ਆਟੋ ਸੈਕਟਰ ਨੂੰ ਤੁਰੰਤ ਚਾਹੀਦੀ ਹੈ ਨੀਤੀਗਤ ਫੈਸਲਿਆਂ ਦੀ ਡੋਜ਼, ਤਿਉਹਾਰੀ ਸੀਜ਼ਨ ''ਚ ਰਿਕਵਰੀ ਦੀ ਆਸ

ਮੁੰਬਈ — ਵਾਹਨ ਉਦਯੋਗ ਸੰਗਠਨ 'ਸਯਾਮ(SIAM)' ਨੇ ਸੋਮਵਾਰ ਨੂੰ ਸਰਕਾਰ ਨੂੰ ਤੁਰੰਤ ਕਦਮ ਚੁੱਕਣ ਦੀ ਮੰਗ ਕੀਤੀ ਹੈ ਜਿਨ੍ਹਾਂ 'ਚ ਜੀਐਸਟੀ ਦੀਆਂ ਦਰਾਂ 'ਚ ਕਟੌਤੀ ਅਤੇ ਸਕਰੈਪੇਜ ਨੀਤੀ ਦੀ ਸ਼ੁਰੂਆਤ ਵੀ ਸ਼ਾਮਲ ਹੈ ਕਿਉਂਕਿ ਯਾਤਰੀ ਵਾਹਨ ਦੀ ਵਿਕਰੀ ਅਗਸਤ 'ਚ 30% ਘਟ ਰਹੀ। ਸੁਸਾਇਟੀ ਆਫ ਇੰਡੀਅਨ ਆਟੋਮੋਬਾਈਲ ਮੈਨੂਫੈਕਚਰਰਜ਼ (ਸਿਆਮ) ਨੇ ਕਿਹਾ ਕਿ ਵਪਾਰਕ ਵਾਹਨ ਅਤੇ ਦੋ ਪਹੀਆ ਵਾਹਨਾਂ ਦੀ ਵਿਕਰੀ ਵੀ ਕਾਫ਼ੀ ਨਕਾਰਾਤਮਕ ਹੈ ਜੋ ਦੱਸਦੀ ਹੈ ਕਿ ਪਿਛਲੇ ਮਹੀਨੇ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਦੁਆਰਾ ਸ਼ੁਰੂ ਕੀਤੇ ਗਏ ਵੱਖ-ਵੱਖ ਉਪਾਵਾਂ ਦੇ ਤਹਿਤ ਬਾਜ਼ਾਰ 'ਚ ਅਜੇ ਤੱਕ ਕੋਈ ਸੁਧਾਰ ਜਾਂ ਪ੍ਰਤੀਕ੍ਰਿਆ ਨਹੀਂ ਦੇਖੀ ਗਈ ਹੈ। 

“ਇਸ ਸਭ ਦੇ ਬਾਵਜੂਦ, ਉਦਯੋਗ ਨੇ ਖਪਤਕਾਰਾਂ ਨੂੰ ਆਕਰਸ਼ਕ ਸੌਦੇ ਅਤੇ ਛੋਟ ਦੀ ਪੇਸ਼ਕਸ਼ ਨਾਲ ਬਹੁਤ ਸਾਰੀਆਂ ਰੁਕਾਵਟਾਂ ਨੂੰ ਬਾਹਰ ਕੱਢ ਲਿਆ ਹੈ। ਹਾਲਾਂਕਿ, ਉਦਯੋਗ ਦੀ ਵੱਡੀ ਛੋਟ ਦੇਣ ਦੀ ਸਮਰੱਥਾ ਸੀਮਤ ਹੈ ਅਤੇ ਇਹ ਹੁਣ ਸਰਕਾਰ ਨੂੰ ਜੀ.ਐਸ.ਟੀ. ਦੀਆਂ ਦਰਾਂ ਘਟਾਉਣ ਬਾਰੇ ਵਿਚਾਰ ਕਰਨ ਦੀ ਜ਼ਰੂਰਤ ਨੂੰ ਉਜਾਗਰ ਕਰਦੀ ਹੈ। ਸਿਆਮ ਦੇ ਪ੍ਰਧਾਨ ਰਾਜਨ ਵਡੇਰਾ ਨੇ ਇਕ ਬਿਆਨ ਵਿਚ ਕਿਹਾ, 'ਜੀ.ਐਸ.ਟੀ. ਦੀ ਦਰ 28% ਤੋਂ 18% ਕਰਨ ਨਾਲ ਵਾਹਨਾਂ ਦੀ ਕੀਮਤ 'ਚ ਮਹੱਤਵਪੂਰਨ ਕਮੀ ਆਵੇਗੀ ਅਤੇ ਇਸ ਦੇ ਬਦਲੇ ਵਿਚ ਮੰਗ 'ਚ ਵੀ ਚੰਗਾ ਵਾਧਾ ਹੋਵੇਗਾ। '

