ਸਕਾਟਲੈਂਡ ਦੇ ਪ੍ਰਮੁੱਖ ਸ਼ਹਿਰਾਂ ਦੀ ਸੂਚੀ ’ਚ ਡੰਫਰਲਾਈਨ ਹੋਵੇਗਾ 8ਵੇਂ ਨੰਬਰ ’ਤੇ
05/20/2022 10:25:27 PM
ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ) : ਸਕਾਟਲੈਂਡ ਦੇ ਡੰਫਰਲਾਈਨ ਕਸਬੇ ਨੂੰ ਮਹਾਰਾਣੀ ਦੇ ਪਲੈਟੀਨਮ ਜੁਬਲੀ ਦੇ ਜਸ਼ਨਾਂ ਦੇ ਹਿੱਸੇ ਵਜੋਂ ਦਰਜਾ ਦਿੱਤੇ ਜਾਣ ਤੋਂ ਬਾਅਦ ਸਕਾਟਲੈਂਡ ਦਾ ਅੱਠਵਾਂ ਸ਼ਹਿਰ ਬਣਾਇਆ ਜਾਵੇਗਾ। ਫਾਈਫ ਦੇ ਇਸ ਕਸਬੇ ਨੂੰ ਯੂ. ਕੇ. ਅਤੇ ਵਿਦੇਸ਼ੀ ਖੇਤਰਾਂ ’ਚ 7 ਹੋਰਾਂ ਦੇ ਨਾਲ ਚੁਣਿਆ ਗਿਆ ਹੈ, ਜਿਸ ਤੋਂ ਬਾਅਦ ਇਹ ਸਕਾਟਿਸ਼ ਸ਼ਹਿਰਾਂ ਦੀ ਸੂਚੀ ’ਚ ਗਲਾਸਗੋ, ਐਡਿਨਬਰਾ, ਏਬਰਡੀਨ, ਡੰਡੀ, ਪਰਥ, ਸਟਰਲਿੰਗ ਅਤੇ ਇਨਵਰਨੇਸ ਨਾਲ ਸ਼ਾਮਲ ਹੁੰਦਾ ਹੈ।
ਇਹ ਵੀ ਪੜ੍ਹੋ :- ਜੇ ਤੁਹਾਨੂੰ ਵੀ ਮਿਲਦੀ ਹੈ 25,000 ਰੁਪਏ ਤਨਖਾਹ ਤਾਂ ਇੰਨੇ ਫੀਸਦੀ ਲੋਕਾਂ ’ਚ ਤੁਸੀਂ ਵੀ ਹੋ ਸ਼ਾਮਲ
ਡੰਫਰਲਾਈਨ ਕਦੇ ਸਕਾਟਲੈਂਡ ਦੀ ਰਾਜਧਾਨੀ ਸੀ ਅਤੇ ਚਾਰਲਸ ਪਹਿਲੇ ਤੇ ਐਂਡ੍ਰਿਊ ਕਾਰਨੇਗੀ ਦਾ ਜਨਮ ਸਥਾਨ ਸੀ। ਇਸ ਕਾਰਵਾਈ ’ਚ ਲੱਗਭਗ 40 ਸਥਾਨਾਂ ਨੇ ਸ਼ਹਿਰ ਦੀ ਸਥਿਤੀ ਲਈ ਅਰਜ਼ੀ ਦਿੱਤੀ ਸੀ ਅਤੇ ਮਹਾਰਾਣੀ ਨੂੰ ਸਿਫ਼ਾਰਿਸ਼ ਕਰਨ ਤੋਂ ਪਹਿਲਾਂ, ਮਾਹਿਰਾਂ ਅਤੇ ਕੈਬਨਿਟ ਦਫ਼ਤਰ ਦੇ ਮੰਤਰੀਆਂ ਦੇ ਇਕ ਪੈਨਲ ਵੱਲੋਂ ਮੁਲਾਂਕਣ ਕੀਤਾ ਗਿਆ ਸੀ। ਉਨ੍ਹਾਂ ਦਾ ਨਿਰਣਾ ਉਨ੍ਹਾਂ ਦੇ ਸ਼ਾਹੀ ਸੰਘਾਂ ਅਤੇ ਸੱਭਿਆਚਾਰਕ ਵਿਰਾਸਤ ਦੇ ਨਾਲ-ਨਾਲ ਉਨ੍ਹਾਂ ਦੇ ਭਾਈਚਾਰਿਆਂ ਦੀ ਵਿਲੱਖਣਤਾ ਅਤੇ ਵੱਖਰੀ ਸਥਾਨਕ ਪਛਾਣ ਦੇ ਆਧਾਰ ’ਤੇ ਕੀਤਾ ਗਿਆ। ਡੰਫਰਲਾਈਨ, ਉੱਤਰੀ ਆਇਰਲੈਂਡ ’ਚ ਬੈਂਗੋਰ, ਇੰਗਲੈਂਡ ’ਚ ਕੋਲਚੈਸਟਰ, ਡੋਨਕਾਸਟਰ ਤੇ ਮਿਲਟਨ ਕੀਨਜ਼, ਆਇਲ ਆਫ ਮੈਨ ’ਚ ਡਗਲਸ, ਫਾਕਲੈਂਡ ਆਈਲੈਂਡਜ਼ ’ਚ ਸਟੈਨਲੀ ਅਤੇ ਵੇਲਜ਼ ਵਿਚ ਰੈਕਸਹੈਮ ਦੇ ਨਾਲ ਆਪਣਾ ਵਿਸ਼ੇਸ਼ ਰੁਤਬਾ ਹਾਸਲ ਕਰਨ ’ਚ ਸਫ਼ਲ ਰਿਹਾ।
ਇਹ ਵੀ ਪੜ੍ਹੋ :-RR vs CSK : ਚੇਨਈ ਨੇ ਰਾਜਸਥਾਨ ਨੂੰ ਦਿੱਤਾ 151 ਦੌੜਾਂ ਦਾ ਟੀਚਾ
ਇਹ ਨਵਾਂ ਸ਼ਹਿਰ ਪਹਿਲੀ ਵਾਰ 11ਵੀਂ ਸਦੀ ’ਚ ਸਕਾਟਿਸ ਬਾਦਸ਼ਾਹ ਮੈਲਕਮ III ਅਤੇ ਸੇਂਟ ਮਾਰਗਰੇਟ ਦੇ ਵਿਆਹ ਸਮੇਂ ਚਰਚ ’ਚ ਦਰਜ ਕੀਤਾ ਗਿਆ ਸੀ, ਜੋ ਏ-ਸੂਚੀਬੱਧ ਐਬੇ ’ਚ ਵਿਕਸਿਤ ਹੋਇਆ ਸੀ। ਡੰਫਰਲਾਈਨ ਐਬੇ ਨੂੰ ਬਾਅਦ ’ਚ ਸਕਾਟਿਸ਼ ਤਾਜ ਲਈ ਇਕ ਸ਼ਾਹੀ ਮਕਬਰੇ ਵਜੋਂ ਸਥਾਪਿਤ ਕੀਤਾ ਗਿਆ ਸੀ, ਜਿਸ ’ਚ ਕੁਲ 18 ਸ਼ਾਹੀ ਪਰਿਵਾਰ ਸਨ, ਜਿਨ੍ਹਾਂ ’ਚ ਸੱਤ ਰਾਜਿਆਂ ਨੂੰ ਦਫ਼ਨਾਇਆ ਗਿਆ ਸੀ। ਡੰਫਰਲਾਈਨ ਪੈਲੇਸ ’ਚ ਬਹੁਤ ਸਾਰੇ ਬ੍ਰਿਟਿਸ਼ ਰਾਜੇ ਪੈਦਾ ਹੋਏ ਸਨ। ਇਨ੍ਹਾਂ ’ਚ ਸਕਾਟਲੈਂਡ ਦਾ ਡੇਵਿਡ II, ਜੋ ਰੌਬਰਟ ਦਿ ਬਰੂਸ ਦਾ ਪੁੱਤਰ ਸੀ, ਸਕਾਟਲੈਂਡ ਦਾ ਜੇਮਸ ਪਹਿਲਾ ਅਤੇ ਚਾਰਲਸ ਪਹਿਲਾ, ਜੋ 1625 ਤੋਂ 1649 ’ਚ ਫਾਂਸੀ ਦਿੱਤੇ ਜਾਣ ਤੱਕ ਇੰਗਲੈਂਡ, ਸਕਾਟਲੈਂਡ ਅਤੇ ਆਇਰਲੈਂਡ ਦਾ ਰਾਜਾ ਸੀ। ਡੰਫਰਲਾਈਨ ਦੀ ਅਨੁਮਾਨਿਤ ਆਬਾਦੀ 58,508 ਹੈ।
ਇਹ ਵੀ ਪੜ੍ਹੋ :-ਤਾਲਿਬਾਨ ਦਾ ਫਰਮਾਨ : ਹੁਣ ਅਫਗਾਨਿਸਤਾਨ 'ਚ ਮੂੰਹ ਢਕ ਕੇ ਐਂਕਰਿੰਗ ਕਰਨਗੀਆਂ ਮਹਿਲਾਵਾਂ
ਨੋਟ - ਇਸ ਖ਼ਬਰ ਸਬੰਧੀ ਕੀ ਹੈ ਤੁਹਾਡੀ ਰਾਏ, ਕੁਮੈਂਟ ਕਰਕੇ ਦੱਸੋ