ਸਮਰਾਲਾ ਪੁਲਸ ਦੇ ਹੱਥ ਲੱਗੀ ਵੱਡੀ ਸਫਲਤਾ, 3 ਪਿਸਤੌਲਾਂ, 30 ਜਿੰਦਾ ਕਾਰਤੂਸ ਤੇ 5 ਮੈਗਜ਼ੀਨਾਂ ਸਮੇਤ 3 ਕਾਬੂ
11/15/2021 3:16:03 AM
ਲੁਧਿਆਣਾ(ਵਿਪਨ)- ਐੱਸ.ਐੱਚ.ਓ ਸਮਰਾਲਾ ਪ੍ਰਕਾਸ਼ ਮਸੀਹ ਦੀ ਅਗਵਾਈ ਹੇਠ ਸਮਾਜ ਵਿਰੋਧੀ ਅਨਸਰਾਂ ਵਿਰੁੱਧ ਚਲਾਈ ਜਾ ਰਹੀ ਮੁਹਿੰਮ ਤਹਿਤ ਸਮਰਾਲਾ ਪੁਲਸ ਨੂੰ ਵੱਡੀ ਸਫਲਤਾ ਮਿਲੀ ਹੈ। ਜਿਸ ਵਿੱਚ ਸਮਰਾਲਾ ਪੁਲਸ ਨੇ ਵੱਡੀ ਮਾਤਰਾ ਵਿੱਚ ਨਜਾਇਜ਼ ਹਥਿਆਰਾਂ ਸਮੇਤ ਦੋਸ਼ੀ ਨੂੰ ਕਾਬੂ ਕੀਤਾ ਹੈ। ਇਸ ਸਬੰਧੀ ਪ੍ਰੈਸ ਨੂੰ ਜਾਣਕਾਰੀ ਦਿੰਦੇ ਹੋਏ ਐੱਸ.ਐੱਚ.ਓ ਸਮਰਾਲਾ ਪ੍ਰਕਾਸ਼ ਮਸੀਹ ਨੇ ਦੱਸਿਆ ਕਿ ਪੁਲਸ ਜ਼ਿਲਾ ਖੰਨਾ ਦੇ ਸਹਾਇਕ ਐੱਸ.ਐੱਚ.ਓ ਪਵਨਜੀਤ ਸਿੰਘ ਪੁਲਸ ਪਾਰਟੀ ਸਮੇਤ ਪੁਲਸ ਚੌਂਕੀ ਮੁਖੀਆਂ ਕੋਲ ਨਾਕਾ ਲਗਾ ਕੇ ਸ਼ੱਕੀ ਵਿਅਕਤੀਆਂ ਅਤੇ ਵਾਹਨਾਂ ਦੀ ਚੈਕਿੰਗ ਕਰ ਰਹੇ ਸਨ। ਉਦੋਂ ਹੀ ਚੰਡੀਗੜ੍ਹ ਵਾਲੇ ਪਾਸੇ ਤੋਂ ਇਕ ਕਾਰ ਆਉਂਦੀ ਦਿਖਾਈ ਦਿੱਤੀ, ਜਿਸ ਨੂੰ ਪੁਲਸ ਪਾਰਟੀ ਨੇ ਰੁਕਣ ਦਾ ਇਸ਼ਾਰਾ ਕੀਤਾ ਪਰ ਉਨ੍ਹਾਂ ਨੇ ਕਾਰ ਨੂੰ ਰੋਕਣ ਦੀ ਬਜਾਏ ਕਾਰ ਭਜਾ ਲਈ। ਪੁਲਸ ਪਾਰਟੀ ਨੇ ਕਾਰ ਦੇ ਅੱਗੇ ਬੈਰੀਕੇਡ ਲਗਾ ਦਿੱਤਾ ਅਤੇ ਕਾਰ ਨੂੰ ਰੋਕ ਲਿਆ ਗਿਆ। ਨਾਮ-ਪਤਾ ਪੁੱਛਣ 'ਤੇ ਉਸ ਨੇ ਆਪਣਾ ਨਾਂ ਪੰਕਜ ਰਾਜਪੂਤ ਪੁੱਤਰ ਵੀਰਪਾਲ ਤਾਜਪੁਰ ਰੋਡ ਲੁਧਿਆਣਾ, ਅਪੂਰਵ ਚੋਪੜਾ ਉਰਫ਼ ਮੁੰਨਾ ਪੁੱਤਰ ਸੁਧੀਰ ਚੋਪੜਾ ਦੱਸਿਆ | ਪੁਲਸ ਵੱਲੋਂ ਜਦੋਂ ਕਾਰ ਦੀ ਤਲਾਸ਼ੀ ਲਈ ਗਈ ਤਾਂ ਉਸ 'ਚੋਂ 3 ਪਿਸਤੌਲ ਮਾਰਕਾ (ਸਟਾਰ ਮਾਡਲ 81 ਮੁੰਗੇਰ ਵਿੱਚ ਬਣਿਆ) ਨੰਬਰ 9966, 30 ਜਿੰਦਾ ਕਾਰਤੂਸ ਅਤੇ ਉਨ੍ਹਾਂ ਕੋਲੋਂ 5 ਮੈਗਜ਼ੀਨ ਬਰਾਮਦ ਹੋਏ। ਪੁਲਸ ਵੱਲੋਂ ਤਿੰਨਾਂ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰਕੇ ਉਨ੍ਹਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ।