17 ਵਾਰ ਗਰਭਵਤੀ ਦੱਸ ਕੇ ਔਰਤ ਨੇ ਸਰਕਾਰ ਨੂੰ ਲਗਾਇਆ 98 ਲੱਖ ਦਾ ਚੂਨਾ, ਇੰਝ ਖੁੱਲੀ ਪੋਲ

ਰੋਮ: ਇਟਲੀ ਦਾ ਇਕ ਹੈਰਾਨ ਕਰ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ 50 ਸਾਲਾ ਔਰਤ ਨੇ 17 ਵਾਰ ਗਰਭਵਤੀ ਹੋਣ ਦਾ ਦਾਅਵਾ ਕੀਤਾ ਅਤੇ 98 ਲੱਖ ਰੁਪਏ ਦੇ ਸਰਕਾਰੀ ਲਾਭ ਲਏ। ਇੰਨਾ ਹੀ ਨਹੀਂ ਉਸ ਨੇ ਗਰਭ ਅਵਸਥਾ ਅਤੇ ਗਰਭਪਾਤ ਦੇ ਨਾਂ ‘ਤੇ ਦਫਤਰ ਤੋਂ ਜਣੇਪਾ ਛੁੱਟੀ ਵੀ ਲਈ। ਜਦੋਂ ਇਹ ਮਾਮਲਾ ਸਾਹਮਣੇ ਆਇਆ ਤਾਂ ਸੋਸ਼ਲ ਮੀਡੀਆ ‘ਤੇ ਇਸ ਦੀ ਚਰਚਾ ਸ਼ੁਰੂ ਹੋ ਗਈ।

50 ਸਾਲਾ ਔਰਤ ਨੇ ਜਣੇਪਾ ਲਾਭ ਲੈਣ ਲਈ ਪੰਜ ਬੱਚੇ ਪੈਦਾ ਕਰਨ ਅਤੇ 12 ਗਰਭਪਾਤ ਕਰਵਾਉਣ ਦਾ ਝੂਠਾ ਦਾਅਵਾ ਕੀਤਾ। ਜਦੋਂ ਇਹ ਧੋਖਾਧੜੀ ਸਾਹਮਣੇ ਆਈ ਤਾਂ ਔਰਤ ਪਹਿਲਾਂ ਹੀ 110,000 ਯੂਰੋ ਯਾਨੀ ਕਰੀਬ 98 ਲੱਖ ਰੁਪਏ ਦਾ ਸਰਕਾਰੀ ਲਾਭ ਲੈ ਚੁੱਕੀ ਸੀ। ਸਥਾਨਕ ਪ੍ਰੈਸ ਅਨੁਸਾਰ 50 ਸਾਲਾ ਬਾਰਬਰਾ ਆਇਓਲ ਨੇ ਇਹ ਧੋਖਾਧੜੀ ਲਗਭਗ 24 ਸਾਲਾਂ ਤੱਕ ਚਲਾਈ ਅਤੇ ਸਰਕਾਰ ਨੂੰ ਧੋਖਾ ਦੇ ਕੇ ਮੁਨਾਫਾ ਕਮਾਉਂਦੀ ਰਹੀ। ਬਾਰਬਰਾ ਨੇ ਦਾਅਵਾ ਕੀਤਾ ਕਿ ਉਸਨੇ ਪੰਜ ਬੱਚਿਆਂ ਨੂੰ ਜਨਮ ਦਿੱਤਾ ਅਤੇ 12 ਗਰਭਪਾਤ ਕਰਵਾਏ। ਇਸ ਦੇ ਲਈ ਉਸ ਨੂੰ 98 ਲੱਖ ਰੁਪਏ ਤੋਂ ਵੱਧ ਸਰਕਾਰੀ ਲਾਭ ਵਜੋਂ ਮਿਲੇ। 

