ਖਲਨਾਇਕ ਆਸ਼ੀਸ਼ ਵਿਦਿਆਰਥੀ ਦੇ ਵਿਆਹ ਦੀਆਂ ਅਣਦੇਖੀਆਂ ਤਸਵੀਰਾਂ ਆਈਆਂ ਸਾਹਮਣੇ

ਮੁੰਬਈ (ਬਿਊਰੋ) : ਬੀਤੇ ਕੁਝ ਦਿਨ ਪਹਿਲਾ ਬਾਲੀਵੁੱਡ ਦੇ ਚਹੇਤੇ ਖਲਨਾਇਕ ਆਸ਼ੀਸ਼ ਵਿਦਿਆਰਥੀ ਨੇ 60 ਸਾਲ ਦੀ ਉਮਰ 'ਚ ਰੂਪਾਲੀ ਬਰੂਆ ਨਾਲ ਵਿਆਹ ਕਰਵਾ ਲਿਆ ਸੀ। ਆਸ਼ੀਸ਼ ਨੇ ਵੀਰਵਾਰ ਨੂੰ ਰੂਪਾਲੀ ਨਾਲ ਰਜਿਸਟਰਡ ਵਿਆਹ ਕਰਵਾਇਆ ਸੀ, ਜਿਸ ਦੀਆਂ ਤਸਵੀਰਾਂ ਹੁਣ ਸੋਸ਼ਲ ਮੀਡੀਆ 'ਤੇ ਕਾਫ਼ੀ ਵਾਇਰਲ ਹੋ ਰਹੀਆਂ ਹਨ।

ਇਨ੍ਹਾਂ ਤਸਵੀਰਾਂ 'ਚ ਆਸ਼ੀਸ਼ ਤੇ ਰੂਪਾਲੀ ਵਿਆਹ ਦੀਆਂ ਰਸਮਾਂ ਨਿਭਾਉਂਦੇ ਹੋਏ ਵੀ ਨਜ਼ਰ ਆ ਰਹੇ ਹਨ। ਬੀਤੇ ਵੀਰਵਾਰ ਨੂੰ ਕੋਲਕਾਤਾ 'ਚ ਹੋਏ ਇਸ ਵਿਆਹ 'ਚ ਸਿਰਫ਼ ਉਨ੍ਹਾਂ ਦੇ ਪਰਿਵਾਰ ਅਤੇ ਕਰੀਬੀ ਦੋਸਤ ਸ਼ਾਮਲ ਹੋਏ ਹਨ। ਜਾਣਕਾਰੀ ਮੁਤਾਬਕ, ਵਿਆਹ ਤੋਂ ਬਾਅਦ ਹੁਣ ਇਹ ਜੋੜਾ ਦੋਸਤਾਂ ਅਤੇ ਰਿਸ਼ਤੇਦਾਰਾਂ ਲਈ ਰਿਸੈਪਸ਼ਨ ਪਾਰਟੀ ਰੱਖੇਗਾ।

ਆਸ਼ੀਸ਼ ਦੀ ਦੁਲਹਨ ਦੀ ਗੱਲ ਕਰੀਏ ਤਾਂ ਉਹ ਆਸਾਮ ਦੀ ਫੈਸ਼ਨ ਇੰਡਸਟਰੀ ਨਾਲ ਜੁੜੀ ਹੋਈ ਹੈ। ਜਾਣਕਾਰੀ ਮੁਤਾਬਕ ਗੁਹਾਟੀ ਦੀ ਰਹਿਣ ਵਾਲੀ ਰੂਪਾਲੀ ਕੋਲਕਾਤਾ 'ਚ ਇਕ ਫੈਸ਼ਨ ਸਟੋਰ ਦੀ ਮਾਲਕ ਹੈ। ਰੂਪਾਲੀ ਤੋਂ ਪਹਿਲਾਂ ਆਸ਼ੀਸ਼ ਦਾ ਵਿਆਹ ਅਭਿਨੇਤਰੀ ਰਾਜੋਸ਼ੀ ਵਿਦਿਆਰਥੀ ਨਾਲ ਹੋਇਆ ਸੀ। ਰਾਜੋਸ਼ੀ ਇੱਕ ਮਸ਼ਹੂਰ ਅਦਾਕਾਰਾ, ਗਾਇਕਾ ਅਤੇ ਥੀਏਟਰ ਕਲਾਕਾਰ ਹੈ।

ਦੱਸ ਦਈਏ ਕਿ ਇਹ ਆਸ਼ੀਸ਼ ਦਾ ਦੂਜਾ ਵਿਆਹ ਹੈ। ਆਪਣੇ ਵਿਆਹ ਦੇ ਮੌਕੇ 'ਤੇ ਆਸ਼ੀਸ਼ ਨੇ ਆਖਿਆ ਸੀ, ''ਜ਼ਿੰਦਗੀ ਦੇ ਇਸ ਪੜਾਅ 'ਤੇ, ਰੂਪਾਲੀ ਨਾਲ ਵਿਆਹ ਕਰਨਾ ਇਕ ਅਸਾਧਾਰਨ ਅਹਿਸਾਸ ਹੈ।'' ਆਸ਼ੀਸ਼ ਨੇ 11 ਤੋਂ ਜ਼ਿਆਦਾ ਭਾਸ਼ਾਵਾਂ 'ਚ ਫ਼ਿਲਮਾਂ 'ਚ ਕੰਮ ਕੀਤਾ ਹੈ। ਉਹ ਸਾਲਾਂ ਤੋਂ ਫ਼ਿਲਮੀ ਦੁਨੀਆ ਦਾ ਹਿੱਸਾ ਹੈ।

ਆਸ਼ੀਸ਼ ਦੀ ਗੱਲ ਕਰੀਏ ਤਾਂ ਉਹ ਹਿੰਦੀ ਸਿਨੇਮਾ ਸਮੇਤ 11 ਭਾਸ਼ਾਵਾਂ ਦੀਆਂ 200 ਤੋਂ ਵੱਧ ਫ਼ਿਲਮਾਂ 'ਚ ਨਜ਼ਰ ਆ ਚੁੱਕੇ ਹਨ। ਉਹ ਤਾਮਿਲ, ਕੰਨੜ, ਮਲਿਆਲਮ, ਅੰਗਰੇਜ਼ੀ ਭਾਸ਼ਾ ਦੀਆਂ ਫ਼ਿਲਮਾਂ 'ਚ ਨਜ਼ਰ ਆ ਚੁੱਕੀ ਹੈ। ਆਸ਼ੀਸ਼ ਵਿਦਿਆਰਥੀ 'ਬਿੱਕੂ', 'ਜ਼ਿੱਦੀ', 'ਅਰਜੁਨ ਪੰਡਿਤ', 'ਵਾਸਤਵ', 'ਬਾਦਲ' ਵਰਗੀਆਂ ਕਈ ਫ਼ਿਲਮਾਂ 'ਚ ਨੈਗੇਟਿਵ ਰੋਲ 'ਚ ਨਜ਼ਰ ਆ ਚੁੱਕੇ ਹਨ।