ਕਿਊਬਿਕ ਸਰਕਾਰ ਵਿਰੁੱਧ ਆਮ ਹੜਤਾਲ ਸੰਭਵ, ਮੁਲਾਜ਼ਮਾਂ ਨੇ ਕਿਹਾ– ‘ਸਾਡੇ ਕੋਲ ਗੁਆਉਣ ਲਈ ਕੁਝ ਨਹੀਂ ਬਚਿਆ’

ਇੰਟਰਨੈਸ਼ਨਲ ਡੈਸਕ– ਜਨਤਕ ਖੇਤਰ ਦੇ ਹਜ਼ਾਰਾਂ ਕਾਮਿਆਂ ਨੇ ਸ਼ਨੀਵਾਰ ਦੁਪਹਿਰ ਡਾਊਨਟਾਊਨ ਮਾਂਟਰੀਅਲ ’ਚ ਫਿਰੋਜ਼ੀ ਝੰਡੇ ਲੈ ਕੇ ਮਾਰਚ ਕੀਤਾ। ਕਈ ਯੂਨੀਅਨਾਂ ਦੇ ਸਹਿਯੋਗ ਨਾਲ ਨੁਮਾਇੰਦਗੀ ਕਰਨ ਵਾਲੇ ਵਰਕਰਾਂ ਦਾ ਕਹਿਣਾ ਹੈ ਕਿ ਉਹ ਆਮ ਹੜਤਾਲ ਸ਼ੁਰੂ ਕਰਨ ਲਈ ਤਿਆਰ ਹਨ, ਜਦੋਂ ਤੱਕ ਕਿਊਬਿਕ ਸਰਕਾਰ ਉਨ੍ਹਾਂ ਨੂੰ ‘ਸਤਿਕਾਰਯੋਗ’ ਪੇਸ਼ਕਸ਼ ਨਹੀਂ ਦਿੰਦੀ।

ਇਹ ਮਾਰਚ ਉਦੋਂ ਹੋਇਆ, ਜਦੋਂ ਸੂਬੇ ਭਰ ਦੀਆਂ ਯੂਨੀਅਨਾਂ ਕਿਊਬਿਕ ਸਰਕਾਰ ਨਾਲ ਨਵੇਂ ਸਮੂਹਿਕ ਸਮਝੌਤਿਆਂ ’ਤੇ ਗੱਲਬਾਤ ਕਰ ਰਹੀਆਂ ਸਨ। ਸਾਂਝਾ ਮੋਰਚਾ ਬਣਾਉਣ ਵਾਲੀਆਂ ਚਾਰ ਪ੍ਰਮੁੱਖ ਯੂਨੀਅਨਾਂ ਸੀ. ਐੱਸ. ਕਿਊ., ਐੱਫ. ਟੀ. ਕਿਊ., ਏ. ਪੀ. ਟੀ. ਐੱਸ. ਤੇ ਸੀ. ਐੱਸ. ਐੱਨ. ਦੇ ਪ੍ਰਧਾਨਾਂ ਨੇ ਮਾਰਚ ਤੋਂ ਪਹਿਲਾਂ ਮੀਡੀਆ ਨਾਲ ਗੱਲਬਾਤ ਕੀਤੀ, ਜਦਕਿ ਦਰਜਨਾਂ ਪੀਲੀਆਂ ਬੱਸਾਂ ਨੇ ਪ੍ਰਦਰਸ਼ਨਕਾਰੀਆਂ ਨੂੰ ਜੀਨ-ਮੈਨਸ ਪਾਰਕ ਦੇ ਨੇੜੇ ਉਤਾਰ ਦਿੱਤਾ। ਲਗਭਗ 4,20,000 ਜਨਤਕ ਖੇਤਰ ਦੇ ਕਰਮਚਾਰੀਆਂ ਨੇ ਮੋਰਚਾ ਖੋਲ੍ਹਿਆ। ਉਹ ਮੁੱਖ ਤੌਰ ’ਤੇ ਸਿਹਤ, ਸਮਾਜਿਕ ਸੇਵਾਵਾਂ, ਸਿੱਖਿਆ ਤੇ ਉੱਚ ਸਿੱਖਿਆ ’ਚ ਕੰਮ ਕਰਦੇ ਹਨ।

