ਸੋਲਰ ਐਨਰਜੀ ਟਾਰਗੈੱਟ ਨਿਗਮ ਦੇ 20 ਮੈਗਾਵਾਟ ਨਾਲ ਹੋਵੇਗਾ ਪੂਰਾ

ਚੰਡੀਗੜ੍ਹ  (ਵਿਜੇ) - ਮਨਿਸਟਰੀ ਆਫ ਨਿਊ ਐਂਡ ਰੀਨਿਊਏਬਲ ਐਨਰਜੀ (ਐੱਮ. ਐੱਨ. ਆਰ. ਈ.) ਵਲੋਂ 2022 ਤਕ ਦਿੱਤੇ ਗਏ 50 ਮੈਗਾਵਾਟ ਸੋਲਰ ਐਨਰਜੀ ਦੇ ਟਾਰਗੈੱਟ ਨੂੰ ਪੂਰਾ ਕਰਨਾ ਮੁਸ਼ਕਿਲ ਹੁੰਦਾ ਜਾ ਰਿਹਾ ਹੈ। ਹੁਣ ਇਸ ਟਾਰਗੈੱਟ ਨੂੰ ਹਾਸਲ ਕਰਨ ਵਿਚ ਸਿਰਫ ਪੰਜ ਸਾਲ ਦਾ ਸਮਾਂ ਬਾਕੀ ਹੈ।
ਇਸ ਸਾਲ ਦੇ ਅੰਤ ਤਕ ਚੰਡੀਗੜ੍ਹ ਰੀਨਿਊਏਬਲ ਐਨਰਜੀ ਸਾਇੰਸ ਐਂਡ ਟੈਕਨਾਲੋਜੀ ਪ੍ਰਮੋਸ਼ਨ ਸੁਸਾਇਟੀ (ਕ੍ਰੈਸਟ) ਲਗਭਗ 13 ਮੈਗਾਵਾਟ ਸੋਲਰ ਐਨਰਜੀ ਜਨਰੇਟ ਕਰਨ ਵਿਚ ਸਫਲ ਹੋ ਜਾਵੇਗਾ ਪਰ ਇਸ ਤੋਂ ਬਾਅਦ ਬਚੇ ਹੋਏ 37 ਮੈਗਾਵਾਟ ਸੋਲਰ ਐਨਰਜੀ ਦੇ ਗੈਪ ਨੂੰ ਭਰਨਾ ਇੰਨਾ ਆਸਾਨ ਨਹੀਂ ਹੋਵੇਗਾ। ਇਹੀ ਕਾਰਨ ਹੈ ਕਿ ਹੁਣ ਕ੍ਰੈਸਟ ਨੇ ਨਗਰ ਨਿਗਮ ਦੀ ਮਦਦ ਲੈਣ ਦੀ ਯੋਜਨਾ ਤਿਆਰ ਕੀਤੀ ਹੈ।
ਨਗਰ ਨਿਗਮ ਦੀਆਂ ਬਿਲਡਿੰਗਾਂ ਵਿਚ ਰੂਫਟਾਪ ਸੋਲਰ ਪਲਾਂਟ ਲਾਉਣ ਲਈ ਕ੍ਰੈਸਟ ਵਲੋਂ ਨਗਰ ਨਿਗਮ ਨੂੰ ਇਕ ਚਿੱਠੀ ਭੇਜੀ ਗਈ ਹੈ, ਜਿਸ ਵਿਚ ਕਿਹਾ ਗਿਆ ਹੈ ਕਿ ਸੈਕਟਰ-39 ਦੇ ਵਾਟਰ ਵਰਕਸ ਸਮੇਤ ਨਗਰ ਨਿਗਮ ਦੀਆਂ ਕਈ ਬਿਲਡਿੰਗਾਂ ਵਿਚ ਸੋਲਰ ਫੋਟੋਵੋਲਟਿਕ ਰੂਫਟਾਪ ਲਾਏ ਜਾ ਸਕਦੇ ਹਨ। ਇਸ ਤਰ੍ਹਾਂ 20 ਮੈਗਾਵਾਟ ਸੋਲਰ ਐਨਰਜੀ ਨਗਰ ਨਿਗਮ ਅਧੀਨ ਆਉਣ ਵਾਲੀਆਂ ਇਮਾਰਤਾਂ ਰਾਹੀਂ ਹਾਸਲ ਕੀਤੀ ਜਾ ਸਕਦੀ ਹੈ ਜੇਕਰ ਅਜਿਹਾ ਹੋ ਜਾਂਦਾ ਹੈ ਤਾਂ ਐੱਮ. ਐੱਨ. ਆਰ. ਈ. ਵਲੋਂ ਦਿੱਤੇ ਗਏ ਟਾਰਗੈੱਟ ਨੂੰ ਪੂਰਾ ਕਰਨ ਵਿਚ ਕਾਫੀ ਮਦਦ ਮਿਲੇਗੀ।
ਇਨਵੈਸਟਮੈਂਟ ਵੀ ਨਹੀਂ ਕਰਨੀ ਪਏਗੀ
20 ਮੈਗਾਵਾਟ ਦੇ ਸੋਲਰ ਪਲਾਂਟਾਂ ਨੂੰ ਇੰਸਟਾਲ ਕਰਨ ਵਿਚ ਕਰੋੜਾਂ ਰੁਪਏ ਖਰਚਾ ਆਉਣ ਦਾ ਅੰਦਾਜ਼ਾ ਲਾਇਆ ਜਾ ਰਿਹਾ ਹੈ, ਜਿਸ ਕਾਰਨ ਕ੍ਰੈਸਟ ਇਨ੍ਹਾਂ ਸਾਰੇ ਪ੍ਰਾਜੈਕਟਾਂ ਨੂੰ ਕੰਪਨੀਆਂ ਰਾਹੀਂ ਲਾਏਗਾ। ਇਸ ਵਿਚ ਪੂਰੀ ਇਨਵੈਸਟਮੈਂਟ ਕੰਪਨੀ ਦੀ ਹੀ ਹੋਵੇਗੀ। ਇਸ ਦੇ ਬਦਲੇ ਵਿਚ ਕੰਪਨੀ ਤੋਂ ਬਿਜਲੀ ਚੰਡੀਗੜ੍ਹ ਪ੍ਰਸ਼ਾਸਨ ਨੂੰ ਵੇਚੀ ਜਾਵੇਗੀ। ਭਾਵ ਕ੍ਰੈਸਟ ਨੂੰ ਕਿਸੇ ਵੀ ਤਰ੍ਹਾਂ ਦੀ ਇਨਵੈਸਟਮੈਂਟ ਨਹੀਂ ਕਰਨੀ ਪਵੇਗੀ।
3.50 ਰੁਪਏ ਯੂਨਿਟ ਵੇਚੀ ਜਾ ਸਕਦੀ ਹੈ ਬਿਜਲੀ
ਮਨਿਸਟਰੀ ਵਲੋਂ ਪਾਸ ਕੀਤੇ ਗਏ ਰੈਗੂਲੇਸ਼ਨ ਨਾਲ ਬਿਜਲੀ ਵੇਚਣ ਦਾ ਕੰਮ ਹੋਰ ਵੀ ਆਸਾਨ ਹੋ ਗਿਆ ਹੈ। ਕ੍ਰੈਸਟ ਨੇ ਜੋ ਪਲਾਨ ਤਿਆਰ ਕੀਤਾ ਹੈ, ਉਸ ਵਿਚ ਇਸ ਪ੍ਰਾਜੈਕਟ ਲਈ ਨੈੱਟ ਮੀਟਰਿੰਗ ਮੋਡ ਨੂੰ ਅਪਣਾਉਣ ਦੀ ਸਿਫਾਰਿਸ਼ ਕੀਤੀ ਗਈ ਹੈ, ਜਿਸ ਦੇ ਤਹਿਤ ਜਿਸ ਕੰਪਨੀ ਨੂੰ ਕਾਂਟ੍ਰੈਕਟ ਦਿੱਤਾ ਜਾਵੇਗਾ, ਉਹ ਕੰਪਨੀ ਚੰਡੀਗੜ੍ਹ ਪ੍ਰਸ਼ਾਸਨ ਨੂੰ 3.50 ਰੁਪਏ ਪ੍ਰਤੀ ਯੂਨਿਟ ਦੇ ਹਿਸਾਬ ਨਾਲ ਬਿਜਲੀ ਵੇਚ ਸਕਦੀ ਹੈ।
ਡੀ. ਸੀ. ਦਫਤਰ ਨੂੰ ਲਿਖੀ ਚਿੱਠੀ
