ਸਕੁਐਸ਼ ਮਿਕਸਡ ਡਬਲਜ਼ ਕੁਆਰਟਰਫਾਈਨਲ ''ਚ ਭਾਰਤ

ਗੋਲਡ ਕੋਸਟ (ਬਿਊਰੋ)— ਭਾਰਤ ਨੇ ਰਾਸ਼ਟਰਮੰਡਲ ਖੇਡਾਂ 2018 ਵਿੱਚ ਵੀਰਵਾਰ ਨੂੰ ਸਕੁਐਸ਼ ਮੁਕਾਬਲਿਆਂ ਵਿੱਚ ਪੁਰਸ਼ ਡਬਲਜ਼ ਅਤੇ ਮਿਕਸਡ ਡਬਲਜ਼ ਦੇ ਮੁਕਾਬਲੇ ਜਿੱਤਕੇ ਕੁਆਰਟਰਫਾਈਨਲ ਵਿੱਚ ਪਰਵੇਸ਼ ਕਰ ਲਿਆ । ਪੁਰਸ਼ ਡਬਲਜ਼ ਦੇ ਪੂਲ ਐੱਫ ਵਿੱਚ ਭਾਰਤ ਦੇ ਵਿਕਰਮ ਮਲਹੋਤਰਾ ਅਤੇ ਰਮੀਤ ਟੰਡਨ ਦੀ ਜੋੜੀ ਨੂੰ ਸਿਏਰਾ ਲਿਔਨ ਦੀ ਵਿਰੋਧੀ ਜੋੜੀ ਦੇ ਖਿਲਾਫ ਵਾਕਓਵਰ ਮਿਲ ਗਿਆ ਜਿਸ ਕਰਕੇ ਉਹ 2-0 ਦੀ ਜਿੱਤ ਦੇ ਨਾਲ ਅਗਲੇ ਦੌਰ ਵਿੱਚ ਪਹੁੰਚ ਗਏ । ਜਦਕਿ ਦੂਜੇ ਪਾਸੇ ਮਿਕਸਡ ਡਬਲਜ਼ ਵਿੱਚ ਦੀਪਿਕਾ ਪੱਲੀਕਲ ਅਤੇ ਸੌਰਵ ਘੋਸ਼ਾਲ ਦੀ ਜੋੜੀ ਨੇ ਆਪਣੇ ਅੰਤਿਮ-16 ਰਾਉਂਡ ਮੁਕਾਬਲੇ ਵਿੱਚ ਮਲੇਸ਼ੀਆ ਦੇ ਆਇਫਾ ਅਜ਼ਮਾਨ ਅਤੇ ਸੰਜੇ ਸਿੰਘ ਚਲ ਦੀ ਜੋੜੀ ਨੂੰ 7-11, 11-6, 11-8 ਨਾਲ ਹਰਾਕੇ ਕੁਆਰਟਰਫਾਈਨਲ ਵਿੱਚ ਜਗ੍ਹਾ ਬਣਾ ਲਈ ।  

ਇਕ ਹੋਰ ਮਿਕਸਡ ਡਬਲਜ਼ ਮੈਚ ਵਿੱਚ ਵੀ ਜੋਸ਼ਨਾ ਚਿਨੱਪਾ ਅਤੇ ਹਰਿੰਦਰ ਪਾਲ ਸੰਧੂ ਦੀ ਜੋੜੀ ਨੇ ਇਕ ਗੇਮ ਹਾਰਨੇ ਦੇ ਬਾਵਜੂਦ 2-1 ਨਾਲ ਮੈਚ ਜਿੱਤਿਆ । ਉਨ੍ਹਾਂ ਨੇ ਨਿਊਜ਼ੀਲੈਂਡ ਦੀ ਅਮਾਂਡਾ ਲੇਂਡਰਸ ਮਰਫੀ ਅਤੇ ਜੈਕ ਮਿਲਰ ਦੀ ਜੋੜੀ ਨੂੰ 11-7, 10-11, 11-5 ਨਾਲ ਹਰਾਇਆ । ਦੀਪਿਕਾ-ਸੌਰਵ ਹੁਣ ਕੁਆਰਟਰਫਾਈਨਲ ਵਿੱਚ ਵੇਲਸ ਦੀ ਟੇਸਨੀ ਇਵਾਂਸ ਅਤੇ ਪੀਟਰ ਕਰੀਡ ਦੀ ਜੋੜੀ ਨਾਲ ਭਿੜਨਗੇ ਜਦੋਂਕਿ ਇਕ ਹੋਰ ਮੈਚ ਵਿੱਚ ਜੋਸ਼ਨਾ-ਸੰਧੂ ਦਾ ਮੁਕਾਬਲਾ ਨਿਊਜ਼ੀਲੈਂਡ ਦੀ ਜੋਏਲਾ ਕਿੰਗ ਅਤੇ ਪਾਲ ਕਾਲ ਦੀ ਜੋੜੀ ਨਾਲ ਹੋਵੇਗਾ ।