ਖੰਡਾ ਚੌਕ ਵਿਖੇ ਟ੍ਰੈਫਿਕ ਜਾਮ ਹੋਣ ਕਰ ਕੇ ਲੱਗੀਆਂ ਵਾਹਨਾਂ ਦੀਆਂ ਲੰਮੀਆਂ ਕਤਾਰਾਂ

ਪਟਿਆਲਾ, ਰੱਖੜਾ  (ਰਾਣਾ) - ਸ਼ਾਹੀ ਸ਼ਹਿਰ ਅੰਦਰ ਦਿਨੋਂ ਦਿਨ ਟ੍ਰੈਫਿਕ ਵਿਵਸਥਾ ਵਿਗੜਦੀ ਹੀ ਜਾ ਰਹੀ ਹੈ, ਜਿਸ ਸਮੇਂ ਸਮੁੱਚੇ ਸਕੂਲਾਂ ਦੀ ਛੁੱਟੀ ਦਾ ਸਮਾਂ ਹੁੰਦਾ ਹੈ ਉਸ ਵੇਲੇ ਟ੍ਰੈਫਿਕ ਨੂੰ ਕੰਟਰੋਲ ਕਰਨ ਵਾਲਾ ਕੋਈ ਵੀ ਨਾ ਹੋਣ ਕਰ ਕੇ ਬੀਤੇ ਦਿਨੀਂ ਖੰਡਾ ਚੌਕ, ਫੁਹਾਰਾ ਚੌਕ, ਸੇਵਾ ਸਿੰਘ ਠੀਕਰੀਵਾਲਾ ਚੌਕ, ਲੀਲਾ ਭਵਨ, 22 ਨੰਬਰ ਪੁਲ, ਬੱਸ ਸਟੈਂਡ ਆਦਿ ਵੱਖ-ਵੱਖ ਚੌਕਾਂ 'ਤੇ ਬੁਰੀ ਤਰ੍ਹਾਂ ਜਾਮ ਲੱਗਣ ਕਾਰਨ ਵਾਹਨਾਂ ਦੇ ਹਾਰਨਾਂ ਦੇ ਸ਼ੋਰ-ਸ਼ਰਾਬੇ ਨੇ ਆਮ ਲੋਕਾਂ ਦਾ ਜਿਊਣਾ ਮੁਹਾਲ ਕਰ ਦਿੱਤਾ ਹੈ।
ਨਿੱਤ ਦਿਨ ਲੱਗ ਰਹੇ ਜਾਮ ਕਾਰਨ ਘੰਟਿਆਂਬੱਧੀ ਆਮ ਲੋਕਾਂ ਨੂੰ ਸੜਕਾਂ ਵਿਚ ਫਸੇ ਰਹਿਣ ਲਈ ਮਜਬੂਰ ਹੋਣਾ ਪੈਂਦਾ ਹੈ, ਜਿਸ ਨੂੰ ਕੰਟਰੋਲ ਕਰਨ ਦਾ ਕੋਈ ਵੀ ਮਾਸਟਰ ਪਲਾਨ ਤਿਆਰ ਨਹੀਂ ਕੀਤਾ ਜਾ ਰਿਹਾ, ਜਿਸ ਕਰ ਕੇ ਵਧਦੇ ਜਾ ਰਹੇ ਵਾਹਨਾਂ ਦੀ ਗਿਣਤੀ ਕਾਰਨ ਵੀ ਇਹ ਲੰਮੇ ਜਾਮ ਲੱਗ ਰਹੇ ਹਨ ਪਰ ਸੀ. ਐੱਮ. ਸਿਟੀ ਹੋਣ ਦੇ ਬਾਵਜੂਦ ਸ਼ਹਿਰ ਅੰਦਰ ਟ੍ਰੈਫਿਕ ਵਿਵਸਥਾ ਉਥਲ-ਪੁਥਲ ਨਜ਼ਰ ਆ ਰਹੀ ਹੈ। ਭਾਵੇਂ ਕਿ ਵੱਡੀਆਂ ਓਵਰਲੋਡ ਗੱਡੀਆਂ ਲਈ ਬਾਹਰਲਾ ਰਿੰਗ ਰੋਡ ਚਾਲੂ ਹੋ ਚੁੱਕਿਆ ਹੈ ਪਰ ਫਿਰ ਵੀ ਸ਼ਹਿਰ ਅੰਦਰਲੀ ਟ੍ਰੈਫਿਕ 'ਆਊਟ ਆਫ ਕੰਟਰੋਲ' ਹੋ ਰਹੀ ਹੈ, ਜਿਸ ਨਾਲ ਆਮ ਸ਼ਹਿਰੀਆਂ ਦਾ ਜਿਊਣਾ ਮੁਹਾਲ ਹੋਇਆ ਪਿਆ ਹੈ, ਜੇਕਰ ਭਵਿੱਖ ਵਿਚ ਹਰ ਰੋਜ਼ ਟ੍ਰੈਫਿਕ ਵਿਵਸਥਾ ਦਾ ਹਾਲ ਇਸੇ ਤਰ੍ਹਾਂ ਰਿਹਾ ਤਾਂ ਸਮੁੱਚੇ ਚੌਕਾਂ ਤੋਂ ਲੰਘਣ ਲਈ ਘੰਟਿਆਂਬੱਧੀ ਸਮਾਂ ਲੱਗਣਾ ਲਾਜ਼ਮੀ ਹੈ।
ਐਂਬੂਲੈਂਸ ਵੀ ਫਸੀ ਜਾਮ 'ਚ
ਖੰਡਾ ਚੌਕ ਵਿਖੇ ਲੱਗੇ ਵੱਡੇ ਟ੍ਰੈਫਿਕ ਜਾਮ ਕਾਰਨ ਜਿਥੇ ਆਮ ਲੋਕ ਇਸ ਟ੍ਰੈਫਿਕ ਜਾਮ ਵਿਚ ਫਸੇ ਹੋਏ ਸਨ, ਦੇ ਨਾਲ-ਨਾਲ ਇਕ ਮਰੀਜ਼ ਨੂੰ ਇਲਾਜ ਲਈ ਲਿਜਾ ਰਹੀ ਐਂਬੂਲੈਂਸ ਨੂੰ ਕਾਫੀ ਸਮਾਂ ਜਾਮ ਵਿਚ ਫਸਿਆ ਰਹਿਣਾ ਪਿਆ।
ਭਾਵੇਂ ਕਿ ਲੋਕ ਚਾਹੁੰਦੇ ਸਨ ਕਿ ਜਲਦ ਤੋਂ ਜਲਦ ਇਹ ਜਾਮ ਵਿਚ ਨਿਕਲੇ ਪਰ ਇਸ ਐਂਬੂਲੈਂਸ ਨੂੰ ਜਾਮ ਵਿਚੋਂ ਕੱਢਣ ਲਈ ਕੋਈ ਵੀ ਟ੍ਰੈਫਿਕ ਮੁਲਾਜ਼ਮ ਅੱਗੇ ਨਹੀਂ ਆਇਆ, ਜਿਸ ਕਰ ਕੇ ਐਂਬੂਲੈਂਸ ਜਾਮ ਵਿਚ ਹੀ ਕਾਫੀ ਚਿਰ ਫਸੀ ਰਹੀ, ਉਥੇ ਹੀ ਸਕੂਲੀ ਵਾਹਨਾਂ ਵਿਚ ਛੋਟੇ ਬੱਚਿਆਂ ਨੂੰ ਵੀ ਜਾਮ ਵਿਚ ਫਸੇ ਰਹਿਣ ਦਾ ਸੰਤਾਪ ਭੋਗਣਾ ਪਿਆ। ਉਕਤ ਟ੍ਰੈਫਿਕ ਜਾਮ ਵਿਚ ਜਿਥੇ ਐਂਬੂਲੈਂਸ ਨੂੰ ਕਾਫੀ ਚਿਰ ਬਿਤਾਉਣਾ ਪਿਆ ਉਥੇ ਟ੍ਰੈਫਿਕ ਵਿਚੋਂ ਨਿਕਲਣ ਦੀ ਕਸ਼ਮਕਸ਼ ਵਿਚ ਵਾਹਨਾਂ ਦੀ ਆਪਸ ਵਿਚ ਫੇਟ ਵੀ ਲੱਗੀਆਂ, ਜਿਸ ਕਾਰਨ ਇਕ ਟਰੱਕ ਚਾਲਕ ਵਲੋਂ ਕਾਰ ਨੂੰ ਫੇਟ ਮਾਰ ਦਿੱਤੀ ਗਈ, ਜਿਸ ਕਾਰਨ ਦੋਵੇਂ ਦੇ ਚਾਲਕਾਂ ਦੀ ਆਪਸ ਵਿਚ ਤਕਰਾਰਬਾਜ਼ੀ ਸ਼ੁਰੂ ਹੋ ਗਈ, ਜਿਸ ਕਾਰਨ ਵੀ ਟ੍ਰੈਫਿਕ ਵਿਵਸਥਾ ਸੁਧਰਨ ਵਿਚ ਹੋਰ ਜ਼ਿਆਦਾ ਸਮਾਂ ਲੱਗਿਆ।