ਯੂਕੀ ਭਾਂਬਰੀ ਭਾਰਤ-ਕੋਰੀਆ ਡੇਵਿਸ ਕੱਪ ਮੁਕਾਬਲੇ ਤੋਂ ਬਾਹਰ

ਸਪੋਰਟਸ ਡੈਸਕ- ਸਿਓਲ ਵਿੱਚ ਦੱਖਣੀ ਕੋਰੀਆ ਵਿਰੁੱਧ ਹੋਣ ਵਾਲੇ ਡੇਵਿਸ ਕੱਪ ਕੁਆਲੀਫਾਇਰ ਮੁਕਾਬਲੇ ਤੋਂ ਪਹਿਲਾਂ ਭਾਰਤੀ ਟੀਮ ਨੂੰ ਵੱਡਾ ਝਟਕਾ ਲੱਗਾ ਹੈ, ਕਿਉਂਕਿ ਟੀਮ ਦੇ ਅਹਿਮ ਡਬਲਜ਼ ਖਿਡਾਰੀ ਯੂਕੀ ਭਾਂਬਰੀ ਰਾਨ ਦੀ ਸੱਟ ਕਾਰਨ ਇਸ ਮੈਚ ਤੋਂ ਬਾਹਰ ਹੋ ਗਏ ਹਨ। ਭਾਰਤੀ ਕਪਤਾਨ ਰੋਹਿਤ ਰਾਜਪਾਲ ਨੇ ਪੁਸ਼ਟੀ ਕੀਤੀ ਕਿ ਅਮਰੀਕੀ ਓਪਨ ਦੇ ਮੁੱਖ ਡਰਾਅ ਤੋਂ ਪਹਿਲਾਂ ਯੂਕੀ ਦੀ ਸੱਜੇ ਪੱਟ ਵਿੱਚ ਖਿੱਚ ਆ ਗਈ ਸੀ, ਜਿਸ ਕਾਰਨ ਉਹ ਖੇਡਣ ਲਈ ਉਪਲਬਧ ਨਹੀਂ ਹਨ। ਯੂਕੀ ਦੇ ਬਾਹਰ ਹੋਣ ਨਾਲ ਭਾਰਤ ਦੀ ਡਬਲਜ਼ ਯੋਜਨਾ ਪ੍ਰਭਾਵਿਤ ਹੋਈ ਹੈ, ਕਿਉਂਕਿ ਰਾਜਪਾਲ ਨੇ ਪਹਿਲਾਂ ਉਨ੍ਹਾਂ ਨੂੰ ਦਕਸ਼ਿਨੇਸ਼ਵਰ ਸੁਰੇਸ਼ ਨਾਲ ਜੋੜੀ ਵਜੋਂ ਚੁਣਿਆ ਸੀ, ਜਿਸ ਜੋੜੀ ਨੇ ਨੀਦਰਲੈਂਡ ਵਿਰੁੱਧ ਬੈਂਗਲੁਰੂ ਵਿੱਚ ਬਹੁਤ ਵਧੀਆ ਪ੍ਰਦਰਸ਼ਨ ਕੀਤਾ ਸੀ।

ਯੂਕੀ ਦੀ ਗੈਰ-ਹਾਜ਼ਰੀ ਤੋਂ ਬਾਅਦ ਹੁਣ ਤਜਰਬੇਕਾਰ ਐਨ. ਸ਼੍ਰੀਰਾਮ ਬਾਲਾਜੀ ਭਾਰਤ ਲਈ ਡਬਲਜ਼ ਵਿੱਚ ਮੁੱਖ ਵਿਕਲਪ ਵਜੋਂ ਉੱਭਰੇ ਹਨ, ਜੋ ਹਾਲ ਹੀ ਵਿੱਚ ਵਿਸ਼ਵ ਦੇ ਚੋਟੀ ਦੇ 50 ਡਬਲਜ਼ ਖਿਡਾਰੀਆਂ ਵਿੱਚ ਸ਼ਾਮਲ ਹੋਏ ਹਨ। ਇਸ ਤੋਂ ਇਲਾਵਾ, ਨਿਕੀ ਪੂਨਾਚਾ ਨੂੰ ਅਜੇ ਤੱਕ ਵੀਜ਼ਾ ਨਹੀਂ ਮਿਲਿਆ ਹੈ, ਜਦਕਿ ਅਨਿਰੁੱਧ ਚੰਦਰਸ਼ੇਖਰ ਨਿਊਯਾਰਕ ਤੋਂ ਪਹੁੰਚ ਗਏ ਹਨ। ਕਪਤਾਨ ਰਾਜਪਾਲ ਅਨੁਸਾਰ ਸਿਓਲ ਵਿੱਚ ਕੋਰਟ ਧੀਮੇ ਹਨ, ਇਸ ਲਈ ਪਹਿਲੇ ਦਿਨ ਦੇ ਸਿੰਗਲਜ਼ ਮੈਚਾਂ ਦੇ ਨਤੀਜਿਆਂ ਅਤੇ ਦਕਸ਼ਿਨੇਸ਼ਵਰ ਦੀ ਫਿਟਨੈਸ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਹੀ ਡਬਲਜ਼ ਦੀ ਅੰਤਿਮ ਜੋੜੀ ਦਾ ਫੈਸਲਾ ਕੀਤਾ ਜਾਵੇਗਾ।