ਲੜਕੀ ਦਾ ਕਤਲ ਕਰ ਕੇ ਪਾਰਕ ''ਚ ਸਾੜੀ ਲਾਸ਼

ਜਲੰਧਰ, (ਪ੍ਰੀਤ)- ਔਰਤਾਂ ਦੇ ਸ਼ੋਸ਼ਣ, ਜ਼ੁਲਮ ਤੇ ਹੱਤਿਆਵਾਂ ਦੇ ਮਾਮਲੇ ਰੁਕ ਨਹੀਂ ਰਹੇ। ਥਾਣਾ ਬਸਤੀ ਬਾਵਾ ਖੇਲ ਅਧੀਨ ਪੈਂਦੇ ਸਪੋਰਟਸ ਐਂਡ ਸਰਜੀਕਲ ਕੰਪਲੈਕਸ ਵਿਚ ਬੀਤੀ ਰਾਤ ਦਿਲ ਦਹਿਲਾ ਦੇਣ ਵਾਲੀ ਵਾਰਦਾਤ ਹੋਈ। ਅਣਪਛਾਤੇ ਵਿਅਕਤੀਆਂ ਨੇ ਲੜਕੀ ਦੀ ਹੱਤਿਆ ਕਰਕੇ ਉਸਦੀ ਲਾਸ਼ ਸ਼ਰੇਆਮ ਪਾਰਕ ਵਿਚ ਸਾੜ ਦਿੱਤੀ। ਵਾਰਦਾਤ ਦਾ ਖੁਲਾਸਾ ਅੱਜ ਸਵੇਰੇ ਕਰੀਬ 8.30 ਵਜੇ ਹੋਇਆ ਜਦੋਂ ਉਕਤ ਪਾਰਕ 'ਚ ਸਵੇਰੇ ਪ੍ਰਵਾਸੀ ਵਿਅਕਤੀ ਸੈਰ ਲਈ ਪਹੁੰਚਿਆ। ਲਾਸ਼ ਦੇਖ ਕੇ ਉਸ ਨੇ ਰੌਲਾ ਪਾਇਆ ਤੇ ਤੁਰੰਤ ਪੁਲਸ ਨੂੰ ਸੂਚਨਾ ਦਿੱਤੀ। 
ਸੂਚਨਾ ਮਿਲਦਿਆਂ ਹੀ ਪੁਲਸ ਕਮਿਸ਼ਨਰ ਪਰਵੀਨ ਕੁਮਾਰ ਸਿਨਹਾ, ਏ. ਡੀ. ਸੀ. ਪੀ. ਸੂਡਰ ਵਿਜੀ, ਥਾਣਾ ਬਸਤੀ ਬਾਵਾ ਖੇਲ ਦੇ ਐੱਸ. ਐੱਚ. ਓ. ਸੁਖਵਿੰਦਰ ਸਿੰਘ ਮੌਕੇ 'ਤੇ ਪਹੁੰਚੇ ਤੇ ਜਾਂਚ ਸ਼ੁਰੂ ਕੀਤੀ। ਲਾਸ਼ ਦੇਖਣ ਵਾਲੇ ਮਹਿੰਦਰਪਾਲ ਵਾਸੀ ਸਪੋਰਟਸ ਐਂਡ ਸਰਜੀਕਲ ਕੰਪਲੈਕਸ ਨੇ ਦੱਸਿਆ ਕਿ ਉਹ ਨੇੜੇ ਸਥਿਤ ਫੈਕਟਰੀ ਵਿਚ ਕੰਮ ਕਰਦਾ ਹੈ। ਇੰਸਪੈਕਟਰ ਸੁਖਵਿੰਦਰ ਸਿੰਘ ਮੁਤਾਬਿਕ ਲਾਸ਼ 90 ਫੀਸਦੀ ਸੜ ਚੁੱਕੀ ਹੈ। ਲਾਸ਼ ਦਾ ਪੋਸਟਮਾਰਟਮ ਮੈਡੀਕਲ ਬੋਰਡ ਤੋਂ ਕਰਵਾਇਆ ਜਾਵੇਗਾ ਤਾਂ ਜੋ ਹੱਤਿਆ ਦੇ ਕਾਰਨਾਂ ਦਾ ਪਤਾ ਲੱਗ ਸਕੇ। 
ਮ੍ਰਿਤਕਾ ਦੀ ਲਾਸ਼ ਕਰੀਬ 90 ਫੀਸਦੀ ਸੜੀ ਹੋਣ ਕਾਰਨ ਪਛਾਣ ਨਹੀਂ ਹੋ ਰਹੀ ਸੀ। ਪੁਲਸ ਨੇ ਹੱਤਿਆ ਦਾ ਕੇਸ ਦਰਜ ਕਰਕੇ ਲਾਸ਼ ਪੋਸਟਮਾਰਟਮ ਲਈ ਭੇਜ ਦਿੱਤੀ ਹੈ। ਸਪੋਰਟਸ ਐਂਡ ਸਰਜੀਕਲ ਕੰਪਲੈਕਸ ਵਿਚ ਸਥਿਤ ਪਾਰਕ ਵਿਚ ਸਵੇਰੇ ਜਦੋਂ ਪ੍ਰਵਾਸੀ ਵਿਅਕਤੀ ਸੈਰ ਲਈ ਆਇਆ ਤਾਂ ਲਾਸ਼ ਵੇਖਕੇ ਉਸਨੇ ਰੌਲਾ ਪਾਇਆ ਤੇ ਤੁਰੰਤ ਪੁਲਸ ਨੂੰ ਸੂਚਨਾ ਦਿੱਤੀ। 
ਹੱਤਿਆ ਕੀਤੀ ਕਿਤੇ ਹੋਰ
ਜਾਂਚ ਦੌਰਾਨ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ ਕਿ ਲੜਕੀ ਦੀ ਹੱਤਿਆ ਕਿਤੇ ਹੋਰ ਕੀਤੀ ਗਈ ਕਿਉਂਕਿ ਪਾਰਕ ਦੇ ਨਾਲ ਫੈਕਟਰੀਆਂ ਵੀ ਹਨ। ਪੁਲਸ ਜਾਂਚ ਵਿਚ ਪਤਾ ਲੱਗਾ ਹੈ ਕਿ ਰਾਤ ਕਰੀਬ 9 ਵਜੇ ਤਕ ਪਾਰਕ ਵਿਚ ਦਿਨ ਦੀ ਸ਼ਿਫਟ ਖਤਮ ਹੋਣ ਤੇ ਨਾਈਟ ਸ਼ਿਫਟ ਸ਼ੁਰੂ ਹੋਣ ਕਾਰਨ ਪ੍ਰਵਾਸੀ ਮਜ਼ਦੂਰਾਂ ਦੀ ਭੀੜ ਰਹਿੰਦੀ ਹੈ। ਪਾਰਕ ਤੇ ਆਲੇ-ਦੁਆਲੇ 9 ਵਜੇ ਤੋਂ ਬਾਅਦ ਸੰਨਾਟਾ ਪੱਸਰ ਜਾਂਦਾ ਹੈ ਪਰ ਅਜਿਹਾ ਵੀ ਨਹੀਂ ਕਿ ਚੀਕੇ ਜਾਂ ਮਦਦ ਮੰਗੇ ਤੇ ਕਿਸੇ ਨੂੰ ਕੁੱਝ ਸੁਣੇ ਨਾ। ਪੁਲਸ ਦਾ ਵੀ ਅੰਦਾਜ਼ਾ ਹੈ ਕਿ ਲੜਕੀ ਦੀ ਹੱਤਿਆ ਕਿਸੇ ਹੋਰ ਜਗ੍ਹਾ ਕੀਤੀ ਗਈ ਤੇ ਲਾਸ਼ ਪਾਰਕ ਵਿਚ ਲਿਆ ਕੇ ਸਾੜ ਦਿੱਤੀ ਗਈ ਕਿਉਂਕਿ ਜਿੱਥੇ ਲਾਸ਼ ਮਿਲੀ ਸਿਰਫ ਉਥੇ ਹੀ ਘਾਹ ਸੜੀ ਮਿਲੀ। ਜੇਕਰ ਜਿਊਂਦੀ ਲੜਕੀ ਨੂੰ ਸਾੜਿਆ ਜਾਂਦਾ ਤਾਂ ਆਲੇ-ਦੁਆਲੇ ਦੇ ਕੁੱਝ ਏਰੀਏ ਵਿਚ ਵੀ ਘਾਹ ਸੜੀ ਮਿਲਦੀ ਪਰ ਜਾਂਚ ਵਿਚ ਕੋਈ ਅਜਿਹਾ ਤੱਥ ਨਹੀਂ ਮਿਲਿਆ। ਪੁਲਸ ਨੂੰ ਲਾਸ਼ ਦੇ ਕੋਲੋਂ ਹੀ ਪਲਾਸਟਿਕ ਦਾ ਇਕ ਡੱਬਾ ਤੇ ਪੰਜਾਬੀ ਜੁੱਤੀ ਮਿਲੀ ਹੈ। ਅੰਦਾਜ਼ਾ ਲਾਇਆ ਜਾ ਰਿਹਾ ਹੈ ਕਿ ਡੱਬੇ ਵਿਚ ਕੋਈ ਜਲਣਸ਼ੀਲ ਪਦਾਰਥ ਲਿਆ ਕੇ ਲੜਕੀ ਦੀ ਲਾਸ਼ ਸਾੜੀ ਗਈ ਹੋਵੇ। 
ਰਾਤ ਵੇਲੇ ਪਾਰਕ ਵਿਚ ਘੁੰਮ ਰਹੇ ਸਨ ਲੜਕਾ-ਲੜਕੀ
ਵਾਰਦਾਤ ਤੋਂ ਤੁਰੰਤ ਬਾਅਦ ਪੁਲਸ ਟੀਮਾਂ ਨੇ ਆਲੇ-ਦੁਆਲੇ ਦੇ ਇਲਾਕੇ ਦੀ ਸਰਚ ਸ਼ੁਰੂ ਕੀਤੀ। ਆਲੇ-ਦੁਆਲੇ ਫੈਕਟਰੀਆਂ ਦੇ ਕਰਮਚਾਰੀਆਂ ਕੋਲੋਂ ਪੁੱਛਗਿੱਛ ਵਿਚ ਪਤਾ ਲੱਗਾ ਕਿ ਕੁੱਝ ਮਜ਼ਦੂਰਾਂ ਨੇ ਦੱਸਿਆ ਕਿ ਰਾਤ ਵੇਲੇ ਇਕ ਲੜਕਾ-ਲੜਕੀ ਬਾਈਕ 'ਤੇ ਪਾਰਕ ਨੇੜੇ ਘੁੰਮ ਰਹੇ ਸਨ। ਕੀ ਮ੍ਰਿਤਕਾ ਉਹ ਹੀ ਹੈ, ਇਸ ਬਾਰੇ ਕਹਿਣਾ ਮੁਸ਼ਕਿਲ ਹੈ। 
ਮਿਸਿੰਗ ਰਿਪੋਰਟ ਚੈੱਕ ਕਰ ਰਹੀ ਪੁਲਸ
ਮ੍ਰਿਤਕਾ ਦੀ ਪਛਾਣ ਨਾ ਹੋਣ ਕਾਰਨ ਪੁਲਸ ਦੀ ਜਾਂਚ ਅਟਕੀ ਹੋਈ ਹੈ। ਪੁਲਸ ਸ਼ਨਾਖਤ ਲਈ ਹਰ ਸੰਭਵ ਕੋਸ਼ਿਸ਼ ਕਰ ਰਹੀ ਹੈ। ਪੁਲਸ ਵੱਲੋਂ ਆਪਣੇ ਏਰੀਏ ਦੀ ਪਿਛਲੇ ਸਮੇਂ ਦੀ ਮਿਸਿੰਗ ਰਿਪੋਰਟ ਚੈੱਕ ਕਰਵਾਉਣ ਦੇ ਨਾਲ-ਨਾਲ ਘਟਨਾ ਸਬੰਧੀ ਕਮਿਸ਼ਨਰੇਟ ਦੇ ਸਾਰੇ ਥਾਣਿਆਂ ਵਿਚ ਵੀ ਸੂਚਨਾ ਦਿੱਤੀ ਗਈ ਹੈ। ਪੁਲਸ ਅਧਿਕਾਰੀਆਂ ਵੱਲੋਂ ਕਮਿਸ਼ਨਰੇਟ, ਜਲੰਧਰ ਦਿਹਾਤ ਤੇ ਕਪੂਰਥਲਾ ਦੇ ਥਾਣਿਆਂ ਵਿਚ ਮਿਸਿੰਗ ਰਿਪੋਰਟ ਚੈੱਕ ਕਰਵਾਉਣ ਲਈ ਕਿਹਾ ਗਿਆ ਹੈ। 
