਂ ਹਰ ਵਾਰ ਬਦਲ ਜਾਂਦੈ ਸੰਸਦ ਮੈਂਬਰ, ਸੌਖੀ ਨਹੀਂ ਭਗਵੰਤ ਮਾਨ ਦੀ ਲੜਾਈ

ਜਲੰਧਰ/ਸੰਗਰੂਰ (ਵੈਬ ਡੈਸਕ)—ਪਿਛਲੀਆਂ ਲੋਕ ਸਭਾ ਚੋਣਾਂ ਦੌਰਾਨ ਸੰਗਰੂਰ ਲੋਕ ਸਭਾ ਸੀਟ ਤੋਂ ਅਕਾਲੀ ਉਮੀਦਵਾਰ ਸੁਖਦੇਵ ਸਿੰਘ ਢੀਂਡਸਾ ਨੂੰ 2 ਲੱਖ 11 ਹਜ਼ਾਰ 721 ਵੋਟਾਂ ਨਾਲ ਹਰਾਉਣ ਵਾਲੇ ਆਮ ਆਦਮੀ ਪਾਰਟੀ ਦੇ ਸੰਸਦ ਮੈਂਬਰ ਅਤੇ ਪੰਜਾਬ ਦੇ ਪਾਰਟੀ ਪ੍ਰਧਾਨ ਭਗਵੰਤ ਮਾਨ ਲਈ ਇਸ ਸੀਟ 'ਤੇ ਲੋਕ ਸਭਾ ਚੋਣਾਂ ਦੀ ਚੁਣੌਤੀ ਸੌਖੀ ਨਹੀਂ ਰਹਿਣ ਵਾਲੀ ਹੈ। ਇਸ ਦਾ ਸਭ ਤੋਂ ਵੱਡਾ ਕਾਰਨ ਇਹ ਹੈ ਕਿ ਇਸ ਸੀਟ 'ਤੇ ਸੁਰਜੀਤ ਸਿੰਘ ਬਰਨਾਲਾ ਤੋਂ ਇਲਾਵਾ 2 ਵਾਰ ਲਗਾਤਾਰ ਕੋਈ ਵੀ ਉਮੀਦਵਾਰ ਚੋਣ ਨਹੀਂ ਜਿੱਤਿਆ ਹੈ।

ਹਾਲਾਂਕਿ ਸੰਗਰੂਰ ਲੋਕ ਸਭਾ ਹਲਕਾ ਇਤਿਹਾਸਿਕ ਤੌਰ 'ਤੇ ਅਕਾਲੀ ਦਲ ਦੇ ਪ੍ਰਭਾਵ ਵਾਲਾ ਹਲਕਾ ਰਿਹਾ ਹੈ ਅਤੇ ਪਾਰਟੀ ਨੇ 1962 ਤੋਂ ਬਾਅਦ ਇਸ ਸੀਟ 'ਤੇ ਹੋਈਆਂ 14 ਚੋਣਾਂ 'ਚੋਂ 8 ਵਾਰ ਜਿੱਤ ਹਾਸਲ ਕੀਤੀ ਹੈ। 4 ਵਾਰ ਕਾਂਗਰਸ ਦਾ ਉਮੀਦਵਾਰ ਜਿੱਤਿਆ ਹੈ ਜਦਕਿ ਇਕ ਵਾਰ ਇਹ ਸੀਟ ਸੀ. ਪੀ. ਆਈ. ਅਤੇ ਇਕ ਵਾਰ ਆਮ ਆਦਮੀ ਪਾਰਟੀ ਨੇ ਜਿੱਤੀ ਹੈ। ਸੁਰਜੀਤ ਸਿੰਘ ਬਰਨਾਲਾ ਦੀ 1996 ਅਤੇ 1998 'ਚ ਲਗਾਤਾਰ ਦੋ ਚੋਣਾਂ 'ਚ ਹੋਈ ਜਿੱਤ ਦੀ ਗੱਲ ਨੂੰ ਛੱਡ ਦਈਏ ਤਾਂ ਸੰਗਰੂਰ ਦੇ ਲੋਕ ਹਰ ਵਾਰ ਨਵੇਂ ਚਿਹਰੇ ਨੂੰ ਹੀ ਮੌਕਾ ਦਿੰਦੇ ਆਏ ਹਨ।

ਕਿਉਂ ਸੌਖੀ ਨਹੀਂ ਹੈ ਭਗਵੰਤ ਮਾਨ ਲਈ ਚੁਣੌਤੀ
2014 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਆਮ ਆਦਮੀ ਪਾਰਟੀ ਨੇ ਸੰਗਰੂਰ ਲੋਕ ਸਭਾ ਦੀਆਂ 9 'ਚੋਂ 8 ਵਿਧਾਨ ਸਭਾ ਸੀਟਾਂ 'ਤੇ ਕਬਜ਼ਾ ਕੀਤਾ ਸੀ ਪਰ 2017 ਆਉਂਦਿਆਂ-ਆਉਂਦਿਆਂ ਸੰਗਰੂਰ 'ਚ ਆਮ ਆਦਮੀ ਪਾਰਟੀ ਦੀ ਬੜ੍ਹਤ 5 ਸੀਟਾਂ ਤੱਕ ਸੀਮਤ ਰਹਿ ਗਈ ਜਦਕਿ ਕਾਂਗਰਸ ਨੇ 3 ਅਤੇ ਅਕਾਲੀ ਦਲ ਨੇ 1 ਸੀਟ 'ਤੇ ਬੜ੍ਹਤ ਬਣਾ ਲਈ। ਭਗਵੰਤ ਮਾਨ ਨੇ 2014 ਦੀਆਂ ਚੋਣਾਂ 'ਚ  ਇਸ ਸੀਟ 'ਤੇ 5 ਲੱਖ 33 ਹਜ਼ਾਰ 237 ਵੋਟਾਂ ਹਾਸਲ ਕੀਤੀਆਂ ਸਨ ਪਰ 2017 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਸੰਗਰੂਰ ਹਲਕੇ ਦੀਆਂ ਵਿਧਾਨ ਸਭਾ ਸੀਟਾਂ 'ਤੇ ਆਮ ਆਦਮੀ ਪਾਰਟੀ ਨੂੰ 4 ਲੱਖ 7 ਹਜ਼ਾਰ 259 ਵੋਟਾਂ ਹਾਸਲ ਹੋਈਆਂ। ਮਤਲਬ ਪਾਰਟੀ ਨੇ ਤਿੰਨ ਸਾਲਾਂ 'ਚ ਹੀ ਇਸ ਲੋਕ ਸਭਾ ਸੀਟ ਦੇ ਅਧੀਨ ਆਉਂਦੀਆਂ ਵਿਧਾਨ ਸਭਾ ਸੀਟਾਂ 'ਤੇ 1 ਲੱਖ 25 ਹਜ਼ਾਰ 978 ਵੋਟਾਂ ਗੁਆ ਦਿੱਤੀਆਂ। ਦੂਜੇ ਪਾਸੇ ਕਾਂਗਰਸ ਨੂੰ 2014 ਵਿਚ ਇਸ ਸੀਟ 'ਤੇ 1 ਲੱਖ 81 ਹਜ਼ਾਰ 410 ਵੋਟਾਂ ਹਾਸਲ ਹੋਈਆਂ ਪਰ ਵਿਧਾਨ ਸਭਾ ਚੋਣਾਂ 'ਚ ਕਾਂਗਰਸ ਨੂੰ 3 ਲੱਖ 87 ਹਜ਼ਾਰ 158 ਵੋਟਾਂ ਮਿਲੀਆਂ ਤੇ ਪਾਰਟੀ ਨੂੰ ਇਸ ਸੀਟ 'ਤੇ 2 ਲੱਖ 5 ਹਜ਼ਾਰ 748 ਵੋਟਾਂ ਦਾ ਫਾਇਦਾ ਹੋਇਆ। ਅਕਾਲੀ ਦਲ ਨੂੰ ਵੀ ਵਿਧਾਨ ਸਭ ਚੋਣਾਂ ਦੌਰਾਨ ਇਸ ਸੀਟ 'ਤੇ 2014 ਦੇ ਮੁਕਾਬਲੇ 38629 ਵੋਟਾਂ ਦਾ ਫਾਇਦਾ ਹੋਇਆ ਸੀ। ਪਾਰਟੀ ਨੂੰ ਇਸ ਸੀਟ 'ਤੇ 2014 ਵਿਚ ਹਾਸਲ ਹੋਈਆਂ 321516 ਵੋਟਾਂ ਦੇ ਮੁਕਾਬਲੇ 2017 ਵਿਚ 360145 ਵੋਟਾਂ ਮਿਲੀਆਂ। 

