ਅਣਪਛਾਤੇ ਵਿਅਕਤੀਆਂ ਵੱਲੋਂ ਸਟੂਡੀਓ ''ਚੋਂ ਲੱਖਾਂ ਦਾ ਸਾਮਾਨ ਚੋਰੀ

ਮਜੀਠਾ,   (ਪ੍ਰਿਥੀਪਾਲ)-  ਮਜੀਠਾ ਵਿਖੇ ਇਕ ਫੋਟੋਗ੍ਰਾਫਰ ਦੀ ਦੁਕਾਨ 'ਚ ਚੋਰੀ ਹੋਣ ਦਾ ਸਮਾਚਾਰ ਮਿਲਿਆ ਹੈ। ਇਸ ਸਬੰਧੀ ਭੋਮਾ ਸਟੂਡੀਓ ਮਜੀਠਾ ਦੇ ਮਾਲਕ ਬਲਜਿੰਦਰ ਸਿੰਘ ਪੁੱਤਰ ਬਲਦੇਵ ਸਿੰਘ ਨੇ ਦੱਸਿਆ ਕਿ ਉਹ ਸ਼ਾਮ ਨੂੰ ਦੁਕਾਨ ਬੰਦ ਕਰ ਕੇ ਗਿਆ ਅਤੇ ਅਗਲੇ ਦਿਨ ਸਵੇਰੇ ਦੁਕਾਨ ਦਾ ਸ਼ਟਰ ਖੋਲ੍ਹ ਕੇ ਦੇਖਿਆ ਤਾਂ ਉਸ ਦੀ ਦੁਕਾਨ ਦੀ ਭੰਨ-ਤੋੜ ਹੋਈ ਸੀ ਅਤੇ ਸਾਰਾ ਸਾਮਾਨ ਖਿੱਲਰਿਆ ਹੋਇਆ ਸੀ ਤੇ ਫੋਟੋ ਪ੍ਰਿੰਟਰ ਦੀ ਸਿਆਹੀ ਸਾਰੀ ਦੁਕਾਨ ਵਿਚ ਕੰਧਾਂ ਤੇ ਛੱਤ ਆਦਿ 'ਤੇ ਖਿੱਲਰੀ ਹੋਈ ਸੀ ਤੇ ਸਾਰੀਆਂ ਫੋਟੋਆਂ ਪਾੜੀਆਂ ਹੋਈਆਂ ਸਨ। ਸਿਆਹੀ ਕਪਿਊਟਰ ਐੱਲ. ਈ. ਡੀ. ਵਿਚ ਪੈਣ ਕਾਰਨ ਉਹ ਵੀ ਖਰਾਬ ਹੋ ਗਈ।
ਅੰਦਰ ਜਾਣ 'ਤੇ ਪਤਾ ਲੱਗਾ ਕਿ ਉਸ ਦੀ ਦੁਕਾਨ ਦੀ ਛੱਤ ਉਪਰੋਂ ਪੌੜੀਆਂ ਦੇ ਦਰਵਾਜ਼ੇ ਦਾ ਜਿੰਦਰਾ ਤੋੜ ਕੇ ਅਣਪਛਾਤੇ ਵਿਅਕਤੀਆਂ ਨੇ ਦੁਕਾਨ 'ਚ ਵੜ ਕੇ ਚੋਰੀ ਕੀਤੀ ਹੈ, ਜਿਸ ਵਿਚ ਦੁਕਾਨ 'ਚੋਂ ਉਸ ਦੇ 2 ਸਟਿਲ ਕੈਮਰੇ, ਕੰਪਿਊਟਰ ਦੀ ਹਾਰਡ ਡਿਸਕ ਜਿਸ ਵਿਚ ਅਨੇਕਾਂ ਵਿਆਹਾਂ ਤੇ ਹੋਰ ਸਮਾਗਮਾਂ ਦੀਆਂ ਰਿਕਾਰਡਿੰਗਾਂ ਸਨ, ਕੈਮਰਿਆਂ ਦੇ ਕੁਝ ਲੈਂਜ਼, ਏ. ਸੀ. ਦਾ ਵੋਲਟੇਜ ਮੀਟਰ, ਕੀਮਤੀ ਐਲਬਮਾਂ, ਸੀ. ਡੀਜ਼ ਅਤੇ ਕੁਝ ਹੋਰ ਕੀਮਤੀ ਸਾਮਾਨ ਚੋਰੀ ਹੋ ਗਿਆ ਤੇ ਕਰੀਬ 5 ਹਜ਼ਾਰ ਰੁਪਏ ਚੋਰੀ ਹੋ ਗਏ।
ਮਾਲਕ ਬਲਜਿੰਦਰ ਸਿੰਘ ਨੇ ਦੱਸਿਆ ਕਿ ਮੇਰਾ ਕਰੀਬ 2 ਲੱਖ ਰੁਪਏ ਦਾ ਵਿੱਤੀ ਨੁਕਸਾਨ ਹੋਇਆ ਹੈ, ਜਿਸ ਦੀ ਇਤਲਾਹ ਮਜੀਠਾ ਥਾਣਾ ਵਿਖੇ ਦਿੱਤੀ ਗਈ ਹੈ। ਉਸ ਨੇ ਪੁਲਸ ਪ੍ਰਸ਼ਾਸਨ ਅਤੇ ਸਰਕਾਰ ਪਾਸੋਂ ਅਣਪਛਾਤੇ ਵਿਅਕਤੀਆਂ ਨੂੰ ਜਲਦੀ ਕਾਬੂ ਕਰਨ ਅਤੇ ਮਾਲੀ ਮਦਦ ਦੀ ਮੰਗ ਕੀਤੀ ਹੈ।