ਡੌਲੀ ਬਿੰਦਰਾ ਦਾ ਰਾਧੇ ਮਾਂ ''ਤੇ ਨਿਸ਼ਾਨਾ,ਕਿਹਾ- ਮੈਂ ਧਮਕੀਆਂ ਤੋਂ ਨਹੀਂ ਡਰਦੀ

ਭਵਾਨੀਗੜ੍ਹ,(ਵਿਕਾਸ, ਸੰਜੀਵ)— ਰਾਧੇ ਮਾਂ 'ਤੇ ਧਮਕਾਉਂਣ ਦੇ ਦੋਸ਼ਾਂ ਵਾਲੀ ਰਿਕਾਰਡਿੰਗ ਦੀ ਅਵਾਜ਼ ਵਾਲੇ ਸੈਂਪਲ ਮੈਚ ਹੋਣ 'ਤੇ ਹਾਈਕੋਰਟ ਨੇ ਪੰਜਾਬ ਦੇ ਪੁਲਸ ਮੁਖੀ ਨੂੰ ਜਾਂਚ ਕਰਕੇ ਕਾਰਵਾਈ ਦੇ ਹੁਕਮ ਦੇਣ ਤੋਂ ਬਾਅਦ 'ਚ ਬਾਲੀਵੁੱਡ ਅਦਾਕਾਰਾ ਡੌਲੀ ਬਿੰਦਰਾ ਇੱਕ ਬਾਰ ਫਿਰ 'ਰਾਧੇ ਮਾਂ' ਖਿਲਾਫ ਖੁੱਲਕੇ ਸਾਹਮਣੇ ਆਈ ਹੈ । 'ਜਗ ਬਾਣੀ' ਨਾਲ ਮੁੰਬਈ ਤੋਂ ਫੋਨ 'ਤੇ ਵਿਸ਼ੇਸ਼ ਗੱਲਬਾਤ ਕਰਦਿਆਂ 
ਉੱਕਤ ਮਾਮਲੇ 'ਚ ਅਦਾਲਤ ਵੱਲੋਂ ਪੁਲਸ ਨੂੰ ਕਾਰਵਾਈ ਕਰਨ ਦੇ ਦਿੱਤੇ ਆਦੇਸ਼ਾਂ 'ਤੇ ਖੁਸ਼ੀ ਜਾਹਿਰ ਕਰਦਿਆਂ ਡੌਲੀ ਬਿੰਦਰਾ ਨੇ ਪ੍ਰਤੀਕਰਮ ਦਿੱਤਾ ਕਿ ਉਹ ਬਹੁਤ ਹੈਰਾਨ ਹੈ ਕਿ ਪੁਲਸ ਵਲੋਂ ਕਿਸੇ ਦੀ ਅਵਾਜ਼ ਪਛਾਨਣ 'ਚ ਇੰਨੀਂ ਦੇਰੀ ਕੀਤੀ ਗਈ। ਉਨ੍ਹਾਂ ਕਿਹਾ ਕਿ ਇਸ ਤਰ੍ਹਾਂ ਕੰਮ ਕਰਨ ਵਾਲੀ ਪੁਲਸ ਤੋਂ ਲੋਕ ਇਨਸਾਫ ਦੀ ਕਿਵੇਂ ਆਸ ਲਾਉਂਣਗੇ। ਬਿੰਦਰਾ ਨੇ 'ਰਾਧਾ ਮਾਂ' 'ਤੇ ਨਿਸ਼ਾਨਾ ਲਾਉਂਦੇ ਕਿਹਾ ਕਿ ਧਰਮ ਦੇ ਨਾਂਅ 'ਤੇ ਆਖਿਰ ਕੋਈ ਕਿਵੇਂ ਲੋਕਾਂ ਨੂੰ ਮੂਰਖ ਬਣਾ ਸਕਦਾ ਹੈ ਪਰ ਲੋਕ ਹੁਣ ਸਮਝਦਾਰ ਹੋ ਚੁੱਕੇ ਹਨ ਤੇ ਅਜਿਹੇ ਪਾਖੰਡੀਆਂ ਨੂੰ ਮੂੰਹ ਨਹੀਂ ਲਾਉਂਦੇ । ਬਿੰਦਰਾ ਨੇ ਕਿਹਾ ਕਿ ਲੋਕਾਂ ਨੂੰ ਹੁਣ ਪਤਾ ਲੱਗ ਚੁੱਕਾ ਹੈ ਕਿ ਧਰਮ ਦੇ ਨਾਂਅ 'ਤੇ ਲੋਕਾਂ ਦੀਆਂ ਧਾਰਮਿਕ ਭਾਵਨਾਵਾਂ ਨਾਲ ਅੱਜ ਤੱਕ ਸਰੇਆਮ ਖੇਡਿਆ ਗਿਆ ਹੈ।