ਇਸ ਵਾਰ ਕੌਣ-ਕੌਣ ਮੈਦਾਨ 'ਚ 
ਇਸ ਸੀਟ 'ਤੇ ਸੰਸਦ ਮੈਂਬਰ ਭਗਵੰਤ ਮਾਨ ਦੀ ਉਮੀਦਵਾਰੀ 'ਤੇ ਪਾਰਟੀ ਨੇ 2018 ਵਿਚ ਹੀ  ਮੋਹਰ ਲਾ ਦਿੱਤੀ ਸੀ। ਇਸ ਤੋਂ ਇਲਾਵਾ ਇਸ ਸੀਟ 'ਤੇ ਸੰਸਦ ਮੈਂਬਰ ਰਹਿ ਚੁੱਕੇ ਅਕਾਲੀ ਦਲ ਮਾਨ ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਨੇ ਵੀ ਚੋਣ ਲੜਨ ਦਾ ਐਲਾਨ ਕਰ ਦਿੱਤਾ ਹੈ। ਹਾਲਾਂਕਿ ਅਕਾਲੀ ਦਲ ਤੇ ਕਾਂਗਰਸ ਨੇ ਅਧਿਕਾਰਕ ਤੌਰ 'ਤੇ ਇਸ ਸੀਟ ਤੋਂ ਉਮੀਦਵਾਰ ਦਾ ਐਲਾਨ ਨਹੀਂ ਕੀਤਾ ਪਰ ਕਾਂਗਰਸ ਵਲੋਂ ਸਾਬਕਾ ਮੁੱਖ ਮੰਤਰੀ ਰਜਿੰਦਰ ਕੌਰ ਭੱਠਲ ਤੋਂ ਇਲਾਵਾ 2009 ਵਿਚ ਇਥੋਂ ਸੰਸਦ ਮੈਂਬਰ ਰਹੇ ਵਿਜੇਇੰਦਰ ਸਿੰਗਲਾ ਸਣੇ ਕੇਵਲ ਸਿੰਘ ਢਿਲੋਂ ਦਾ ਨਾਂ ਵੀ ਚਰਚਾ 'ਚ ਹੈ। ਉਧਰ ਅਕਾਲੀ ਦਲ ਦੀ ਟਿਕਟ 'ਤੇ ਪਿਛਲੀ ਵਾਰ ਚੋਣ ਲੜੇ ਸੁਖਦੇਵ ਸਿੰਘ ਢੀਂਡਸਾ ਵਲੋਂ ਪਾਰਟੀ ਦੇ ਸਾਰੇ ਅਹੁਦਿਆਂ ਤੋਂ ਅਸਤੀਫਾ ਦਿੱਤੇ ਜਾਣ ਤੇ ਆਪਣੇ ਪਰਿਵਾਰ 'ਚੋਂ ਕਿਸੇ ਦੇ ਵੀ ਚੋਣ ਨਾ ਲੜਨ ਦੇ ਐਲਾਨ ਤੋਂ ਬਾਅਦ ਅਕਾਲੀ ਦਲ 'ਚ ਵੀ ਨਵੇਂ ਚਿਹਰੇ ਦੀ ਭਾਲ ਸ਼ੁਰੂ ਹੋ ਗਈ ਹੈ। ਇਸੇ ਦਰਮਿਆਨ ਅਕਾਲੀ ਦਲ ਅਮਰਗੜ੍ਹ  ਤੋਂ  ਸਾਬਕਾ  ਵਿਧਾਇਕ ਅਤੇ ਇਕਬਾਲ ਸਿੰਘ ਚੁੰਡਾ, ਪਾਰਟੀ ਦੇ ਬੁਲਾਰੇ ਵਿਰਨਜੀਤ ਸਿੰਘ ਗੋਲਡੀ ਤੇ ਬਲਦੇਵ ਸਿੰਘ ਮਾਨ ਤੋਂ ਇਲਾਵਾ ਗਗਨਜੀਤ ਸਿੰਘ ਬਰਨਾਲਾ ਜਾਂ ਉਨ੍ਹਾਂ ਦੇ ਬੇਟੇ ਸਿਮਰਪ੍ਰਤਾਪ ਦਾ ਨਾਂ ਵੀ ਚਰਚਾ ਵਿਚ ਹੈ। ਭਾਵੇਂ ਅਕਾਲੀ ਦਲ ਨੇ ਇਸ ਸੀਟ ਤੋਂ ਆਪਣੇ ਉਮੀਦਵਾਰ ਬਾਰੇ ਪੱਤੇ ਨਹੀਂ ਖੋਲ੍ਹੇ ਹਨ। 
ਭਗਵੰਤ ਮਾਨ
ਕਾਮੇਡੀ ਤੋਂ ਸਿਆਸਤ 'ਚ ਆਏ ਭਗਵੰਤ  ਮਾਨ ਇਸ ਸੀਟ ਤੋਂ ਪਿਛਲੀ ਚੋਣ ਜਿੱਤੇ ਸਨ। ਇਸ ਤੋਂ ਪਹਿਲਾਂ ਉਹ 2012 ਵਿਚ ਪੀ. ਪੀ.ਪੀ. ਦੀ ਟਿਕਟ 'ਤੇ ਰਜਿੰਦਰ ਕੌਰ ਭੱਠਲ ਨੂੰ ਵੀ ਸਖਤ ਟੱਕਰ ਦੇ ਚੁੱਕੇ ਹਨ।

