ਕ੍ਰਿਕਟ ਖੇਡਣ ਤੇ ਨਸ਼ਾ ਕਰਨ ਤੋਂ ਰੋਕਣ ''ਤੇ ਕੀਤਾ ਸੀ ਰਾਜੂ ਬਾਬਾ ਦਾ ਕਤਲ

ਜਲੰਧਰ, (ਮਹੇਸ਼) : ਕ੍ਰਿਕਟ ਖੇਡਣ ਤੋਂ ਰੋਕਣ ਅਤੇ ਨਸ਼ਾ ਕਰਨ ਤੋਂ ਮਨ੍ਹਾ ਕਰਨ 'ਤੇ ਗੜ੍ਹਾ ਦੇ ਇਕ ਧਾਰਮਿਕ ਸਥਾਨ ਦੇ ਸੇਵਾਦਾਰ ਰਾਜੇਸ਼ ਕੁਮਾਰ ਉਰਫ ਰਾਜੂ ਬਾਬਾ ਪੁੱਤਰ ਸਰਦਾਰੀ ਲਾਲ ਦਾ ਤੇਜ਼ਧਾਰ ਹਥਿਆਰਾਂ ਨਾਲ ਕਤਲ ਕਰ ਦਿੱਤਾ ਗਿਆ ਸੀ। ਇਹ ਗੱਲ ਥਾਣਾ ਕੈਂਟ ਦੀ ਪੁਲਸ ਵਲੋਂ ਅੱਜ ਤੋਂ ਲਗਭਗ 28 ਦਿਨ ਪਹਿਲਾਂ 8 ਨਵੰਬਰ ਦੀ ਦੇਰ ਰਾਤ ਕਤਲ ਕੀਤੇ ਗਏ ਰਾਜੂ ਬਾਬਾ ਦੇ ਕੇਸ ਵਿਚ ਫੜੇ ਗਏ ਤਿੰਨੋਂ ਮੁਲਜ਼ਮਾਂ ਨੇ ਆਪਣਾ ਅਪਰਾਧ ਕਬੂਲ ਕਰਦਿਆਂ ਕਹੀ। ਮੁਲਜ਼ਮਾਂ ਦੀ ਪਛਾਣ ਸੌਰਵ ਪੁੱਤਰ ਰਵੀ ਕੁਮਾਰ, ਉਤਸਵ ਸ਼੍ਰੀਵਾਸ ਪੁੱਤਰ ਸੰਤੋਸ਼ ਸ਼੍ਰੀਵਾਸ ਤੇ ਰੋਸ਼ਨ ਅਟਵਾਲ ਉਰਫ ਲਾਲੀ ਪੁੱਤਰ ਵਿਜੇ ਕੁਮਾਰ ਤਿੰਨੋਂ ਵਸਨੀਕ ਗੜ੍ਹਾ ਥਾਣਾ ਡਵੀਜ਼ਨ ਨੰ. 7 ਦੇ ਰੂਪ ਵਿਚ ਹੋਈ ਹੈ।
ਉਪਰੋਕਤ ਜਾਣਕਾਰੀ ਏ. ਡੀ. ਸੀ. ਪੀ. ਸਿਟੀ-2 ਸੂਡਰ ਵਿਜੀ ਨੇ ਪੱਤਰਕਾਰ ਸੰਮੇਲਨ ਵਿਚ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਥਾਣਾ ਕੈਂਟ ਦੇ ਮੁਖੀ ਇੰਸਪੈਕਟਰ ਗਗਨਦੀਪ ਸਿੰਘ ਦੀ ਅਗਵਾਈ 'ਚ ਦਕੋਹਾ ਰੇਲਵੇ ਫਾਟਕ ਨੇੜਿਓਂ ਫੜੇ ਗਏ ਤਿੰਨੋਂ ਮੁਲਜ਼ਮਾਂ ਨੂੰ ਮ੍ਰਿਤਕ ਰਾਜੂ ਬਾਬਾ ਦੇ ਭਰਾ ਸੁਰੇਸ਼ ਕੁਮਾਰ ਦੇ ਬਿਆਨਾਂ 'ਤੇ ਥਾਣਾ ਕੈਂਟ ਵਿਚ ਆਈ. ਪੀ. ਸੀ. ਦੀ ਧਾਰਾ 302 ਤੇ 404 ਆਈ. ਪੀ. ਸੀ. ਤਹਿਤ ਨਾਮਜ਼ਦ ਕੀਤਾ ਗਿਆ ਹੈ। ਉਨ੍ਹਾਂ ਨੂੰ ਮਾਣਯੋਗ ਅਦਾਲਤ ਵਿਚ ਪੇਸ਼ ਕਰ ਕੇ 3 ਦਿਨ ਦਾ ਪੁਲਸ ਰਿਮਾਂਡ ਹਾਸਿਲ ਕੀਤਾ ਗਿਆ ਹੈ। ਮੁਲਜ਼ਮਾਂ ਦੀ ਉਮਰ 19 ਤੋਂ 22 ਸਾਲ ਹੈ। ਉਤਸਵ ਨਾਂ ਦਾ ਮੁਲਜ਼ਮ ਬੀ. ਸੀ. ਏ.-2 ਪਾਸ ਹੈ। ਪੁਲਸ ਨੇ ਮੁਲਜ਼ਮਾਂ ਵਲੋਂ ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਵਰਤੋਂ ਵਿਚ ਲਿਆਂਦੀ ਗਈ ਐਕਟਿਵਾ ਅਤੇ ਰਾਜੂ ਬਾਬਾ ਦੀ ਚਾਂਦੀ ਦੀ ਮੁੰਦਰੀ ਤੇ ਲਾਕੇਟ ਵੀ ਬਰਾਮਦ ਕਰ ਲਿਆ ਹੈ।