ਪਾਰਟਨਰ ਨਾਲ ਰੋਮਾਂਟਿਕ ਸਮਾਂ ਬਿਤਾਉਣਾ ਕਿਸੇ ਵੀ ਗੋਲ ਤੋਂ ਚੰਗਾ : ਰੋਨਾਲਡੋ

ਨਵੀਂ ਦਿੱਲੀ - ਯੁਵੈਂਟਸ ਸਟਾਰ ਕ੍ਰਿਸਟੀਆਨੋ ਰੋਨਾਲਡੋ ਦਾ ਕਹਿਣਾ ਹੈ ਕਿ ਉਹ ਜਦੋਂ ਆਪਣੀ ਪਾਰਟਨਰ ਜਾਰਜੀਆ ਰੋਡ੍ਰਿਗਜ਼ ਨਾਲ ਹੁੰਦਾ ਹੈ ਤਾਂ ਉਹ ਸਮਾਂ ਉਸ ਦਾ ਸਭ ਤੋਂ ਸ਼ਾਨਦਾਰ ਹੁੰਦਾ ਹੈ। ਰੋਨਾਲਡੋ ਨੇ ਕਿਹਾ ਕਿ ਜਾਰਜੀਆ ਨਾਲ ਰੋਮਾਂਟਿਕ ਹੋਣਾ ਉਸ ਲਈ ਕਿਸੇ ਵੀ ਗੋਲ ਤੋਂ ਵਧੀਆ ਹੁੰਦਾ ਹੈ। ਅਸਲ ਵਿਚ ਐਂਕਰ ਨੇ ਰੋਨਾਲਡੋ ਕੋਲੋਂ ਪੁੱਛਿਆ ਸੀ ਕਿ ਕੀ ਉਸ ਨੂੰ ਲੱਗਦਾ ਹੈ ਕਿ ਜਾਰਜੀਆ ਦਾ ਸਾਥ ਪਾਉਣਾ ਉਸ ਦੇ ਕਰੀਅਰ ਦਾ ਸਭ ਤੋਂ ਸ਼ਾਨਦਾਰ ਗੋਲ ਹੈ। ਇਸ 'ਤੇ ਰੋਨਾਲਡੋ ਨੇ ਕਿਹਾ-ਮੈਂ ਇਹ ਗੋਲ ਕਈ ਸਾਲਾਂ ਤੋਂ ਕਰ ਰਿਹਾ ਹਾਂ। ਮੈਂ 700 ਤੋਂ ਜ਼ਿਆਦਾ ਗੋਲ ਕੀਤੇ ਪਰ ਇਸ ਤੋਂ ਵਧੀਆ ਕੋਈ ਨਹੀਂ।
ਉਥੇ ਹੀ ਜਾਰਜੀਆ ਨਾਲ ਵਿਆਹ ਕਰਨ ਸਬੰਧੀ ਪੁਰਤਗਾਲ ਦੇ ਇਸ ਸਟਾਰ ਫੁੱਟਬਾਲਰ ਨੇ ਕਿਹਾ ਕਿ ਉਹ ਇਕ ਦਿਨ ਇਸ ਦੇ ਲਈ ਜ਼ਰੂਰ ਤਿਆਰ ਹੋਵੇਗਾ ਕਿਉਂਕਿ ਉਸ ਦੀ ਮਾਂ ਦੀ ਇਹ ਦਿਲੀ ਖਾਹਿਸ਼ ਹੈ। ਉਥੇ ਹੀ ਪ੍ਰੋਗਰਾਮ ਦੌਰਾਨ ਉਸ ਨੇ ਜਾਰਜੀਆ ਨਾਲ ਆਪਣੀ ਬਾਂਡਿੰਗ 'ਤੇ ਗੱਲ ਕੀਤੀ। ਉਸ ਨੇ ਕਿਹਾ ਕਿ ਉਹ ਮੇਰੀ ਵਧੀਆ ਦੋਸਤ ਹੈ। ਅਸੀਂ ਲਗਾਤਾਰ ਗੱਲ ਕਰਦੇ ਰਹਿੰਦੇ ਹਾਂ। ਉਹ ਮੇਰੇ ਨਾਲ ਖੁੱਲ੍ਹੇ ਦਿਲ ਨਾਲ ਗੱਲ ਕਰਦੀ ਹੈ, ਜਦਕਿ ਮੈਂ ਉਸ ਨਾਲ। ਸਾਡੇ ਵਿਚਾਲੇ ਸਭ ਕੁਝ ਸਹੀ ਹੈ, ਇਸੇ ਕਾਰਨ ਸਾਡਾ ਰਿਸ਼ਤਾ ਮਜ਼ਬੂਤ ਹੈ।

ਦੱਸ ਦੇਈਏ ਕਿ ਜਾਰਜੀਆ ਨਾਲ ਰੋਨਾਲਡੋ ਦੀ ਪਹਿਲੀ ਮੁਲਾਕਾਤ ਇਕ ਸ਼ਾਪ ਵਿਚ ਹੋਈ ਸੀ। ਜਾਰਜੀਆ ਉਥੇ ਸੇਲਜ਼ ਅਸਿਸਟੈਂਟ ਸੀ। ਦੋਵਾਂ ਵਿਚਾਲੇ ਗੱਲਬਾਤ ਸ਼ੁਰੂ ਹੋਈ ਤਾਂ ਕੁਝ ਹੀ ਦਿਨਾਂ ਬਾਅਦ ਉਹ ਇਕ-ਦੂਸਰੇ ਨੂੰ ਡੇਟ ਕਰਨ ਲੱਗੇ। ਰੋਨਾਲਡੋ ਨੇ ਜਾਰਜੀਆ ਨਾਲ ਆਪਣੀ ਪਹਿਲੀ ਮੁਲਾਕਾਤ ਸਬੰਧੀ ਇਕ ਟੀ. ਵੀ. ਸ਼ੋਅ ਵਿਚ ਕਿਹਾ ਸੀ ਕਿ ਸਾਨੂੰ ਦੋਵਾਂ ਨੂੰ ਪਹਿਲੀ ਨਜ਼ਰ ਵਿਚ ਪਿਆਰ ਹੋਇਆ ਸੀ। ਉਹ ਬੇਹੱਦ ਸ਼ਾਂਤ ਮਾਹੌਲ ਸੀ, ਜਿਸ ਨੇ ਸਾਨੂੰ ਦੱਸ ਦਿੱਤਾ ਕਿ ਅਸੀਂ ਭਵਿੱਖ ਵਿਚ ਇਕੱਠਿਆਂ ਕਿੰਨਾ ਸਮਾਂ ਬਿਤਾ ਸਕਦੇ ਹਾਂ।