ਸਪੋਰਟਸ ਐਂਡ ਸਰਜੀਕਲ ਕੰਪਲੈਕਸ ਵਿਚ ਪੁਲਸ ਨੇ ਫੈਲਾਇਆ ਜਾਲ
ਸੂਤਰਾਂ ਨੇ ਦੱਸਿਆ ਕਿ ਪੁਲਸ ਨੂੰ ਅੰਦਾਜ਼ਾ ਹੈ ਕਿ ਮ੍ਰਿਤਕਾ ਪ੍ਰਵਾਸੀ ਹੋ ਸਕਦੀ ਹੈ। ਦੇਰ ਰਾਤ ਇੰਸਪੈਕਟਰ ਸੁਖਵਿੰਦਰ ਸਿੰਘ ਦੀ ਅਗਵਾਈ ਵਿਚ ਪੁਲਸ ਟੀਮ ਸਾਦੇ ਕੱਪੜਿਆਂ ਵਿਚ ਇਲਾਕੇ ਵਿਚ ਘਰ ਘਰ ਸਰਚ ਕਰ ਰਹੀ ਸੀ। ਵਾਰਦਾਤ ਦਾ ਸੁਰਾਗ ਲੱਭਣ ਲਈ ਪ੍ਰਵਾਸੀ ਮਜ਼ਦੂਰਾਂ ਨਾਲ ਗੱਲਬਾਤ ਕੀਤੀ ਜਾ ਰਹੀ ਹੈ। 
ਫੈਕਟਰੀ ਦੇ ਕੈਮਰੇ ਵਿਚ ਨਜ਼ਰ ਆਈ ਬੈਗ ਲੈ ਕੇ ਘੁੰਮਦੀ ਲੜਕੀ
  ਨੇੜੇ-ਤੇੜੇ ਦੇ ਏਰੀਏ ਦੀ ਸਰਚ ਦੌਰਾਨ ਪੁਲਸ ਨੂੰ ਨੇੜੇ ਸਥਿਤ ਫੈਕਟਰੀ ਦੇ ਬਾਹਰ ਇਕ ਸੀ. ਸੀ. ਟੀ. ਵੀ. ਕੈਮਰਾ ਮਿਲਿਆ। ਕੈਮਰੇ ਦੀ ਫੁਟੇਜ ਦੇਖਣ 'ਤੇ ਪਤਾ ਲੱਗਾ ਕਿ ਰਾਤ 8.20 'ਤੇ ਇਕ ਲੜਕੀ ਬੈਗ ਲੈ ਕੇ ਪਾਰਕ ਵੱਲ ਜਾਂਦੀ ਨਜ਼ਰ ਆਈ। ਫੋਟੋ ਕਲੀਅਰ ਨਹੀਂ ਹੈ ਪਰ ਪੁਲਸ ਨੇ ਫੁਟੇਜ ਜ਼ਬਤ ਕਰਕੇ ਤਸਵੀਰਾਂ ਕਢਵਾਉਣ ਲਈ ਦਿੱਤੀ ਹੈ। ਹਾਲਾਂਕਿ ਉਸ ਕੈਮਰੇ ਦਾ ਡੀ. ਵੀ. ਆਰ. ਸਿਸਟਮ ਨਹੀਂ ਮਿਲਿਆ ਪਰ ਅੰਦਾਜ਼ਾ ਹੈ ਕਿ ਕੈਮਰੇ ਵਿਚ ਮੈਮਰੀ ਕਾਰਡ ਹੋ ਸਕਦਾ ਹੈ। ਜਿਸਦੀ ਜਾਂਚ ਕਰਵਾਈ ਜਾਵੇਗੀ।