ਮਿੰਟਾਂ ''ਚ ਬਣਾਓ ਕੱਚੇ ਅੰਬਾਂ ਦਾ ਖੱਟਾ-ਮਿੱਠਾ ਮੁਰੱਬਾ

ਮੁੰਬਈ (ਬਿਊਰੋ) — ਗਰਮੀਆਂ ਦੇ ਆਉਂਦੇ ਹੀ ਅੰਬਾਂ ਦੀ ਬਹਾਰ ਆ ਜਾਂਦੀ ਹੈ। ਕੱਚੇ, ਪੱਕੇ ਹਰ ਤਰ੍ਹਾਂ ਦੇ ਅੰਬਾਂ ਨਾਲ ਕੋਈ ਨਾ ਕੋਈ ਡਿਸ਼ ਹਰ ਘਰ 'ਚ ਜ਼ਰੂਰ ਬਣਦੀ ਹੈ। ਫਿਰ ਭਾਵੇਂ ਉਹ ਕੱਚੇ ਅੰਬ ਦਾ ਅਚਾਰ ਹੋਵੇ ਜਾਂ ਚਟਨੀ, ਮਿੱਠੀ ਚਟਨੀ ਹੋਵੇ ਜਾਂ ਫਿਰ ਸ਼ਿਕੰਜੀ। ਅੰਬ ਦੀਆਂ ਇਹ ਸਾਰੀਆਂ ਡਿਸ਼ ਖਾਣ 'ਚ ਕਾਫੀ ਸੁਆਦ ਹੁੰਦੀਆਂ ਹਨ ਪਰ ਅੱਜ ਤੁਹਾਨੂੰ ਦੱਸਣ ਜਾ ਰਹੇ ਹਾਂ ਕੱਚੇ ਅੰਬ ਦਾ ਮੁਰੱਬਾ। ਹੁਣ ਤੱਕ ਤੁਸੀਂ ਆਂਵਲੇ ਦਾ ਮੁਰੱਬਾ ਜਾਂ ਸੇਬ ਦਾ ਮੁਰੱਬਾ ਖਾਧਾ ਹੋਵੇਗਾ ਪਰ ਕੱਚੇ ਅੰਬ ਦਾ ਮੁਰੱਬਾ ਖਾਣ ਤੋਂ ਬਾਅਦ ਤੁਸੀਂ ਬਾਕੀ ਸਭ ਨੂੰ ਭੁੱਲ ਜਾਓਗੇ। ਤਾਂ ਆਓ ਜਾਣਦੇ ਹਾਂ ਇਸ ਨੂੰ ਬਣਾਉਣ ਦੀ ਵਿਧੀ :-
ਸਮੱਗਰੀ :-
ਮੁਰੱਬਾ ਬਣਾਉਣ ਲਈ ਇਕ ਕਿਲੋ ਕੱਚੇ ਅੰਬਾਂ ਦੀ ਜ਼ਰੂਰਤ ਹੁੰਦੀ ਹੈ। ਨਾਲ ਹੀ ਅੱਧਾ ਕਿਲੋ ਖੰਡ, ਕੁਝ ਧਾਗੇ ਕੇਸਰ ਦੇ ਅਤੇ ਇਕ ਗਲਾਸ ਪਾਣੀ ਦਾ।

ਬਣਾਉਣ ਦੀ ਵਿਧੀ :-
ਮੁਰੱਬਾ ਬਣਾਉਣ ਲਈ ਪਹਿਲਾਂ ਅੰਬਾਂ ਨੂੰ ਪਾਣੀ ਨਾਲ ਚੰਗੀ ਤਰ੍ਹਾਂ ਧੋ ਲਵੋ। ਫਿਰ ਅੰਬਾਂ ਨੂੰ ਛਿੱਲ ਕੇ ਛੋਟੇ-ਛੋਟੇ ਟੁਕੜਿਆਂ 'ਚ ਕੱਟ ਲਓ। ਇਕ ਕੜਾਹੀ 'ਚ ਖੰਡ ਅਤੇ ਪਾਣੀ ਪਾ ਕੇ ਹੌਲੀ-ਹੌਲੀ ਰਿੱਜਣ (ਪਕਣ) ਦਿਓ ਪਰ ਧਿਆਨ ਰਹੇ ਕਿ ਥੋੜ੍ਹੇ-ਥੋੜ੍ਹੇ ਸਮੇਂ ਬਾਅਦ ਇਸ ਨੂੰ ਹਿਲਾਉਂਦੇ ਰਹੋ ਤਾਂਕਿ ਕੜਾਹੀ 'ਚ ਨਾ ਲੱਗੇ। ਜਦੋਂ ਅੰਬ ਭੁੱਜ ਜਾਣਗੇ ਤਾਂ ਉਸ ਦਾ ਰੰਗ ਪਾਰਦਰਸ਼ੀ ਦਿਸਣ ਲੱਗੇਗਾ। ਇਸ ਤੋਂ ਬਾਅਦ ਇਸ 'ਚ ਕੇਸਰ ਦੇ ਧਾਗੇ ਪਾ ਕੇ ਗੈਸ ਨੂੰ ਬੰਦ ਕਰ ਦਿਓ। ਇਸ ਤਰ੍ਹਾਂ ਕੁਝ ਹੀ ਮਿੰਟਾਂ 'ਚ ਤੁਸੀਂ ਘਰ 'ਚ ਖੱਟਾ-ਮਿੱਠਾ ਮੁਰੱਬਾ ਤਿਆਰ ਕਰ ਸਕਦੇ ਹੋ।