ਗੁੱਸੇ ’ਚ ਲੋਕ
ਸੀ. ਐੱਸ. ਐੱਨ. ਦੇ ਉਪ ਪ੍ਰਧਾਨ ਫ੍ਰਾਂਕੋਇਸ ਐਨੌਲਟ ਨੇ ਪੰਜ ਸਾਲਾਂ ’ਚ ਜਨਤਕ ਖੇਤਰ ਦੇ ਕਰਮਚਾਰੀਆਂ ਲਈ 9 ਫ਼ੀਸਦੀ ਤਨਖ਼ਾਹ ਵਧਾਉਣ ਦੇ ਕਿਊਬਿਕ ਦੇ ਪ੍ਰਸਤਾਵ ਦਾ ਹਵਾਲਾ ਦਿੰਦਿਆਂ ਕਿਹਾ, ‘‘ਲੋਕ ਗੁੱਸੇ ’ਚ ਹਨ।’’ ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਕਾਫ਼ੀ ਨਹੀਂ ਹੈ। ਸਾਨੂੰ ਮਹਾਮਾਰੀ ਦੌਰਾਨ ਸਰਪ੍ਰਸਤ ਦੂਤ ਕਿਹਾ ਜਾਂਦਾ ਸੀ। ਜਦੋਂ ਕੰਮ ਦੀਆਂ ਚੰਗੀਆਂ ਸਥਿਤੀਆਂ ਲਈ ਭੁਗਤਾਨ ਕਰਨ ਦਾ ਸਮਾਂ ਆਉਂਦਾ ਹੈ ਤਾਂ ਉਹ ਸਾਡੀ ਗੱਲ ਨਹੀਂ ਸੁਣਦੇ।

ਇਹ ਖ਼ਬਰ ਵੀ ਪੜ੍ਹੋ : ਮੈਕਸੀਕੋ 'ਚ 2 ਨਿੱਜੀ ਜਹਾਜ਼ਾਂ ਦੀ ਟੱਕਰ, 5 ਹਲਾਕ

ਯੂਨੀਅਨ ਆਗੂਆਂ ਦਾ ਕਹਿਣਾ ਹੈ ਕਿ ਜੇਕਰ ਸਰਕਾਰ ਨੇ ਹੋਰ ਪੇਸ਼ਕਸ਼ ਨਾ ਕੀਤੀ ਤਾਂ ਉਹ ਆਮ ਹੜਤਾਲ ਕਰਨ ਲਈ ਤਿਆਰ ਹਨ। ਏ. ਪੀ. ਟੀ. ਐੱਸ. ਦੇ ਪ੍ਰਧਾਨ ਰੌਬਰਟ ਕੋਮੇਓ ਨੇ ਕਿਹਾ, ‘‘ਸਾਨੂੰ ਉਥੇ ਪਹੁੰਚਣ ਦੀ ਉਮੀਦ ਨਹੀਂ ਹੈ ਪਰ ਇਹ ਆਖਰੀ ਉਪਾਅ ਹੈ। ਅਸੀਂ ਅਜਿਹਾ ਕਰਨ ਦੀ ਤਿਆਰੀ ਕਰ ਰਹੇ ਹਾਂ ਕਿਉਂਕਿ ਜਨਤਕ ਖੇਤਰ ’ਚ ਹੜਤਾਲ ਦਾ ਆਦੇਸ਼ ਪ੍ਰਾਪਤ ਕਰਨ ’ਚ ਲੰਬਾ ਸਮਾਂ ਲੱਗਦਾ ਹੈ।’’

ਸਾਡੇ ਲੋਕ ਤਿਆਰ ਹਨ
ਐੱਫ. ਟੀ. ਕਿਊ. ਦੇ ਪ੍ਰਧਾਨ ਮੈਗਾਲੀ ਪਿਕਾਰਡ ਨੇ ਕਿਹਾ, ‘‘ਜੇ ਤੁਸੀਂ ਇਥੇ ਸਕੂਲੀ ਬੱਸਾਂ ਦੀ ਗਿਣਤੀ ਨੂੰ ਦੇਖਦੇ ਹੋ ਤੇ ਚਾਰਟਰਡ ਜਹਾਜ਼ਾਂ ਦੀ ਗਿਣਤੀ, ਜੋ ਅੱਜ ਸਵੇਰੇ ਅਬੀਤਿਬੀ ਤੋਂ ਰਵਾਨਾ ਹੋਏ ਹਨ, ਸਾਡੇ ਲੋਕ ਤਿਆਰ ਹਨ ਕਿਉਂਕਿ ਉਨ੍ਹਾਂ ਕੋਲ ਗੁਆਉਣ ਲਈ ਕੁਝ ਨਹੀਂ ਬਚਿਆ ਹੈ।’’ ਸੀ. ਆਈ. ਯੂ. ਐੱਸ. ਐੱਸ. ਐੱਸ. ਡੁ ਸਗੁਏਨੇ-ਲਾਕ-ਸੇਂਟ-ਜੀਨ ਵਿਖੇ ਕੰਮ ਕਰਨ ਵਾਲੇ ਐਂਡਰੀ ਮੋਰਿਨ ਨੇ ਕਿਹਾ, ‘‘ਇਹ ਸਾਡੀਆਂ ਕੰਮਕਾਜੀ ਹਾਲਤਾਂ ਤੇ ਸਾਡੇ ਤੋਂ ਬਾਅਦ ਆਏ ਲੋਕਾਂ ਦੀਆਂ ਸਥਿਤੀਆਂ ਲਈ ਹੈ। ਅਸੀਂ ਵਾਪਸ ਨਹੀਂ ਜਾ ਸਕਦੇ, ਸਾਨੂੰ ਅੱਗੇ ਵਧਦੇ ਰਹਿਣਾ ਚਾਹੀਦਾ ਹੈ।’’

ਜੋਲੀਅਟ-ਏਰੀਆ ਦੇ ਇਕ ਸਕੂਲ ਦੀ ਸਕੱਤਰ ਜੋਨੀ ਸੇਂਟ-ਜਾਰਜ ਨੇ ਕਿਹਾ ਕਿ ਉਹ ਆਪਣੇ ਦੋ ਅਨੁਭਵੀ ਸਾਥੀਆਂ ਤੋਂ ਪ੍ਰੇਰਿਤ ਸੀ, ਜਿਨ੍ਹਾਂ ਨਾਲ ਉਸ ਨੇ ਮਾਰਚ ਕੀਤਾ ਸੀ। ਉਸ ਨੇ ਕਿਹਾ, “ਮੈਂ ਅਗਲੀ ਪੀੜ੍ਹੀ ਹਾਂ।” ਇਥੇ ਮੈਨਪਾਵਰ ਦੀ ਕਮੀ ਹੈ ਤੇ ਅਸੀਂ ਆਪਣੇ ਵਧੀਆ ਲੋਕਾਂ ਨੂੰ ਨੌਕਰੀ ’ਤੇ ਨਹੀਂ ਰੱਖ ਸਕਦੇ। ਜੇ ਅਸੀਂ ਚਾਹੁੰਦੇ ਹਾਂ ਕਿ ਚੀਜ਼ਾਂ ਕੰਮ ਕਰਨ ਤਾਂ ਸਾਨੂੰ ਮਜ਼ਦੂਰੀ ਚਾਹੀਦੀ ਹੈ, ਜੋ ਲੋਕਾਂ ਨੂੰ ਆਕਰਸ਼ਿਤ ਕਰਦੇ ਹਨ ਤੇ ਉਨ੍ਹਾਂ ਨੂੰ ਕੰਮ ’ਚ ਰੱਖਦੇ ਹਨ।

ਪੈਟਰੀਸੀਆ ਗੌਥੀਅਰ-ਗ੍ਰੇਗੋਇਰ, ਜੋ ਇਕ ਪੁਨਰਵਾਸ ਕੇਂਦਰ ’ਚ ਸਰੀਰਕ ਤੌਰ ’ਤੇ ਅਪਾਹਜ ਲੋਕਾਂ ਨਾਲ ਕੰਮ ਕਰਦੀ ਹੈ, ਨੇ ਇਹ ਵੀ ਕਿਹਾ ਕਿ ਉਹ ਆਪਣੇ ਖੇਤਰ ’ਚ ਕੰਮ ਕਰਨ ਦੀਆਂ ਸਥਿਤੀਆਂ ਬਾਰੇ ਚਿੰਤਤ ਸੀ। ਉਸ ਨੇ ਕਿਹਾ, ‘‘ਇਹ ਉਹ ਲੋਕ ਹਨ, ਜਿਨ੍ਹਾਂ ਕੋਲ ਉੱਚ ਸਿੱਖਿਆ ਹੈ ਤੇ ਜੋ ਹਰ ਸਾਲ ਖਰੀਦ ਸ਼ਕਤੀ ਗੁਆ ਦਿੰਦੇ ਹਨ। ਅਸੀਂ ਕਾਮਿਆਂ ਨੂੰ ਗੁਆ ਰਹੇ ਹਾਂ... ਜੋ ਨੌਕਰੀਆਂ ਲੈਣਗੇ, ਜਿਥੇ ਤਨਖ਼ਾਹ ਤੇ ਹਾਲਾਤ ਬਿਹਤਰ ਹੋਣਗੇ।’’

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਸਾਂਝੀ ਕਰੋ।