IPL 2018 : ਧੋਨੀ ਦੀ CSK ''ਚ ਵਾਪਸੀ ਤੈਅ, ਇੰਨੇ ਖਿਡਾਰੀਆਂ ਨੂੰ ਰਿਟੇਨ ਰੱਖ ਸਕਣਗੀਆਂ ਟੀਮਾਂ

ਨਵੀਂ ਦਿੱਲੀ, (ਬਿਊਰੋ)— ਇੰਡੀਅਨ ਪ੍ਰੀਮੀਅਰ ਲੀਗ (ਆਈ.ਪੀ.ਐੱਲ.) ਦੀ ਫਰੈਂਚਾਈਜ਼ੀ ਟੀਮ ਚੇਨਈ ਸੁਪਰਕਿੰਗਸ (ਸੀ.ਐੱਸ.ਕੇ.) ਦੇ ਪ੍ਰਸ਼ੰਸਕਾਂ ਲਈ ਇੱਕ ਵੱਡੀ ਖੁਸ਼ਖਬਰੀ ਹੈ । ਆਈ.ਪੀ.ਐੱਲ. 2018 ਵਿੱਚ ਮਹਿੰਦਰ ਸਿੰਘ ਧੋਨੀ ਦਾ ਸੀ.ਐੱਸ.ਕੇ. ਲਈ ਖੇਡਣਾ ਹੁਣ ਤੈਅ ਮੰਨਿਆ ਜਾ ਰਿਹਾ ਹੈ । ਆਈ.ਪੀ.ਐੱਲ. ਗਵਰਨਿੰਗ ਕਾਉਂਸਿਲ ਨੇ ਬੁੱਧਵਾਰ ਨੂੰ ਸਾਫ਼ ਕੀਤਾ ਕਿ ਆਈ.ਪੀ.ਐੱਲ. ਵਲੋਂ ਦੋ ਸਾਲ ਲਈ ਬੈਨ ਹੋਈਆਂ ਟੀਮਾਂ (ਸੀ.ਐੱਸ.ਕੇ. ਅਤੇ ਰਾਜਸਥਾਨ ਰਾਇਲਸ ) ਆਪਣੇ ਉਨ੍ਹਾਂ ਖਿਡਾਰੀਆਂ ਨੂੰ ਰਿਟੇਨ ਕਰ ਸਕਦੀਆਂ ਹਨ,  ਜੋ ਉਨ੍ਹਾਂ ਦੇ ਨਾਲ 2015 ਵਿੱਚ ਸਨ । 

ਆਈ.ਪੀ.ਐੱਲ. ਦੇ 11ਵੇਂ ਸੀਜ਼ਨ ਵਿੱਚ ਹਰ ਫਰੈਂਚਾਈਜ਼ੀ ਟੀਮ ਆਪਣੇ ਵੱਧ ਤੋਂ ਵੱਧ ਪੰਜ ਖਿਡਾਰੀਆਂ ਨੂੰ ਰਿਟੇਨ ਕਰ ਸਕੇਗੀ । ਇਸਦੇ ਇਲਾਵਾ ਆਈ.ਪੀ.ਐੱਲ. ਟੀਮਾਂ ਲਈ ਅਗਲੇ ਸੀਜ਼ਨ ਤੋਂ ਤਨਖਾਹ ਬਜਟ ਨੂੰ 66 ਕਰੋੜ ਰੁਪਏ ਤੋਂ ਵਧਾ ਕੇ 80 ਕਰੋੜ ਰੁਪਏ ਕੀਤਾ ਗਿਆ ਹੈ । ਆਈ.ਪੀ.ਐੱਲ. ਗਵਰਨਿੰਗ ਕਾਉਂਸਿਲ ਨੇ ਮਹਿੰਦਰ ਸਿੰਘ ਧੋਨੀ ਲਈ ਚੇਨਈ ਸੁਪਰਕਿੰਗਸ ਵਿੱਚ ਪਰਤਣ ਦਾ ਰਸਤਾ ਸਾਫ਼ ਕਰ ਦਿੱਤਾ ਹੈ । ਧੋਨੀ ਨੇ ਆਈ.ਪੀ.ਐੱਲ. ਦੇ ਦੋ ਸੀਜ਼ਨ ਰਾਈਜ਼ਿੰਗ ਪੁਣੇ ਸੁਪਰਜਾਇੰਟ ਲਈ ਖੇਡੇ । ਇੱਕ ਸੀਜ਼ਨ ਵਿੱਚ ਉਨ੍ਹਾਂ ਨੇ ਕਪਤਾਨੀ ਕੀਤੀ ਜਦੋਂਕਿ ਕਿ ਦੂਜੇ ਸੀਜ਼ਨ ਵਿੱਚ ਉਹ ਸਟੀਵ ਸਮਿਥ  ਦੀ ਕਪਤਾਨੀ ਵਿੱਚ ਖੇਡੇ । 

2013 ਵਿੱਚ ਸਪਾਟ ਫਿਕਸਿੰਗ ਮਾਮਲੇ ਨੂੰ ਲੈ ਕੇ 2015 ਵਿੱਚ ਇਨ੍ਹਾਂ ਦੋ ਟੀਮਾਂ ਨੂੰ ਦੋ ਸਾਲ ਲਈ ਸਸਪੈਂਡ ਕਰ ਦਿੱਤਾ ਗਿਆ ਸੀ । ਇਨ੍ਹਾਂ ਦੋਨਾਂ ਦੀ ਜਗ੍ਹਾ ਰਾਈਜਿੰਗ ਪੁਣੇ ਸੁਪਰਜਾਇੰਟ ਅਤੇ ਗੁਜਰਾਤ ਲਾਇੰਸ ਨੇ ਲਈ ਸੀ । ਦੋਨਾਂ ਟੀਮਾਂ ਦੇ ਖਿਡਾਰੀਆਂ ਨੂੰ ਇਨ੍ਹਾਂ ਦੋ ਟੀਮਾਂ ਵਿੱਚ ਵੰਡ ਦਿੱਤਾ ਗਿਆ ਸੀ ।