ਸਿਮਰਨਜੀਤ ਸਿੰਘ ਮਾਨ
ਖਾਲਿਸਤਾਨ ਸਮਰਥਕ ਇਸ ਨੇਤਾ ਨੇ ਆਪ੍ਰੇਸ਼ਨ ਬਲਿਉੂ ਸਟਾਰ ਦੇ ਵਿਰੋਧ 'ਚ ਆਪਣੀ ਆਈ. ਪੀ. ਐੱਸ. ਦੀ ਨੌਕਰੀ ਛੱਡੀ ਸੀ ਤੇ 1989 ਵਿਚ ਤਰਨਤਾਰਨ ਤੇ 1999 ਵਿਚ ਸੰਗਰੂਰ ਤੋਂ ਸੰਸਦ ਮੈਂਬਰ ਚੁਣੇ ਗਏ। ਉਹ ਅਕਾਲੀ ਦਲ (ਮਾਨ) ਦੇ ਮੁਖੀ ਹਨ।

ਕੇਵਲ ਸਿੰਘ ਢਿੱਲੋਂ
ਕਾਰੋਬਾਰ ਤੋਂ ਸਿਆਸਤ 'ਚ ਆਏ ਕੇਵਲ ਸਿੰਘ ਢਿੱਲੋਂ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਨਜ਼ਦੀਕੀ ਹਨ ਅਤੇ ਬਰਨਾਲਾ ਤੋਂ 2 ਵਾਰ ਵਿਧਾਇਕ ਰਹੇ ਹਨ। ਉਨ੍ਹਾਂ ਨੇ 2007 ਅਤੇ 2012 ਦੀ ਚੋਣ ਜਿੱਤੀ ਸੀ ਪਰ 2017 'ਚ ਉਹ 'ਆਮ ਆਦਮੀ ਪਾਰਟੀ' ਦੇ ਉਮੀਦਵਾਰ ਗੁਰਮੀਤ ਸਿੰਘ ਮੀਤ ਤੋਂ ਚੋਣ ਹਾਰ ਗਏ ਸਨ। 