ਬਿੰਦਰਾ ਨੇ ਦੋਸ਼ ਲਾਇਆ ਕਿ ਇਹ ਔਰਤ ਪੈਸੇ ਦੇ ਜੋਰ ਸਭ ਨਾਲ ਖਿਡਾਉਂਣਾ ਸਮਝਕੇ ਖੇਡਦੀ ਹੈ ਤੇ ਪੈਸੇ ਦੇ ਦਮ 'ਤੇ ਹੀ ਮਹਾਮੰਡਲੇਸ਼ਵਰ ਦੀ ਉਪਾਧੀ ਤੱਕ ਪਹੁੰਚੀ ਹੈ, ਜਦਕਿ ਇਸ ਵਿੱਚ ਧਾਰਮਿਕ ਭਾਵਨਾਵਾਂ ਦਾ ਸਤਕਾਰ ਕਰਨ ਵਾਲੀ ਕੋਈ ਵੀ ਗੱਲ ਨਜ਼ਰ ਨਹੀਂ ਆਉਂਦੀ।ਇਸ ਨੇ ਆਪਣੇ ਆਲੇ ਦੁਆਲੇ ਪਾਖੰਡ ਦਾ ਜਾਲ ਵਿਛਾ ਰੱਖਿਆ ਹੈ। ਡੌਲੀ ਬਿੰਦਰਾ ਨੇ ਫਗਵਾੜਾ ਦੇ ਸੁਰਿੰਦਰ ਮਿੱਤਲ ਵੱਲੋਂ ਸੁਖਵਿੰਦਰ ਕੌਰ ਉਰਫ ਬੱਬੌ ਉਰਫ ਰਾਧੇ ਮਾਂ ਦੇ ਖਿਲਾਫ ਲੜੀ ਜਾ ਰਹੀ ਦਲੇਰਾਨਾ ਢੰਗ ਲੜਾਈ ਦੀ ਸ਼ਲਾਘਾ ਕਰਦਿਆ ਕਿਹਾ ਕਿ ਜੇਕਰ ਹੋਰ ਲੋਕ ਵੀ ਇਸ ਦੇ ਪਾਖੰਡ ਦਾ ਪਰਦਾਫਾਸ਼ ਕਰਨ ਲਈ ਅੱਗੇ ਆਉਂਣ ਤਾਂ ਇਸ ਲੜਾਈ ਦਾ ਅੰਤ ਛੇਤੀ ਹੋ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਉਹ ਵੀ ਇਸ ਲੜਾਈ ਨੂੰ ਅੰਤ ਤੱਕ ਜਾਰੀ ਰੱਖੇਗੀ, ਜਦਕਿ ਉਸਨੂੰ ਲਗਾਤਾਰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਮਿਲ ਰਹੀਆਂ ਹਨ ਤੇ ਕੱਲ ਰਾਤ ਵੀ ਇੱਕ ਅਣਪਛਾਤੇ ਵਿਅਕਤੀ ਵੱਲੌਂ ਉਸਦਾ ਪਿਛਾ ਕੀਤਾ ਗਿਆ, ਜਿਸ ਦੀ ਸ਼ਿਕਾਇਤ ਉਸ ਨੇ ਮੁੰਬਈ ਪੁਲਸ ਨੂੰ ਦਿੱਤੀ ਹੈ।