ਪਤੀ-ਪਤਨੀ ਦੀ ਕੁੱਟਮਾਰ ਕਰਨ ਤੇ ਵੀਡੀਓ ਬਣਾਉਣ ਵਾਲੇ ਕਾਬੂ

ਜਲੰਧਰ/ਲਾਂਬੜਾ, (ਪ੍ਰੀਤ, ਵਰਿੰਦਰ)— ਪਤੀ-ਪਤਨੀ ਨਾਲ ਕੁੱਟਮਾਰ ਕਰਕੇ ਚੋਰੀ ਦਾ ਦੋਸ਼ ਜਬਰੀ ਕਬੂਲ ਕਰਵਾਉਣ ਦਾ ਮੋਬਾਇਲ ਵੀਡੀਓ ਕਲਿੱਪ ਬਣਾਉਣ ਵਾਲੇ ਸਕੇ ਭਰਾਵਾਂ ਨੂੰ ਥਾਣਾ ਲਾਂਬੜਾ ਦੀ ਪੁਲਸ ਨੇ ਕਾਬੂ ਕਰ ਲਿਆ। 
ਦੋਵੇਂ ਭਰਾ ਟਾਵਰ ਇਨਕਲੇਵ ਵਿਚ ਬਿਲਡਿੰਗ ਮਟੀਰੀਅਲ ਦਾ ਕੰਮ ਕਰਦੇ ਹਨ। ਥਾਣਾ ਲਾਂਬੜਾ ਅਧੀਨ ਆਉਂਦੇ ਪਿੰਡ ਮਲਕੋ ਵਾਸੀ ਬਿੱਟੂ ਨੇ ਦੱਸਿਆ ਕਿ ਉਹ ਤੇ ਉਸਦੀ ਪਤਨੀ ਕੰਚਨ ਟਾਵਰ ਇਨਕਲੇਵ ਵਿਚ ਇਕ ਐੱਨ. ਆਰ. ਆਈ. ਦੀ ਕੋਠੀ ਦੀ ਦੇਖ-ਰੇਖ ਕਰਦੇ ਹਨ। ਕੋਠੀ ਮਾਲਕ ਹਰਪ੍ਰੀਤ ਸਿੰਘ ਵਿਦੇਸ਼ ਵਿਚ ਹਨ। 
ਬਿੱਟੂ ਨੇ ਦੱਸਿਆ ਕਿ ਉਹ ਆਪਣੀ ਪਤਨੀ ਨਾਲ ਕੋਠੀ ਵਿਚ ਮੌਜੂਦ ਸੀ ਕਿ ਅਚਾਨਕ ਟਾਵਰ ਇਨਕਲੇਵ ਵਿਚ ਰਹਿੰਦੇ ਗੁਨਜੀਤ ਸਿੰਘ ਤੇ ਇੰਦਰਪਾਲ ਸਿੰਘ ਕੋਠੀ ਵਿਚ ਦਾਖਲ ਹੋਏ। ਬਿੱਟੂ ਨੇ ਦੋਸ਼ ਲਾਇਆ ਕਿ ਦੋਵਾਂ ਨੇ ਉਸ ਨਾਲ ਕੁੱਟਮਾਰ ਕੀਤੀ। ਪਤਨੀ ਨੇ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਉਸਨੂੰ ਵੀ ਕੁੱਟਿਆ ਮਾਰਿਆ ਗਿਆ। ਦੋਵਾਂ ਭਰਾਵਾਂ ਨੇ ਉਸ 'ਤੇ ਬੈਟਰੀ ਚੋਰੀ ਦਾ ਦੋਸ਼ ਲਾਇਆ। ਬਿੱਟੂ ਨੇ ਦੱਸਿਆ ਕਿ ਦੋਵਾਂ ਭਰਾਵਾਂ ਨੇ ਉਸਨੂੰ ਬੁਰੀ ਤਰ੍ਹਾਂ ਕੁੱਟਿਆ ਤੇ ਜਾਨੋ ਮਾਰਨ ਦੀਆਂ ਧਮਕੀਆਂ ਦਿੰਦਿਆਂ ਮੋਬਾਇਲ 'ਤੇ ਉਸਦੀ ਕਲਿੱਪ ਬਣਾ ਲਈ।  ਉਸ ਨੂੰ ਕੁੱਟ ਮਾਰ ਕਰਕੇ ਕਬੂਲ ਕਰਵਾਇਆ ਗਿਆ ਕਿ ਉਸਨੇ ਚੋਰੀ ਕੀਤੀ ਹੈ। ਬਿੱਟੂ ਨੇ ਦੋਸ਼ ਲਾਇਆ ਕਿ ਦੋਵਾਂ ਨੇ ਉਸਦੀ ਪਤਨੀ ਨਾਲ ਵੀ ਛੇੜਛਾੜ ਕੀਤੀ ਤੇ ਉਸ ਕੋਲੋਂ 15 ਹਜ਼ਾਰ ਰੁਪਏ ਖੋਹ ਕੇ ਚਲੇ ਗਏ। ਸ਼ਿਕਾਇਤ ਥਾਣਾ ਲਾਂਬੜਾ ਵਿਚ ਦਿੱਤੀ ਗਈ। ਦੇਰ ਸ਼ਾਮ ਥਾਣਾ ਲਾਂਬੜਾ ਦੇ ਐੱਸ. ਐੱਚ. ਓ. ਪੁਸ਼ਪ ਬਾਲੀ ਨੇ ਦੱਸਿਆ ਕਿ ਸ਼ਿਕਾਇਤ ਮਿਲਣ 'ਤੇ ਜਾਂਚ ਸ਼ੁਰੂ ਕੀਤੀ ਤਾਂ ਦੋਵਾਂ  ਭਰਾਵਾਂ ਵੱਲੋਂ ਕੀਤੀ ਗੁੰਡਾਗਰਦੀ ਦੇ ਦੋਸ਼ ਸਹੀ ਪਾਏ ਗਏ। ਐੱਸ. ਐੱਚ. ਓ. ਪੁਸ਼ਪ ਬਾਲੀ ਨੇ ਦੱਸਿਆ ਕਿ ਗੁਨਜੀਤ ਤੇ ਇੰਦਰਪਾਲ ਸਿੰਘ ਦੋਵੇਂ ਪੁੱਤਰ ਰਵਿੰਦਰ ਵਾਸੀ ਟਾਵਰ ਇਨਕਲੇਵ ਖਿਲਾਫ ਕੇਸ ਦਰਜ ਕਰਕੇ ਦੋਵਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।