ਇਸ ਸਾਲ ਪ੍ਰਸ਼ਾਸਨ ਵਲੋਂ ਨੋਟੀਫਾਈ ਕੀਤੇ ਗਏ ਬਿਲਡਿੰਗ ਬਾਇਲਾਜ ਵਿਚ 5 ਮਰਲੇ ਤੋਂ ਵੱਧ ਦੇ ਮਕਾਨ ਵਿਚ ਸੋਲਰ ਪੈਨਲ ਲਾਉਣਾ ਜ਼ਰੂਰੀ ਕਰ ਦਿੱਤਾ ਗਿਆ ਪਰ ਅਜੇ ਤਕ ਕ੍ਰੈਸਟ ਨੂੰ ਇਹ ਜਾਣਕਾਰੀ ਨਹੀਂ ਹੈ ਕਿ ਕਿੰਨੇ ਘਰਾਂ ਵਿਚ ਇਸ ਤੋਂ ਬਾਅਦ ਸੋਲਰ ਪੈਨਲ ਲਾਏ ਜਾ ਚੁੱਕੇ ਹਨ। ਹੁਣ ਇਸ ਲਈ ਡੀ. ਸੀ. ਦਫਤਰ ਨੂੰ ਚਿੱਠੀ ਲਿਖੀ ਜਾਵੇਗੀ, ਜਿਸ ਰਾਹੀਂ ਇਹ ਜਾਣਕਾਰੀ ਮੁਹੱਈਆ ਕਰਵਾਈ ਜਾਵੇਗੀ ਕਿ ਸ਼ਹਿਰ ਦੇ ਕਿੰਨੇ ਘਰ ਅਜਿਹੇ ਹਨ, ਜਿਥੇ ਸੋਲਰ ਪੈਨਲ ਨਹੀਂ ਲੱਗੇ ਹੋਏ ਹਨ।
ਪਟਿਆਲਾ ਦੀ ਰਾਵ 'ਚ ਸ਼ੁਰੂ ਨਹੀਂ ਹੋ ਸਕੇਗਾ ਪ੍ਰਾਜੈਕਟ
ਸ਼ਹਿਰ ਦੇ ਸਭ ਤੋਂ ਵੱਡੇ ਸੋਲਰ ਪ੍ਰਾਜੈਕਟ ਨੂੰ ਤਿਆਰ ਕਰਨ ਦਾ ਕੰਮ ਅਜੇ ਤਕ ਸ਼ੁਰੂ ਨਹੀਂ ਹੋ ਸਕਿਆ ਹੈ। ਇਹ ਪ੍ਰਾਜੈਕਟ ਪਟਿਆਲਾ ਦੀ ਰਾਵ ਵਿਚ ਬਣਾਇਆ ਜਾਣਾ ਹੈ ਪਰ ਸਕਿਓਰਿਟੀ ਰੀਜਨ ਤੋਂ ਅਜੇ ਤਕ ਇਹ ਪ੍ਰਾਜੈਕਟ ਕਾਗਜ਼ਾਂ ਵਿਚ ਹੀ ਬੰਦ ਹੈ। ਦਰਅਸਲ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪਟਿਆਲਾ ਦੀ ਰਾਵ ਵਿਚ ਖੁੱਲ੍ਹੀ ਥਾਂ ਵਿਚ ਸੋਲਰ ਪੈਨਲ ਲਾਏ ਜਾਣੇ ਹਨ। ਆਸ-ਪਾਸ ਤੋਂ ਲੰਘਣ ਵਾਲੇ ਲੋਕ ਇਨ੍ਹਾਂ ਪੈਨਲਾਂ ਨੂੰ ਕਿਸੇ ਵੀ ਤਰ੍ਹਾਂ ਦਾ ਨੁਕਸਾਨ ਨਹੀਂ ਪਹੁੰਚਾ ਸਕਦੇ। ਇਸ ਲਈ ਇਹ ਪ੍ਰਾਜੈਕਟ ਕਾਫੀ ਹੌਲੀ ਚੱਲ ਰਿਹਾ ਹੈ। ਇਹ ਪ੍ਰਾਜੈਕਟ ਇੰਜੀਨੀਅਰਿੰਗ ਵਿਭਾਗ ਵਲੋਂ ਤਿਆਰ ਕੀਤਾ ਜਾਵੇਗਾ।