ਪੰਜਵੀਂ ਪ੍ਰੈਗਨੈਂਸੀ ਤੋਂ ਹੋਇਆ ਸ਼ੱਕ 

ਦੋਸ਼ੀ ਔਰਤ ਨੇ ਕਿਹਾ ਸੀ ਕਿ ਉਸ ਨੇ ਪਿਛਲੇ ਸਾਲ ਦਸੰਬਰ ‘ਚ ਇਕ ਬੱਚੇ ਨੂੰ ਜਨਮ ਦਿੱਤਾ ਸੀ। ਇਹ ਧੋਖਾਧੜੀ ਉਦੋਂ ਸਾਹਮਣੇ ਆਈ ਜਦੋਂ ਅਧਿਕਾਰੀਆਂ ਨੇ ਇਹ ਪਤਾ ਲਗਾਉਣ ਲਈ ਜਾਂਚ ਸ਼ੁਰੂ ਕੀਤੀ ਕਿ ਕੀ ਔਰਤ ਨੇ ਅਸਲ ‘ਚ ਬੱਚੇ ਨੂੰ ਜਨਮ ਦਿੱਤਾ ਸੀ ਜਾਂ ਨਹੀਂ। ਜਲਦੀ ਹੀ ਇਹ ਸਾਬਤ ਹੋ ਗਿਆ ਕਿ ਉਸਦੀ ਪੰਜਵੀਂ ਗਰਭ ਅਵਸਥਾ ਇੱਕ ਧੋਖਾ ਸੀ।

ਢਿੱਡ ‘ਤੇ ਰੱਖਦੀ ਸੀ ਸਿਰਹਾਣਾ 

ਰਿਪੋਰਟ ‘ਚ ਖੁਲਾਸਾ ਹੋਇਆ ਹੈ ਕਿ ਬਾਰਬਰਾ ਬੇਬੀ ਬੰਪ ਦਿਖਾਉਣ ਲਈ ਸਿਰਹਾਣੇ ਦੀ ਵਰਤੋਂ ਕਰਦੀ ਸੀ। ਬਾਰਬਰਾ ਨੇ ਗਰਭਵਤੀ ਔਰਤ ਵਾਂਗ ਤੁਰਨ ਦੀ ਨਕਲ ਵੀ ਕੀਤੀ, ਤਾਂ ਜੋ ਕਿਸੇ ਨੂੰ ਉਸ ‘ਤੇ ਸ਼ੱਕ ਨਾ ਹੋਵੇ। ਪਰ ਪੰਜਵੀਂ ਵਾਰ ਉਸਦਾ ਝੂਠ ਫੜਿਆ ਗਿਆ।

ਜਾਅਲੀ ਦਸਤਾਵੇਜ਼ਾਂ ਤੋਂ ਲਏ ਸਰਕਾਰੀ ਲਾਭ

ਅਦਾਲਤ ਵਿੱਚ ਵਿਰੋਧੀ ਧਿਰ ਦੇ ਵਕੀਲਾਂ ਨੇ ਦੋਸ਼ ਲਾਇਆ ਕਿ ਬਾਰਬਰਾ ਨੇ ਰੋਮ ਦੇ ਇੱਕ ਹਸਪਤਾਲ ਵਿੱਚੋਂ ਜਨਮ ਸਰਟੀਫਿਕੇਟ ਚੋਰੀ ਕੀਤੇ, ਉਨ੍ਹਾਂ ਦੀ ਗ਼ੈਰਕਾਨੂੰਨੀ ਵਰਤੋਂ ਕੀਤੀ ਅਤੇ ਆਪਣੇ ਘੁਟਾਲੇ ਲਈ ਕਈ ਜਾਅਲੀ ਦਸਤਾਵੇਜ਼ ਬਣਾਏ। ਅਦਾਲਤ ਵਿੱਚ ਇਹ ਸਾਬਤ ਹੋ ਗਿਆ ਕਿ ਮੁਲਜ਼ਮ ਔਰਤ ਦੇ ਪੰਜ ਬੱਚਿਆਂ ਨੂੰ ਕਿਸੇ ਨੇ ਵੀ ਨਹੀਂ ਦੇਖਿਆ ਅਤੇ ਨਾ ਹੀ ਬੱਚਿਆਂ ਦੇ ਜਨਮ ਅਤੇ ਪਛਾਣ ਪੱਤਰ ਨਾਲ ਸਬੰਧਤ ਕੋਈ ਕਾਨੂੰਨੀ ਦਸਤਾਵੇਜ਼ ਸਨ।