ਵਡੇਰਾ ਨੇ ਕਿਹਾ, ”ਤਿਉਹਾਰਾਂ ਦਾ ਮੌਸਮ ਜਲਦੀ ਹੀ ਆਉਣ ਵਾਲਾ ਹੈ ਅਤੇ ਇਹ ਹੋਰ ਵੀ ਜ਼ਰੂਰੀ ਹੋ ਜਾਂਦਾ ਹੈ ਕਿ ਇਹ ਫੈਸਲੇ ਜਲਦੀ ਲਏ ਜਾਣ ਅਤੇ ਬਿਨਾਂ ਦੇਰ ਕੀਤੇ ਆਟੋ ਸੈਕਟਰ ਦੀ ਮੰਦੀ ਦੂਰ ਕਰਨ ਲਈ ਐਲਾਨ ਕੀਤੇ ਜਾਣ ਤਾਂ ਜੋ ਉਦਯੋਗ ਇਕ ਵਧੀਆ ਤਿਉਹਾਰੀ ਸੀਜ਼ਨ ਦੀ ਉਮੀਦ ਕਰ ਸਕੇ ਅਤੇ ਉਦਯੋਗ ਪਿਛਲੇ ਘਾਟੇ ਦੀ ਰਿਕਵਰੀ ਕਰ ਸਕੇ।'

ਐਤਵਾਰ ਨੂੰ ਮਾਰੂਤੀ ਸੁਜ਼ੂਕੀ ਇੰਡੀਆ, ਹੁੰਡਈ, ਮਹਿੰਦਰਾ ਅਤੇ ਮਹਿੰਦਰਾ, ਟਾਟਾ ਮੋਟਰਜ਼ ਅਤੇ ਹੌਂਡਾ ਵਰਗੀਆਂ ਵੱਡੀਆਂ ਕੰਪਨੀਆਂ ਨੇ ਅਗਸਤ ਵਿਚ ਆਪਣੀ ਵਿਕਰੀ ਵਿਚ ਦੋਹਰੇ ਅੰਕ ਦੀ ਗਿਰਾਵਟ ਦੀ ਰਿਪੋਰਟ ਦਿੱਤੀ ਹੈ।

ਸਮੀਖਿਆ ਅਧੀਨ ਅਗਸਤ ਮਹੀਨੇ ਦੌਰਾਨ ਮਾਰੂਤੀ ਦੇ ਵਾਹਨਾਂ ਦੀ ਵਿਕਰੀ ਵਿਚ 33% ਦੀ ਗਿਰਾਵਟ ਯਾਨੀ ਕਿ 1,06,413 ਇਕਾਈ ਰਹੀ, ਟਾਟਾ ਮੋਟਰਜ਼ ਦੁਆਰਾ ਯਾਤਰੀ ਵਾਹਨਾਂ ਦੀ ਵਿਕਰੀ 58% ਘੱਟ ਰਹੀ।
ਇਸੇ ਤਰ੍ਹਾਂ ਹੌਂਡਾ ਕਾਰਜ਼ ਇੰਡੀਆ ਅਤੇ ਟੋਯੋਟਾ ਕਿਰਲੋਸਕਰ ਮੋਟਰ (ਟੀਕੇਐਮ) ਦੀ ਵਿਕਰੀ 'ਚ ਕ੍ਰਮਵਾਰ 51% ਅਤੇ 21% ਦੀ ਗਿਰਾਵਟ ਆਈ ਹੈ।

ਇਸੇ ਤਰ੍ਹਾਂ ਮਹਿੰਦਰਾ ਐਂਡ ਮਹਿੰਦਰਾ (ਐਮ ਐਂਡ ਐਮ) ਦੀ ਘਰੇਲੂ ਵਿਕਰੀ ਪਿਛਲੇ ਮਹੀਨੇ 26 ਫੀਸਦੀ ਘੱਟ ਕੇ 33,564 ਇਕਾਈ ਹੋ ਗਈ, ਜਦੋਂਕਿ ਅਗਸਤ 2018 ਵਿਚ ਇਹ 45,373 ਇਕਾਈ ਸੀ।

23 ਅਗਸਤ ਨੂੰ ਸੀਤਾਰਮਨ ਨੇ ਨਿਵੇਸ਼ਕਾਂ ਨੂੰ ਉਤਸ਼ਾਹਿਤ ਕਰਨ ਅਤੇ ਬੈਂਕਿੰਗ ਤੇ ਆਟੋ ਸੈਕਟਰ ਨੂੰ ਅੱਗੇ ਵਧਾਉਣ ਦੇ ਕਈ ਉਪਾਵਾਂ ਦਾ ਐਲਾਨ ਕੀਤਾ ਸੀ।