ਆਸਟ੍ਰੇਲੀਆ ਨੇ ਰਚਿਆ ਇਤਿਹਾਸ, ਨਵੀਂ ਸਰਕਾਰ 'ਚ ਰਿਕਾਰਡ 13 ਮਹਿਲਾ ਮੰਤਰੀ ਸ਼ਾਮਲ
06/01/2022 11:13:33 AM
ਕੈਨਬਰਾ (ਏਜੰਸੀ): ਆਸਟ੍ਰੇਲੀਆ ਦੀ ਨਵੀਂ ਸਰਕਾਰ ਵਿਚ ਬੁੱਧਵਾਰ ਨੂੰ ਪਹਿਲੀ ਮਹਿਲਾ ਮੁਸਲਿਮ ਸਮੇਤ ਰਿਕਾਰਡ 13 ਔਰਤਾਂ ਨੇ ਮੰਤਰੀ ਵਜੋਂ ਸਹੁੰ ਚੁੱਕੀ। ਗਵਰਨਰ-ਜਨਰਲ ਡੇਵਿਡ ਹਰਲੇ ਦੁਆਰਾ ਰਾਜਧਾਨੀ ਕੈਨਬਰਾ ਵਿੱਚ ਇੱਕ ਸਮਾਰੋਹ ਵਿੱਚ ਨਵੇਂ ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਦੀ ਅਗਵਾਈ ਵਿੱਚ ਮੰਤਰੀਆਂ ਦਾ ਸਹੁੰ ਚੁੱਕ ਸਮਾਗਮ ਚੋਣ ਜਿੱਤ ਦੇ 11 ਦਿਨਾਂ ਬਾਅਦ ਹੋਇਆ। ਅਲਬਾਨੀਜ਼ ਨੇ ਟਵਿੱਟਰ 'ਤੇ ਲਿਖਿਆ ਕਿ ਇੱਕ ਅਜਿਹੀ ਸਮਾਵੇਸ਼ੀ ਸਰਕਾਰ ਦੀ ਅਗਵਾਈ ਕਰਨ 'ਤੇ ਮਾਣ ਹੈ ਜੋ ਆਸਟ੍ਰੇਲੀਆ ਜਿੰਨੀ ਹੀ ਵਿਭਿੰਨ ਹੈ।ਉਹਨਾਂ ਨੇ ਕਿਹਾ ਕਿ ਇਹਨਾਂ ਸਾਰੇ ਨਵੇਂ ਲੇਬਰ ਪਾਰਟੀ ਦੇ ਮੈਂਬਰਾਂ ਦਾ ਸਵਾਗਤ ਹੈ।
ਏਨੀ ਏਲੀ ਨੇ ਆਸਟ੍ਰੇਲੀਆ ਦੀ ਪਹਿਲੀ ਮਹਿਲਾ ਮੁਸਲਿਮ ਮੰਤਰੀ ਵਜੋਂ ਸਹੁੰ ਚੁੱਕੀ ਜਦਕਿ ਏਦ ਹੁਸਿਕ ਕੈਬਨਿਟ ਵਿੱਚ ਸੇਵਾ ਦੇਣ ਵਾਲੀ ਪਹਿਲੀ ਮੁਸਲਿਮ ਬਣੀ। ਲਿੰਡਾ ਬਰਨੀ ਨਸਲੀ ਮਾਮਲਿਆਂ ਦੀ ਮੰਤਰੀ ਵਜੋਂ ਸੇਵਾ ਕਰਨ ਵਾਲੀ ਪਹਿਲੀ ਔਰਤ ਅਤੇ ਸਥਾਨਕ ਮੂਲ ਦੀ ਸਿਰਫ਼ ਦੂਜੀ ਵਿਅਕਤੀ ਬਣੀ। ਜ਼ਿਕਰਯੋਗ ਹੈ ਕਿ ਅਲਬਾਨੀਜ਼ ਅਤੇ ਵਿਦੇਸ਼ ਮੰਤਰੀ ਪੈਨੀ ਵੋਂਗ ਨੇ ਪਿਛਲੇ ਹਫ਼ਤੇ ਦੀ ਸ਼ੁਰੂਆਤ ਵਿਚ ਸਹੁੰ ਚੁੱਕੀ ਸੀ ਤਾਂ ਜੋ ਉਹ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਈਡੇਨ, ਜਾਪਾਨੀ ਪ੍ਰਧਾਨ ਮੰਤਰੀ ਫੂਮਿਓ ਕਿਸ਼ਿਦਾ ਅਤੇ ਭਾਰਤੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਸਿਖਰ ਵਾਰਤਾ ਲਈ ਟੋਕੀਓ ਦੀ ਯਾਤਰਾ ਕਰ ਸਕਣ।