ਪੜ੍ਹੋ ਇਹ ਅਹਿਮ ਖ਼ਬਰ-ਹਵਾਈ ਜਹਾਜ਼ 'ਚ ਕਾਲਜ ਜਾਂਦਾ ਹੈ ਇਹ ਮੁੰਡਾ, ਬੋਲਿਆ- ਬੈੱਡਰੂਮ ਦੇ ਕਿਰਾਏ ਨਾਲੋਂ ਪੈਂਦਾ ਹੈ ਸਸਤਾ 

ਪਾਰਟਨਰ ਨੇ ਕੀਤਾ ਪਰਦਾਫਾਸ਼

ਸਰਕਾਰੀ ਗਵਾਹ ਬਣ ਕੇ ਸਜ਼ਾ ਘਟਾਉਣ ਦਾ ਵਾਅਦਾ ਕੀਤੇ ਜਾਣ ਤੋਂ ਬਾਅਦ ਔਰਤ ਦੇ ਪਾਰਟਨਰ ਡੇਵਿਡ ਪਿਜ਼ਿਨਾਟੋ ਨੇ ਵੀ ਉਸਦੇ ਖ਼ਿਲਾਫ਼ ਗਵਾਹੀ ਦਿੱਤੀ। ਆਪਣੀ ਗਵਾਹੀ ਵਿਚ ਉਸ ਨੇ ਕਿਹਾ ਕਿ ਉਸਨੂੰ ਪਤਾ ਸੀ ਕਿ ਉਸਦੀ ਸਾਥੀ ਕਦੇ ਗਰਭਵਤੀ ਨਹੀਂ ਸੀ। ਹਾਲਾਂਕਿ ਔਰਤ ਇਸ ਗੱਲ ‘ਤੇ ਅੜੀ ਰਹੀ ਕਿ ਉਸਨੇ 5 ਬੱਚਿਆਂ ਨੂੰ ਜਨਮ ਦਿੱਤਾ ਹੈ ਅਤੇ 12 ਗਰਭਪਾਤ ਕਰਵਾਉਣ ਦੇ ਆਪਣੇ ਦਾਅਵੇ ‘ਤੇ ਵੀ ਕਾਇਮ ਰਹੀ।

ਡੇਢ ਸਾਲ ਦੀ ਜੇਲ੍ਹ

ਬਾਰਬਰਾ ‘ਤੇ 24 ਸਾਲਾਂ ਦੇ ਕਾਰਜਕਾਲ ਦੌਰਾਨ ਰਾਜ ਸਰਕਾਰ ਦੇ ਲਾਭਾਂ ਨਾਲ ਧੋਖਾਧੜੀ ਕਰਕੇ ਅਤੇ ਫਰਜ਼ੀ ਜਣੇਪਾ ਛੁੱਟੀ ਲੈ ਕੇ ਧਨ ਇਕੱਠਾ ਕਰਨ ਦਾ ਦੋਸ਼ ਸੀ। ਸਾਰੇ ਦੋਸ਼ਾਂ ਵਿਚ ਦੋਸ਼ੀ ਪਾਏ ਜਾਣ ਤੋਂ ਬਾਅਦ ਉਸ ਨੂੰ ਇਕ ਸਾਲ ਅਤੇ ਛੇ ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।