25 ਨੂੰ ਭਾਰਤ ਦੇ ਹਵਾਲੇ ਕੀਤੇ ਜਾਣਗੇ ਜਸਵਿੰਦਰ ਕਤਲ ਕਾਂਡ ਦੇ ਦੋਸ਼ੀ

ਓਟਾਵਾ (ਏਜੰਸੀ)— ਕੈਨੇਡਾ ਦੀ ਰਹਿਣ ਵਾਲੀ ਭਾਰਤੀ ਮੂਲ ਦੀ ਜਸਵਿੰਦਰ ਸਿੱਧੂ ਉਰਫ ਜੱਸੀ ਦੀ ਹੱਤਿਆ ਮਾਮਲੇ ਦੀ ਦੋਸ਼ੀ ਉਸ ਦੀ ਮਾਂ ਮਲਕੀਤ ਕੌਰ ਸਿੱਧੂ ਅਤੇ ਮਾਮਾ ਸੁਰਜੀਤ ਸਿੰਘ ਬਦੇਸ਼ਾ ਨੂੰ 25 ਜਨਵਰੀ ਤੱਕ ਭਾਰਤ ਦੇ ਹਵਾਲੇ ਕੀਤਾ ਜਾਵੇਗਾ। ਮਲਕੀਤ ਅਤੇ ਬਦੇਸ਼ਾ ਦੋਵੇਂ ਕਥਿਤ ਰੂਪ ਨਾਲ ਕਤਲ ਦੀ ਸਾਜਿਸ਼ ਰਚਣ ਦੇ ਦੋਸ਼ੀ ਪਾਏ ਗਏ ਸਨ। ਉਨ੍ਹਾਂ ਨੇ ਕੈਨੇਡਾ ਸੁਪਰੀਮ ਕੋਰਟ ਵਿਚ 10 ਜਨਵਰੀ ਤੱਕ ਅਪੀਲ ਦਾਇਰ ਕਰਨੀ ਸੀ, ਜੋ ਉਹ ਨਹੀਂ ਕਰ ਪਾਏ। ਇਸ ਮਗਰੋਂ ਅਦਾਲਤ ਨੇ ਇਹ ਫੈਸਲਾ ਸੁਣਾਇਆ ਹੈ। ਕੈਨੇਡਾ ਦੇ ਫੈਡਰਲ ਨਿਆਂ ਵਿਭਾਗ ਨੇ ਬੁੱਧਵਾਰ ਨੂੰ ਦੱਸਿਆ ਕਿ ਉਨ੍ਹਾਂ ਦੋਹਾਂ ਦੀ ਭਾਰਤ ਨੂੰ ਸੁਰੱਖਿਅਤ ਹਵਾਲਗੀ ਲਈ ਉਚਿਤ ਵਿਵਸਥਾ ਕੀਤੀ ਜਾਵੇਗੀ।

ਮਲਕੀਤ ਅਤੇ ਬਦੇਸ਼ਾ ਨੇ ਮਿਲ ਕੇ ਜਸਵਿੰਦਰ ਉਰਫ ਜੱਸੀ ਦੀ ਹੱਤਿਆ ਦੀ ਯੋਜਨਾ ਬਣਾਈ ਸੀ ਕਿਉਂਕਿ ਉਸ ਨੇ ਭਾਰਤ ਵਿਚ ਉਨ੍ਹਾਂ ਦੀ ਇੱਛਾ ਵਿਰੁੱਧ ਇਕ ਗਰੀਬ ਰਿਕਸ਼ਾ ਡਰਾਈਵਰ ਨਾਲ ਵਿਆਹ ਕਰਵਾਇਆ ਸੀ। ਜਦੋਂ ਸਾਲ 2000 ਵਿਚ ਇਹ ਜੋੜਾ ਭਾਰਤ ਦੌਰੇ 'ਤੇ ਆਇਆ ਸੀ ਉਦੋਂ ਕੁਝ ਹਥਿਆਰਬੰਦ ਲੋਕਾਂ ਦੇ ਸਮੂਹ ਨੇ ਉਨ੍ਹਾਂ 'ਤੇ ਹਮਲਾ ਕੀਤਾ ਸੀ। ਉਨ੍ਹਾਂ ਲੋਕਾਂ ਨੇ ਜਸਵਿੰਦਰ ਦੇ ਪਤੀ ਸੁੱਖਵਿੰਦਰ ਸਿੱਧੂ ਮਿੱਠੂ ਦੀ ਬੇਰਹਿਮੀ ਨਾਲ ਕੁੱਟ ਮਾਰ ਕੀਤੀ ਅਤੇ ਜਸਵਿੰਦਰ ਦੀ ਹੱਤਿਆ ਕਰ ਦਿੱਤੀ। ਇਸ ਮਗਰੋਂ ਜਸਵਿੰਦਰ ਦੀ ਲਾਸ਼ ਪੰਜਾਬ ਦੀ ਇਕ ਨਹਿਰ ਵਿਚ ਪਾਈ ਗਈ। 

ਜਾਣਕਾਰੀ ਮੁਤਾਬਕ ਕੈਨੇਡੀਅਨ ਅਧਿਕਾਰੀਆਂ ਨੇ ਸਾਲ 2017 ਵਿਚ ਵੀ ਮਲਕੀਤ ਕੌਰ ਅਤੇ ਸੁਰਜੀਤ ਦੀ ਹਵਾਲਗੀ ਦੇ ਆਦੇਸ਼ ਦਿੱਤੇ ਸਨ ਪਰ ਬਚਾਅ ਪੱਖ ਦੇ ਵਕੀਲਾਂ ਵੱਲੋਂ ਦਿੱਤੀ ਗਈ ਐਪਲੀਕੇਸ਼ਨ ਦੇ ਬਾਅਦ ਇਸ ਪ੍ਰਕਿਰਿਆ ਨੂੰ ਰੋਕ ਦਿੱਤਾ ਗਿਆ ਸੀ। ਬ੍ਰਿਟਿਸ਼ ਕੋਲੰਬੀਆ ਕੋਰਟ ਆਫ ਅਪੀਲ ਵੱਲੋਂ ਇਸ ਐਪਲੀਕੇਸ਼ਨ ਨੂੰ ਬਾਅਦ ਵਿਚ ਬੀਤੇ ਸਾਲ ਦਸੰਬਰ ਵਿਚ ਰੱਦ ਕਰ ਦਿੱਤਾ ਗਿਆ, ਜਿਸ ਮਗਰੋਂ ਹੁਣ ਇਹ ਹਵਾਲਗੀ ਸੰਭਵ ਹੋਈ ਹੈ।