ਖੇਡ ਮੰਤਰੀ ਨੇ ਭਾਰਤ ਵਿੱਚ ਐਫ-1 ਦੀ ਵਾਪਸੀ ਲਈ ਬਣਾਈ ਟਾਸਕ ਫੋਰਸ

ਨਵੀਂ ਦਿੱਲੀ : ਖੇਡ ਮੰਤਰੀ ਮਨਸੁਖ ਮਾਂਡਵੀਆ ਨੇ ਭਾਰਤ ਵਿੱਚ ਫਾਰਮੂਲਾ ਵਨ (F1) ਰੇਸ ਦੀ ਵਾਪਸੀ ਦੀਆਂ ਚੁਣੌਤੀਆਂ ਦੀ ਸਮੀਖਿਆ ਲਈ ਨੀਤੀ ਆਯੋਗ ਦੇ ਪ੍ਰੋਗਰਾਮ ਡਾਇਰੈਕਟਰ ਅਤੇ ਸਲਾਹਕਾਰ ਯੁਗਲ ਕਿਸ਼ੋਰ ਜੋਸ਼ੀ ਦੀ ਪ੍ਰਧਾਨਗੀ ਹੇਠ 10-ਮੈਂਬਰੀ ਟਾਸਕ ਫੋਰਸ ਦਾ ਗਠਨ ਕੀਤਾ ਹੈ। ਇਸ ਕਮੇਟੀ ਵਿੱਚ ਖੇਡ ਮੰਤਰਾਲੇ ਦੇ ਸੰਯੁਕਤ ਸਕੱਤਰ ਕੁਣਾਲ, FMSCI ਦੇ ਪ੍ਰਧਾਨ ਅਰਿੰਦਮ ਘੋਸ਼ ਤੋਂ ਇਲਾਵਾ ਵਪਾਰ, ਸੈਰ-ਸਪਾਟਾ, ਮਾਲ ਵਿਭਾਗ, ਉੱਤਰ ਪ੍ਰਦੇਸ਼ ਤੇ ਮਹਾਰਾਸ਼ਟਰ ਸਰਕਾਰਾਂ, ਬੁੱਧ ਅਤੇ ਮਦਰਾਸ ਇੰਟਰਨੈਸ਼ਨਲ ਸਰਕਟ ਦੇ ਨੁਮਾਇੰਦੇ ਅਤੇ ਤਕਨੀਕੀ ਮਾਹਰ ਸ਼ਾਮਲ ਹਨ।

ਇਸ ਟਾਸਕ ਫੋਰਸ ਦਾ ਮੁੱਖ ਮਕਸਦ ਭਾਰਤ ਵਿੱਚ ਮੋਟਰਸਪੋਰਟ ਦੇ ਵਿਕਾਸ ਲਈ ਇੱਕ ਮਜ਼ਬੂਤ ਰੋਡਮੈਪ ਤਿਆਰ ਕਰਨਾ ਹੈ ਤਾਂ ਜੋ ਸਾਲ 2028 ਵਿੱਚ ਫਾਰਮੂਲਾ ਵਨ ਦੀ ਮੇਜ਼ਬਾਨੀ ਕੀਤੀ ਜਾ ਸਕੇ। ਇਹ ਕਮੇਟੀ ਟੈਕਸਾਂ ਨਾਲ ਜੁੜੀਆਂ ਸਮੱਸਿਆਵਾਂ ਦਾ ਮੁਲਾਂਕਣ ਕਰੇਗੀ ਅਤੇ ਪਬਲਿਕ-ਪ੍ਰਾਈਵੇਟ ਪਾਰਟਨਰਸ਼ਿਪ (PPP) ਮਾਡਲ ਅਧਾਰਿਤ ਨੀਤੀਆਂ ਲਈ ਸੁਝਾਅ ਦੇਵੇਗੀ। ਜ਼ਿਕਰਯੋਗ ਹੈ ਕਿ ਭਾਰਤ ਵਿੱਚ ਆਖਰੀ ਵਾਰ 2013 ਵਿੱਚ F1 ਰੇਸ ਹੋਈ ਸੀ, ਜਿਸ ਤੋਂ ਬਾਅਦ ਸਰਕਾਰੀ ਪ੍ਰਕਿਰਿਆਵਾਂ ਅਤੇ ਟੈਕਸ ਮੁੱਦਿਆਂ ਕਾਰਨ ਇਸ ਦਾ ਆਯੋਜਨ ਬੰਦ ਹੋ ਗਿਆ ਸੀ।