ਔਰਤ ਨੇ ਰਾਮਪੁਰ ਵਿਖੇ ਸਰਹੰਦ ਨਹਿਰ ''ਚ ਛਾਲ ਮਾਰ ਕੀਤੀ ਖੁਦਕੁਸ਼ੀ

ਦੋਰਾਹਾ (ਗੁਰਮੀਤ ਕੌਰ) : ਸੇਮਵਾਰ ਸਵੇਰੇ 10.30 ਵਜੇ ਦੇ ਲਗਭਗ ਇਕ ਔਰਤ ਵੱਲੋਂ ਪਿੰਡ ਰਾਮਪੁਰ ਵਿਖੇ ਸਰਹੰਦ ਨਹਿਰ 'ਚ ਅਚਾਨਕ ਛਾਲ ਮਾਰ ਕੇ ਆਤਮ ਹੱਤਿਆ ਕਰ ਲਈ ਗਈ। ਜਿਸਨੂੰ ਰਾਹਗੀਰਾਂ ਨੇ ਬਚਾਉਣ ਲਈ ਨਹਿਰ 'ਚ ਛਾਲ ਮਾਰੀ ਪਰ ਪਾਣੀ ਦਾ ਵਹਾਅ ਤੇਜ਼ ਹੋਣ ਕਾਰਨ ਅਤੇ ਨਹਿਰ 'ਚ ਪਾਣੀ ਉਚ ਪੱਧਰ ਹੋਣ ਕਰਕੇ ਔਰਤ ਨੂੰ ਜਦੋਂ ਬਾਹਰ ਕੱਢਿਆ ਗਿਆ ਤਾਂ ਤੱਕ ਉਹ ਦਮ ਤੋੜ ਚੁੱਕੀ ਸੀ। ਮ੍ਰਿਤਕਾ ਕਿੱਥੋਂ ਦੀ ਰਹਿਣ ਵਾਲੀ ਹੈ ਅਤੇ ਉਸਨੇ ਨਹਿਰ 'ਚ ਛਾਲ ਕਿਉਂ ਮਾਰੀ ਦੇ ਕਾਰਨਾਂ ਦਾ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ। 
ਪ੍ਰਤੱਖਦਰਸ਼ੀਆਂ ਅਨੁਸਾਰ ਇਕ 45 ਕੁ ਸਾਲ ਦੀ ਔਰਤ ਰਾਮਪੁਰ ਵਿਖੇ ਸਰਹੰਦ ਨਹਿਰ ਦੀ ਕੱਪੜੇ ਧੋਣ ਵਾਲੀ ਪੰਧੀ 'ਤੇ ਬੈਠ ਗਈ ਅਤੇ ਪਾਣੀ 'ਚ ਲੱਤਾਂ ਲਟਕਾ ਲਈਆਂ। ਜਦੋਂ ਨੇੜਿਓ ਲੰਘਦੇ ਰਾਹਗੀਰਾਂ ਨੂੰ ਔਰਤ ਵੱਲੋਂ ਖੁਦਕੁਸ਼ੀ ਕਰਨ ਦੀ ਸ਼ੰਕਾ ਜਾਪੀ ਤਾਂ ਉਨ੍ਹਾਂ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ ਪੰ੍ਰਤੂ ਦੇਖਦੇ ਹੀ ਦੇਖਦੇ ਔਰਤ ਨੇ ਨਹਿਰ 'ਚ ਛਲਾਂਗ ਲਗਾ ਦਿੱਤੀ ਅਤੇ ਪਾਣੀ ਦਾ ਵਹਾਅ ਤੇਜ਼ ਹੋਣ ਕਾਰਨ ਕੁਝ ਕੁ ਦੂਰੀ ਤੱਕ ਨਿਕਲ ਗਈ ਜਿਸਨੂੰ ਰਾਹਗੀਰਾਂ ਨੇ ਬਚਾਉਣ ਲਈ ਕੋਸ਼ਿਸ਼ਾਂ ਕਰਦਿਆਂ ਨਹਿਰ ਵਿਚੋਂ ਬਾਹਰ ਕੱਢ ਤਾਂ ਲਿਆ ਪਰ ਉਸ ਦੀ ਮੌਤ ਹੋ ਚੁੱਕੀ ਸੀ। 
ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਥਾਣਾ ਦੋਰਾਹਾ ਦੇ ਏ.ਐਸ.ਆਈ. ਹਰਦਮ ਸਿੰਘ ਅਤੇ ਹੌਲਦਾਰ ਕੁਲਵਿੰਦਰ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕਾ ਦੀ ਅਜੇ ਤੱਕ ਪਹਿਚਾਣ ਨਹੀਂ ਹੋ ਸਕੀ। ਉਨ੍ਹਾਂ ਦੱਸਿਆ ਕਿ ਮ੍ਰਿਤਕਾ ਨੇ ਹਰੇ ਰੰਗ ਦਾ ਕਢਾਈ ਵਾਲਾ ਕਮੀਜ਼ ਅਤੇ ਗੁਲਾਬੀ ਸਲਵਾਰ ਪਹਿਨੀ ਹੋਈ ਹੈ ਅਤੇ ਕੰਨਾਂ 'ਚ ਟਾਪਸ ਪਾਏ ਹੋਏ ਹਨ। ਫਿਲਹਾਲ ਉਨ੍ਹਾਂ ਔਰਤ ਦੀ ਲਾਸ਼ ਨੂੰ ਕਬਜ਼ੇ 'ਚ ਲੈਣ ਤੋਂ ਬਾਅਦ ਮ੍ਰਿਤਕਾ ਦੇ ਵਾਰਸਾਂ ਨੂੰ ਲੱਭਣ ਲਈ ਕੋਸ਼ਿਸ਼ਾਂ ਆਰੰਭ ਦਿੱਤੀਆਂ।