ਨਵੀਂ ਸਰਕਾਰ ਵਿੱਚ ਨਿਯੁਕਤ ਕੀਤੇ ਗਏ 30 ਮੰਤਰੀਆਂ ਵਿੱਚੋਂ ਤਕਰੀਬਨ ਅੱਧੀਆਂ ਔਰਤਾਂ ਹਨ। ਕੈਬਨਿਟ ਦੀਆਂ ਪ੍ਰਮੁੱਖ ਭੂਮਿਕਾਵਾਂ ਵਿਚੋਂ ਔਰਤਾਂ ਕੋਲ 23 ਵਿੱਚੋਂ 10 ਵਿਭਾਗ ਹਨ। ਲੇਬਰ ਪਾਰਟੀ ਨੇ 150 ਸੀਟਾਂ ਵਾਲੇ ਸਦਨ ਵਿੱਚ ਬਹੁਮਤ ਹਾਸਲ ਕਰਨ ਲਈ ਲੋੜੀਂਦੀਆਂ ਸੀਟਾਂ ਜਿੱਤੀਆਂ ਹਨ। ਅਲਬਾਨੀਜ਼ ਦੀ ਕੈਬਨਿਟ ਵਿੱਚ ਕੁਝ ਨਵੇਂ ਚਿਹਰਿਆਂ ਦੇ ਨਾਲ-ਨਾਲ ਕੁਝ ਸੰਸਦ ਮੈਂਬਰ ਵੀ ਸ਼ਾਮਲ ਹਨ, ਜਿਨ੍ਹਾਂ ਨੇ ਪਿਛਲੀ ਲੇਬਰ ਸਰਕਾਰ ਵਿੱਚ ਸੇਵਾ ਕੀਤੀ ਸੀ ਜੋ ਨੌਂ ਸਾਲ ਪਹਿਲਾਂ ਸੱਤਾ ਵਿੱਚ ਸੀ। ਅਲਬਾਨੀਜ਼ ਨੇ ਕਿਹਾ ਕਿ ਸਾਡੇ ਕੋਲ ਪਾਰਲੀਮੈਂਟ ਵਿੱਚ ਸਾਡੇ ਨਾਲ ਬਹੁਤ ਸਾਰੇ ਪ੍ਰਤਿਭਾਸ਼ਾਲੀ ਸੰਸਦ ਮੈਂਬਰ ਹਨ। ਇਹ ਸਾਡੇ ਇਤਿਹਾਸ ਦੀ ਸਭ ਤੋਂ ਤਜਰਬੇਕਾਰ ਲੇਬਰ ਸਰਕਾਰ ਹੈ।
ਪੜ੍ਹੋ ਇਹ ਅਹਿਮ ਖ਼ਬਰ -ਟਰੂਡੋ ਦਾ ਵੱਡਾ ਕਦਮ, ਰੂਸੀ ਵਿੱਤੀ ਖੇਤਰ 'ਤੇ ਲਗਾਈਆਂ ਨਵੀਆਂ ਪਾਬੰਦੀਆਂ
ਅਲਬਾਨੀਜ਼ ਨੂੰ ਬ੍ਰਿਟਿਸ਼ ਗਾਇਕ-ਗੀਤਕਾਰ ਬਿਲੀ ਬ੍ਰੈਗ ਤੋਂ ਸਮਰਥਨ ਮਿਲ ਰਿਹਾ ਹੈ। ਬ੍ਰੈਗ ਨੇ ਟਵਿੱਟਰ 'ਤੇ ਲਿਖਿਆ ਕਿ ਉਹ ਇਹ ਜਾਣ ਕੇ ਹੈਰਾਨ ਹਨ ਕਿ ''ਆਸਟ੍ਰੇਲੀਆ ਦੇ ਨਵੇਂ ਪ੍ਰਧਾਨ ਮੰਤਰੀ ਨੇ ਆਪਣੀ ਪਹਿਲੀ ਪ੍ਰੈੱਸ ਕਾਨਫਰੰਸ 'ਚ ਮੇਰੇ ਗੀਤਾਂ ਦਾ ਜ਼ਿਕਰ ਕੀਤਾ।'' ਬ੍ਰੈਗ ਨੇ ਕਿਹਾ ਕਿ ਉਨ੍ਹਾਂ ਨੂੰ ਕੋਈ ਹੈਰਾਨੀ ਨਹੀਂ ਹੋਈ ਕਿਉਂਕਿ ਉਹ 20 ਸਾਲਾਂ ਤੋਂ ਅਲਬਾਨੀਜ਼ ਦੇ ਦੋਸਤ ਹਨ। ਬ੍ਰੈਗ ਨੇ ਕਿਹਾ ਕਿ ਉਹ ਸਿਡਨੀ ਦੇ ਇੱਕ ਥੀਏਟਰ ਵਿੱਚ ਅਲਬਾਨੀਜ਼ ਨੂੰ ਮਿਲਿਆ ਅਤੇ ਦੋਵੇਂ ਸੰਗੀਤ ਅਤੇ ਹਮਦਰਦੀ ਵਾਲੀ ਰਾਜਨੀਤੀ ਬਾਰੇ ਵਿਚਾਰ ਸਾਂਝੇ ਕਰਦੇ ਹਨ। ਬ੍ਰੈਗ ਨੇ ਲਿਖਿਆ ਕਿ ਅਲਬਾਨੀਜ਼ ਜਿਨ੍ਹਾਂ ਚੁਣੌਤੀਆਂ ਦਾ ਸਾਹਮਣਾ ਕਰ ਰਿਹਾ ਹੈ, ਉਹ ਮੁਸ਼ਕਿਲ ਹਨ ਅਤੇ ਮੈਂ ਉਸ ਦੀ ਸਫਲਤਾ ਨਾਲ ਈਰਖਾ ਨਹੀਂ ਕਰਦਾ। ਸਾਡੇ ਵਿੱਚੋਂ ਕੁਝ ਸੰਸਾਰ ਨੂੰ ਇੱਕ ਬਿਹਤਰ ਸਥਾਨ ਬਣਾਉਣ ਬਾਰੇ ਗਾਉਂਦੇ ਹਨ - ਹੁਣ ਇਹ ਉਹਨਾਂ 'ਤੇ ਨਿਰਭਰ ਕਰਦਾ ਹੈ ਕਿ ਉਹ ਉਸ ਵਾਅਦੇ ਨੂੰ ਪੂਰਾ ਕਰਨ।
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।