ਬਲਦੇਵ ਸਿੰਘ ਮਾਨ
ਲੰਮੇ ਸਮੇਂ ਤਕ ਸਾਬਕਾ ਮੁੱਖ ਮੰਤਰੀ ਸੁਰਜੀਤ ਸਿੰਘ ਬਰਨਾਲਾ ਦੇ ਨੇੜੇ ਰਹੇ ਬਲਦੇਵ ਸਿੰਘ ਮਾਨ ਕੈਬਨਿਟ ਮੰਤਰੀ ਵੀ ਰਹੇ ਹਨ। ਮਾਨ ਨੇ ਬਰਨਾਲਾ ਦੇ ਬੇਟੇ ਗਗਨਜੀਤ ਸਿੰਘ ਨਾਲ ਮਿਲ ਕੇ 2017 'ਚ ਅਕਾਲੀ ਦਲ ਜੁਆਇਨ ਕੀਤਾ ਸੀ।

ਵਿਜੇਇੰਦਰ ਸਿੰਗਲਾ
ਸੰਗਰੂਰ ਲੋਕ ਸਭਾ ਸੀਟ ਤੋਂ 2009 'ਚ ਸੰਸਦ ਮੈਂਬਰ ਰਹਿਣ ਦੇ ਨਾਲ-ਨਾਲ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ 'ਚ ਮੰਤਰੀ ਵੀ ਰਹੇ ਹਨ। ਉਹ ਸੰਗਰੂਰ ਸੀਟ ਤੋਂ ਵਿਧਾਇਕ ਹਨ। ਰਾਹੁਲ ਗਾਂਧੀ ਦੇ ਕਰੀਬੀ ਹੋਣ ਕਾਰਨ ਉਹ ਕੌਮੀ ਸਿਆਸਤ 'ਚ ਆਉਣ ਦੇ ਇੱਛੁਕ ਹਨ।

ਸੰਗਰੂਰ ਦੇ ਸੰਸਦ ਮੈਂਬਰ 
ਸਾਲ ਸੰਸਦ ਮੈਂਬਰ ਪਾਰਟੀ

• 1962 ਰਣਜੀਤ ਸਿੰਘ ਕਾਂਗਰਸ
• 1967 ਐੱਨ. ਕੌਰ ਅਕਾਲੀ ਦਲ
• 1971 ਤੇਜਾ ਸਿੰਘ ਸੀ. ਪੀ. ਆਈ.
• 1977 ਸੁਰਜੀਤ ਸਿੰਘ ਅਕਾਲੀ ਦਲ
• 1980 ਗੁਰਚਰਨ ਸਿੰਘ ਕਾਂਗਰਸ
• 1985 ਬਲਵੰਤ ਸਿੰਘ ਰਾਮੂਵਾਲੀਆ ਅਕਾਲੀ ਦਲ
• 1989 ਰਾਜਦੇਵ ਸਿੰਘ ਅਕਾਲੀ ਦਲ ਮਾਨ
• 1992 ਗੁਰਚਰਨ ਸਿੰਘ ਕਾਂਗਰਸ
• 1996 ਸੁਰਜੀਤ ਸਿੰਘ ਬਰਨਾਲਾ ਅਕਾਲੀ ਦਲ
• 1998 ਸੁਰਜੀਤ ਸਿੰਘ ਬਰਨਾਲਾ ਅਕਾਲੀ ਦਲ
• 1999 ਸਿਮਰਨਜੀਤ ਸਿੰਘ ਮਾਨ ਅਕਾਲੀ ਦਲ ਮਾਨ
• 2004 ਸੁਖਦੇਵ ਸਿੰਘ ਢੀਂਡਸਾ ਅਕਾਲੀ ਦਲ
• 2009 ਵਿਜੇਇੰਦਰ ਸਿੰਗਲਾ ਕਾਂਗਰਸ
• 2014 ਭਗਵੰਤ ਮਾਨ 'ਆਪ'