ਭੈਣ ਦੇ ਘਰ ਲਿਜਾ ਕੇ ਕੀਤਾ ਜਬਰ-ਜ਼ਨਾਹ, ਬਣਾਈ ਵੀਡੀਓ

ਜਲੰਧਰ, (ਵਰੁਣ)— ਵਿਆਹੁਤਾ ਔਰਤ ਨੂੰ ਫਰੈਂਡ ਬਣਾ ਕੇ ਘਰ ਬੁਲਾ ਕੇ ਉਸ ਨਾਲ ਜਬਰ-ਜ਼ਨਾਹ ਕਰ ਕੇ ਵੀਡੀਓ ਬਣਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਵੀਡੀਓ ਜ਼ਰੀਏ ਔਰਤ ਨੂੰ ਬਲੈਕਮੇਲ ਕਰਨ ਤੇ ਲੱਖਾਂ ਰੁਪਏ ਤੇ ਗਹਿਣੇ ਹੜੱਪਣ ਵਾਲੇ ਨੂੰ ਪੁਲਸ ਨੇ ਗ੍ਰਿਫਤਾਰ ਕਰ ਲਿਆ ਹੈ। ਹੁਣ ਉਸ ਨੂੰ ਅਦਾਲਤ 'ਚ ਪੇਸ਼ ਕਰ ਕੇ ਰਿਮਾਂਡ ਹਾਸਲ ਕੀਤਾ ਜਾਵੇਗਾ ਤੇ ਪੁਲਸ ਉਸ ਕੋਲੋਂ ਨਕਦੀ ਤੇ ਗਹਿਣੇ ਬਰਾਮਦ ਕਰਵਾਏਗੀ।
ਥਾਣਾ ਨੰ. 7 ਦੇ ਮੁਖੀ ਨਵੀਨਪਾਲ ਨੇ ਦੱਸਿਆ ਕਿ ਗੜ੍ਹਾ ਇਲਾਕੇ ਦੀ ਰਹਿਣ ਵਾਲੀ ਔਰਤ ਨੇ ਉਨ੍ਹਾਂ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਜਿਸ ਕੰਪਨੀ 'ਚ ਉਹ ਕੰਮ ਕਰਦੀ ਹੈ, ਉਸ ਦੇ ਨੇੜੇ ਹੀ ਨੌਕਰੀ ਕਰਨ ਵਾਲੇ ਜੌਨ ਪੀਟਰ ਉਰਫ ਜੌਨੀ ਪੁੱਤਰ ਪ੍ਰੇਮ ਮਸੀਹ ਵਾਸੀ ਭੋਗਪੁਰ ਨਾਲ ਉਸ ਦੀ ਜਾਣ-ਪਛਾਣ ਹੋ ਗਈ। ਹੌਲੀ-ਹੌਲੀ ਉਹ ਦੋਵੇਂ ਚੰਗੇ ਦੋਸਤ ਬਣ ਗਏ। ਕਰੀਬ 4 ਮਹੀਨੇ ਪਹਿਲਾਂ ਉਹ ਉਸ ਨੂੰ ਮਿਲਵਾਉਣ ਲਈ ਭੈਣ ਘਰ ਲੈ ਗਿਆ ਪਰ ਘਰ 'ਚ ਕੋਈ ਨਹੀਂ ਸੀ। ਜੌਨੀ ਸੋਚੀ-ਸਮਝੀ ਸਾਜ਼ਿਸ਼ ਨਾਲ ਕੇ ਉਸ ਨੂੰ ਘਰ ਲੈ ਗਿਆ ਤੇ ਉਥੇ ਉਸ ਨਾਲ ਜ਼ਬਰਦਸਤੀ ਕੀਤੀ।
ਦੋਸ਼ ਹੈ ਕਿ ਜੌਨੀ ਨੇ ਜ਼ਬਰਦਸਤੀ ਕਰਨ ਦੀ ਵੀਡੀਓ ਬਣਾ ਲਈ ਤੇ ਬਾਅਦ 'ਚ ਲਗਾਤਾਰ ਵੀਡੀਓ ਵਾਇਰਲ ਕਰਨ ਦੀਆਂ ਧਮਕੀਆਂ ਦੇ ਕੇ ਜਬਰ-ਜ਼ਨਾਹ ਕਰਦਾ ਰਿਹਾ। ਦੋਸ਼ ਹੈ ਕਿ ਜੌਨੀ ਨੇ ਉਸ ਨੂੰ ਬਲੈਕਮੇਲ ਕਰ ਕੇ ਸਰੀਰਕ ਸਬੰਧਾਂ ਤੋਂ ਇਲਾਵਾ ਡੇਢ ਲੱਖ ਰੁਪਏ ਤੇ ਸੋਨੇ ਦੇ ਗਹਿਣੇ ਵੀ ਹੜੱਪ ਲਏ। ਔਰਤ ਨੂੰ ਲਗਾਤਾਰ ਬਲੈਕਮੇਲ ਕਰ ਰਹੇ ਜੌਨੀ ਦੀ ਸ਼ਿਕਾਇਤ ਥਾਣਾ ਨੰ. 7 ਦੀ ਪੁਲਸ ਨੂੰ ਦਿੱਤੀ ਗਈ ਤਾਂ ਮੁਲਜ਼ਮ ਖਿਲਾਫ ਕੇਸ ਦਰਜ ਕਰ ਲਿਆ ਗਿਆ।
ਇੰਸਪੈਕਟਰ ਨਵੀਨ ਪਾਲ ਨੇ ਦੱਸਿਆ ਕਿ ਏ. ਐੱਸ. ਆਈ. ਅਵਤਾਰ ਸਿੰਘ ਨੂੰ ਗੁਪਤਾ ਸੂਚਨਾ ਮਿਲੀ ਸੀ ਕਿ ਜੌਨੀ ਲਾਡੋਵਾਲੀ ਰੋਡ 'ਤੇ ਆਇਆ ਹੋਇਆ ਹੈ, ਜਿਥੇ ਰੇਡ ਕਰ ਕੇ ਪੁਲਸ ਨੇ ਜੌਨੀ ਨੂੰ ਗ੍ਰਿਫਤਾਰ ਕਰ ਲਿਆ। ਪੁਲਸ ਦਾ ਕਹਿਣਾ ਹੈ ਕਿ ਮੁਲਜ਼ਮ ਕੋਲੋਂ ਵੀਡੀਓ ਨਾਲ ਬਲੈਕਮੇਲ ਕਰ ਕੇ ਲਏ ਗਏ ਪੈਸੇ ਤੇ ਗਹਿਣੇ ਰਿਕਵਰ ਕਰਵਾਏ ਜਾਣਗੇ। ਐਤਵਾਰ ਨੂੰ ਮੁਲਜ਼ਮ ਨੂੰ ਕੋਰਟ 'ਚ ਪੇਸ਼ ਕਰ ਕੇ ਰਿਮਾਂਡ ਹਾਸਲ ਕੀਤਾ ਜਾਵੇਗਾ।