ਚੀਨ ''ਚ ਹਾਈ ਪ੍ਰੋਫਾਈਲ ਘਰੇਲੂ ਹਿੰਸਾ ਦੇ ਮਾਮਲਿਆਂ ''ਚ ਵਾਧਾ, ਵਿਆਹ ਤੋਂ ਡਰਨ ਲੱਗੇ ਨੌਜਵਾਨ

ਬੀਜਿੰਗ— ਚੀਨ 'ਚ ਘਰੇਲੂ ਹਿੰਸਾ ਦੇ ਡਰਾਉਣੇ ਮਾਮਲਿਆਂ ਤੋਂ ਬਾਅਦ ਉਨ੍ਹਾਂ ਦਾ ਵਿਆਹ ਪ੍ਰਤੀ ਰੁਝਾਨ ਖਤਮ ਹੁੰਦਾ ਜਾ ਰਿਹਾ ਹੈ। ਇਕ ਰਿਪੋਰਟ ਮੁਤਾਬਕ ਚੀਨ 'ਚ ਹਾਈ ਪ੍ਰੋਫਾਈਲ ਘਰੇਲੂ ਹਿੰਸਾ ਦੇ ਮਾਮਲਿਆਂ 'ਚ ਵਾਧਾ ਹੋਇਆ ਹੈ, ਜਿਸ ਕਾਰਨ ਚੀਨ ਦੇ ਨੌਜਵਾਨ ਵਿਆਹ ਕਰਨ ਤੋਂ ਬਚ ਰਹੇ ਹਨ। ਚੀਨ ਦੇ ਨੌਜਵਾਨਾਂ 'ਚ ਵਿਆਹ ਨੂੰ ਲੈ ਕੇ ਕਈ ਸਵਾਲ ਖੜ੍ਹੇ ਹੋ ਗਏ ਹਨ। ਹਾਲ ਹੀ 'ਚ ਚੀਨ 'ਚ ਘਰੇਲੂ ਹਿੰਸਾ ਦਾ ਇਕ ਮਾਮਲਾ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ, ਜਿਸ 'ਚ ਦਿਨ-ਦਿਹਾੜੇ ਕਤਲ ਦੀ ਵੀਡੀਓ ਰਿਕਾਰਡ ਕੀਤੀ ਗਈ ਸੀ। ਇਹ ਕਤਲ ਪੂਰਬੀ ਸੂਬੇ ਸ਼ਾਨਡੋਂਗ 'ਚ ਹੋਇਆ ਸੀ ਅਤੇ ਪੂਰੀ ਘਟਨਾ ਨੂੰ ਇਕ ਗਵਾਹ ਨੇ ਰਿਕਾਰਡ ਕੀਤਾ ਸੀ। ਵਿਅਕਤੀ ਨੇ ਇਹ ਵੀਡੀਓ ਆਨਲਾਈਨ ਪੋਸਟ ਕੀਤੀ ਜਿਸ ਤੋਂ ਬਾਅਦ ਘਰੇਲੂ ਹਿੰਸਾ ਦਾ ਮਾਮਲਾ ਸਾਹਮਣੇ ਆਇਆ।
ਵੀਡੀਓ 'ਚ ਵਿਅਕਤੀ ਵਾਰ-ਵਾਰ ਇੱਕ ਔਰਤ ਉੱਤੇ ਕਾਰ ਚੜ੍ਹਾਉਂਦਾ ਹੋਇਆ ਦਿਖਾਈ ਦੇ ਰਿਹਾ ਹੈ, ਜਿਸ ਦੀ ਬਾਅਦ 'ਚ ਪੁਲਸ ਨੇ ਉਸ ਦੀ ਪਤਨੀ ਵਜੋਂ ਪਛਾਣ ਕੀਤੀ। ਵੀਡੀਓ 'ਚ ਇਹ ਵੀ ਦੇਖਿਆ ਗਿਆ ਕਿ ਪਤੀ ਵਾਰ-ਵਾਰ ਆਪਣੀ ਕਾਰ 'ਚੋਂ ਬਾਹਰ ਨਿਕਲ ਰਿਹਾ ਸੀ ਤਾਂ ਜੋ ਇਹ ਪਤਾ ਲਗਾਇਆ ਜਾ ਸਕੇ ਕਿ ਉਸ ਦੀ ਪਤਨੀ ਜ਼ਿੰਦਾ ਹੈ ਜਾਂ ਨਹੀਂ। ਡੋਂਗਇੰਗ ਸਿਟੀ ਪੁਲਸ ਨੇ ਮੰਗਲਵਾਰ ਨੂੰ ਇੱਕ ਬਿਆਨ 'ਚ ਕਿਹਾ ਕਿ ਇੱਕ 37 ਸਾਲਾ ਵਿਅਕਤੀ ਨੇ ਪਰਿਵਾਰਕ ਝਗੜੇ ਕਾਰਨ ਆਪਣੀ 38 ਸਾਲਾ ਪਤਨੀ ਦਾ ਕਤਲ ਕਰ ਦਿੱਤਾ ਅਤੇ ਫਿਰ ਉਸ ਨੂੰ ਕਾਰ ਨਾਲ ਕੁਚਲ ਦਿੱਤਾ। ਦੋਸ਼ੀ ਨੂੰ ਹਿਰਾਸਤ 'ਚ ਲੈ ਕੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਆਨਲਾਈਨ ਵੀਡੀਓ ਸੋਮਵਾਰ ਨੂੰ ਵਾਇਰਲ ਹੋਈ ਸੀ ਅਤੇ ਬੁੱਧਵਾਰ ਸਵੇਰ ਤੱਕ ਇਹ ਕੇਸ 300 ਮਿਲੀਅਨ ਵਿਯੂਜ਼ ਦੇ ਨਾਲ ਚੀਨ ਦੇ ਟਵਿੱਟਰ-ਵਰਗੇ ਵੇਈਬੋ 'ਤੇ ਇੱਕ ਪ੍ਰਮੁੱਖ ਰੁਝਾਨ ਵਾਲਾ ਵਿਸ਼ਾ ਬਣ ਗਿਆ ਸੀ। ਕਈ ਲੋਕਾਂ ਨੇ ਇਸ ਹਮਲੇ ਨੂੰ ਵਹਿਸ਼ੀਆਨਾ ਕਰਾਰ ਦਿੱਤਾ ਹੈ। ਪਿਛਲੇ ਮਹੀਨੇ ਦੱਖਣੀ ਸੂਬੇ ਗੁਆਂਗਡੋਂਗ 'ਚ ਇੱਕ ਵਿਅਕਤੀ ਨੇ ਆਪਣੀ ਪਤਨੀ ਅਤੇ ਆਪਣੀ ਸਾਲੀ ਦੀ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ ਸੀ। ਰਿਪੋਰਟ ਮੁਤਾਬਕ ਉਸ ਦੇ ਪਰਿਵਾਰ ਨੇ ਸਰਕਾਰੀ ਮੀਡੀਆ ਆਉਟਲੈਟ ਦਿ ਪੇਪਰ ਨੂੰ ਦੱਸਿਆ ਕਿ ਪਤਨੀ ਕਥਿਤ ਤੌਰ 'ਤੇ ਸਾਲਾਂ ਤੋਂ ਘਰੇਲੂ ਹਿੰਸਾ ਤੋਂ ਪੀੜਤ ਸੀ ਅਤੇ ਆਪਣੇ ਪਤੀ ਤੋਂ ਤਲਾਕ ਚਾਹੁੰਦੀ ਸੀ।
ਪਿਛਲੇ ਹਫ਼ਤੇ ਇੱਕ ਹੋਰ ਮਾਮਲਾ ਸਾਹਮਣੇ ਆਇਆ ਸੀ, ਜਿਸ 'ਚ ਚੇਂਗਦੂ ਦੇ ਦੱਖਣ-ਪੱਛਮੀ ਮਹਾਂਨਗਰ ਦੀ ਇੱਕ ਔਰਤ ਅਪ੍ਰੈਲ 'ਚ ਇੱਕ ਹੋਟਲ ਦੇ ਕਮਰੇ 'ਚ ਮ੍ਰਿਤਕ ਪਾਈ ਗਈ ਸੀ।
ਪਤਨੀ ਤਲਾਕ ਲੈਣਾ ਚਾਹੁੰਦੀ ਸੀ ਜਿਸ ਕਾਰਨ ਪਤੀ ਨੇ ਉਸ ਦਾ ਕਤਲ ਕਰ ਦਿੱਤਾ। ਸਰਕਾਰੀ ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਇਹ ਮਾਮਲਾ ਉਦੋਂ ਸਾਹਮਣੇ ਆਇਆ ਜਦੋਂ ਔਰਤ ਨੇ ਸੋਸ਼ਲ ਮੀਡੀਆ 'ਤੇ ਆਪਣੇ ਕੇਸ ਬਾਰੇ ਪੋਸਟ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੇ ਵਿਆਹ ਦੇ ਦੋ ਸਾਲਾਂ ਦੌਰਾਨ ਉਸ ਦੇ ਪਤੀ ਦੁਆਰਾ 16 ਵਾਰ ਹਮਲਾ ਕੀਤਾ ਗਿਆ ਸੀ।