ਏਸ਼ੀਆਈ ਖੇਡਾਂ : ਗੋਲਫ਼ ''ਚ ਪ੍ਰਣਵੀ ਉਰਸ ਨੇ ਜਿੱਤਿਆ ਗੋਲਡ, ਮਹਿਲਾ ਟੀਮ ਨੂੰ ਮਿਲਿਆ ਸਿਲਵਰ

ਆਈਚੀ-ਨਾਗੋਯਾ (ਜਾਪਾਨ) : ਏਸ਼ੀਆਈ ਖੇਡਾਂ 2026 ਵਿੱਚ ਭਾਰਤ ਦੀ 23 ਸਾਲਾ ਗੋਲਫ਼ਰ ਪ੍ਰਣਵੀ ਉਰਸ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਮਹਿਲਾਵਾਂ ਦੇ ਵਿਅਕਤੀਗਤ ਸਟ੍ਰੋਕ ਪਲੇਅ ਮੁਕਾਬਲੇ ਵਿੱਚ ਸੋਨ ਤਗਮਾ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਇਸ ਦੇ ਨਾਲ ਹੀ ਪ੍ਰਣਵੀ ਉਰਸ ਏਸ਼ੀਆਈ ਖੇਡਾਂ ਦੇ ਗੋਲਫ਼ ਮੁਕਾਬਲੇ ਵਿੱਚ ਚੈਂਪੀਅਨ ਬਣਨ ਅਤੇ ਸੋਨ ਤਗਮਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਖਿਡਾਰਨ ਬਣ ਗਈ ਹੈ। ਪ੍ਰਣਵੀ ਨੇ 18ਵੇਂ ਹੋਲ 'ਤੇ 'ਪਾਰ' ਸਕੋਰ ਨਾਲ ਸੰਜਮ ਬਣਾਏ ਰੱਖਿਆ ਅਤੇ 15-ਅੰਡਰ 265 ਦੇ ਕੁੱਲ ਸਕੋਰ ਨਾਲ ਟੂਰਨਾਮੈਂਟ ਖ਼ਤਮ ਕੀਤਾ। ਉਹ ਸਿੰਗਾਪੁਰ ਦੀ ਸ਼ੈਨਨ ਜ਼ੁਆਨ ਯਿਨ ਟੈਨ ਅਤੇ ਚੀਨ ਦੀ ਯਿਨ ਰੁਓਨਿੰਗ ਤੋਂ ਇੱਕ ਸ਼ਾਟ ਅੱਗੇ ਰਹੀ, ਜਿਨ੍ਹਾਂ ਨੇ 14-ਅੰਡਰ 266 ਦੇ ਸਕੋਰ ਨਾਲ ਸਾਂਝੇ ਤੌਰ 'ਤੇ ਚਾਂਦੀ ਦਾ ਤਗਮਾ ਜਿੱਤਿਆ। ਪ੍ਰਣਵੀ ਸਿਖਰਲੇ 10 ਵਿੱਚ ਥਾਂ ਬਣਾਉਣ ਵਾਲੀ ਇਕਲੌਤੀ ਭਾਰਤੀ ਖਿਡਾਰਨ ਸੀ, ਜਦਕਿ ਅਦਿਤੀ ਅਸ਼ੋਕ 2-ਓਵਰ 282 ਦੇ ਸਕੋਰ ਨਾਲ 14ਵੇਂ ਅਤੇ ਦੀਕਸ਼ਾ ਡਾਗਰ 12-ਓਵਰ 292 ਦੇ ਸਕੋਰ ਨਾਲ ਸਾਂਝੇ ਤੌਰ 'ਤੇ 23ਵੇਂ ਸਥਾਨ 'ਤੇ ਰਹੀ।

ਵਿਅਕਤੀਗਤ ਸੋਨ ਤਗਮੇ ਤੋਂ ਇਲਾਵਾ, ਪ੍ਰਣਵੀ ਉਰਸ, ਅਦਿਤੀ ਅਸ਼ੋਕ ਅਤੇ ਦੀਕਸ਼ਾ ਡਾਗਰ ਦੀ ਭਾਰਤੀ ਟੀਮ ਨੇ ਮਹਿਲਾ ਟੀਮ ਈਵੈਂਟ ਵਿੱਚ ਚਾਂਦੀ ਦਾ ਤਗਮਾ ਹਾਸਲ ਕੀਤਾ। ਭਾਰਤ ਨੇ 137, 136, 136 ਅਤੇ 137 ਦੇ ਚਾਰ ਰਾਊਂਡਾਂ ਤੋਂ ਬਾਅਦ 14-ਅੰਡਰ 546 ਦਾ ਕੁੱਲ ਸਕੋਰ ਬਣਾ ਕੇ ਚੀਨ ਤੋਂ ਬਾਅਦ ਦੂਜਾ ਸਥਾਨ ਹਾਸਲ ਕੀਤਾ। ਇਸ ਈਵੈਂਟ ਵਿੱਚ ਚੀਨ ਨੇ 22-ਅੰਡਰ 538 ਦੇ ਸਕੋਰ ਨਾਲ ਸੋਨ ਤਗਮਾ ਜਿੱਤਿਆ, ਜਦਕਿ ਚੀਨੀ ਤਾਈਪੇ ਨੇ 10-ਅੰਡਰ 550 ਦੇ ਸਕੋਰ ਨਾਲ ਕਾਂਸੀ ਦਾ ਤਗਮਾ ਆਪਣੇ ਨਾਮ ਕੀਤਾ।