ਨਾਬਾਲਗ ਲੜਕੀ ਨੂੰ ਵਿਆਹ ਦਾ ਝਾਂਸਾ ਦੇ ਕੇ ਬਣਾਇਆ ਹਵਸ ਦਾ ਸ਼ਿਕਾਰ

ਫ਼ਰੀਦਕੋਟ,(ਰਾਜਨ): ਨਾਬਾਲਗ ਲੜਕੀ ਨੂੰ ਵਿਆਹ ਦਾ ਝਾਂਸਾ ਦੇ ਕੇ ਇਕ ਨੌਜਵਾਨ ਵਲੋਂ ਉਸ ਨੂੰ ਹਵਸ ਦਾ ਸ਼ਿਕਾਰ ਬਣਾਇਆ ਗਿਆ। ਜਾਣਕਾਰੀ ਮੁਤਾਬਕ ਨਾਬਾਲਗ ਲੜਕੀ ਨੂੰ ਪਹਿਲਾਂ ਤੋਂ ਹੀ ਜਾਨਣ ਦੀ ਸੂਰਤ 'ਚ ਇਕ ਨੌਜਵਾਨ ਵੱਲੋਂ ਉਸ ਦੇ ਘਰ ਜਾ ਕੇ ਉਸ ਨੂੰ ਹਵਸ ਦਾ ਸ਼ਿਕਾਰ ਬਣਾਉਣ ਤੇ ਫਿਰ ਉਸ ਨੂੰ ਵਿਆਹ ਦਾ ਝਾਂਸਾ ਦੇ ਕੇ ਆਪਣੇ ਦੇਸ਼ ਲਿਜਾ ਕੇ ਕੁਝ ਦਿਨ ਬਾਅਦ ਫਿਰ ਫਰੀਦਕੋਟ ਵਿਖੇ ਛੱਡ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਿਸ ਖਿਲਾਫ ਪੀੜਤ ਲੜਕੀ ਦੀ ਸ਼ਿਕਾਇਤ 'ਤੇ ਸਥਾਨਕ ਥਾਣਾ ਸਿਟੀ ਵਿਖੇ ਮੁਕੱਦਮਾ ਦਰਜ ਕਰ ਲਿਆ ਗਿਆ ਹੈ।
ਧੋਖਾਦੇਹੀ ਦਾ ਸ਼ਿਕਾਰ ਹੋਈ ਮੰਦਭਾਗੀ ਨਾਬਾਲਗ ਲੜਕੀ ਜ਼ਿਲੇ ਦੇ ਪਿੰਡ ਜੰਡਵਾਲਾ ਨਿਵਾਸੀ ਇਕ ਪਰਿਵਾਰ ਨਾਲ ਸਬੰਧਤ ਹੈ, ਜੋ ਇਸ ਵੇਲੇ ਸਥਾਨਕ ਸ਼ਹਿਰ ਵਿਚ ਰਹਿ ਰਹੇ ਹਨ। ਪੀੜਤ ਲੜਕੀ ਨੇ ਬਿਆਨ ਦਿੱਤਾ ਕਿ ਰਾਜਪਾਲ ਸਿੰਘ ਪੁੱਤਰ ਸਹਿਜ ਰਾਮ ਵਾਸੀ ਪਿੰਡ ਬਿਲਸੜੀ ਜ਼ਿਲਾ ਬਾਰਾਬੰਕੀ ਉੱਤਰ ਪ੍ਰਦੇਸ਼ ਉਸ ਨੂੰ ਪਹਿਲਾਂ ਤੋਂ ਹੀ ਜਾਣਦਾ ਸੀ। ਕੁਝ ਸਮਾਂ ਪਹਿਲਾਂ ਉਹ ਉਸ ਦੇ ਘਰ ਆਇਆ ਤੇ ਘਰ ਵਿਚ ਉਸ ਦੇ ਇਕੱਲੀ ਹੋਣ ਦੀ ਸੂਰਤ 'ਚ ਉਸਨੇ ਉਸ ਨਾਲ ਜ਼ਬਰਦਸਤੀ ਕੀਤੀ ਤੇ ਉਸਦੇ ਵਿਰੋਧ ਕਰਨ 'ਤੇ ਉਹ
ਉਸ ਨੂੰ ਅਤੇ ਉਸ ਦੇ ਪਰਿਵਾਰ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਲੱਗ ਪਿਆ। ਸ਼ਿਕਾਇਤਕਰਤਾ ਨੇ ਬਿਆਨ ਦਿੱਤਾ ਕਿ ਇਸ ਘਟਨਾ ਉਪਰੰਤ ਰਾਜਪਾਲ ਇਕ ਦਿਨ ਫਿਰ ਉਸ ਦੇ ਘਰ ਆਇਆ ਅਤੇ ਘਰ 'ਚ ਉਸਦੇ ਇਕੱਲੀ ਹੋਣ ਦੀ ਸੂਰਤ 'ਚ ਉਸ ਨੂੰ ਵਿਆਹ ਕਰਵਾਉਣ ਦਾ ਝਾਂਸਾ ਦੇ ਕੇ ਰੇਲ ਗੱਡੀ ਰਾਹੀਂ ਆਪਣੇ ਪਿੰਡ ਬਿਲਸੜੀ ਵਿਖੇ ਲੈ ਗਿਆ, ਜਿੱਥੇ ਉਸਦੇ ਮਾਤਾ-ਪਿਤਾ ਵੀ ਰਹਿ ਰਹੇ ਸਨ।

ਪੀੜਤਾ ਮੁਤਾਬਕ ਉਸ ਨੇ ਉਸ ਨੂੰ 15 ਦਿਨ ਆਪਣੇ ਘਰ ਰੱਖਿਆ ਤੇ ਇਸ ਦੌਰਾਨ ਉਹ ਅਕਸਰ ਉਸ ਨਾਲ ਜ਼ਬਰਦਸਤੀ ਕਰਦਾ ਰਹਿੰਦਾ ਸੀ। ਇਸ ਪਿੱਛੋਂ ਰਾਜਪਾਲ ਦਾ ਪਿਤਾ ਉਸ ਨੂੰ ਬੀਤੀ 13 ਸਤੰਬਰ ਨੂੰ ਇੱਥੇ ਛੱਡ ਗਿਆ, ਜਿਸ 'ਤੇ ਉਸ ਨੇ ਸਾਰੀ ਹੱਡ ਬੀਤੀ ਆਪਣੇ ਮਾਤਾ-ਪਿਤਾ ਨੂੰ ਦੱਸੀ। ਇਸ ਸ਼ਿਕਾਇਤ 'ਤੇ ਥਾਣਾ ਸਿਟੀ ਵਿਖੇ ਮੁੱਖ ਕਥਿਤ ਦੋਸ਼ੀ ਰਾਜਪਾਲ ਸਿੰਘ, ਇਸ ਦੇ ਪਿਤਾ ਸਹਿਜਰਾਮ ਅਤੇ ਗੀਤਾ ਪਤਨੀ ਸਹਿਜ ਰਾਮ 'ਤੇ ਢੁੱਕਵੀਆਂ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕਰ ਲਿਆ ਗਿਆ ਹੈ, ਜਿਸਦੀ ਤਫ਼ਤੀਸ਼ ਥਾਣੇਦਾਰ ਜਗਦੀਪ ਕੌਰ ਇੰਚਾਰਜ ਵੁਮੈਨ ਸੈੱਲ ਫ਼ਰੀਦਕੋਟ ਵੱਲੋਂ ਜਾਰੀ ਹੈ।