20 ਹਜ਼ਾਰ ਦੀ ਰਿਸ਼ਵਤ ਲੈਂਦਾ ਪਟਵਾਰੀ ਕਾਬੂ

ਤਰਨਤਾਰਨ/ ਗੋਇੰਦਵਾਲ ਸਾਹਿਬ,   (ਰਮਨ, ਪੰਛੀ)-  ਵਿਜੀਲੈਂਸ ਟੀਮ ਤਰਨਤਾਰਨ ਵੱਲੋਂ ਵਿਰਾਸਤੀ ਇੰਤਕਾਲ ਚੜ੍ਹਾਉਣ ਦੇ ਸਬੰਧ ਵਿਚ ਮੰਗੀ ਗਈ ਰਿਸ਼ਵਤ ਦੇ ਦੋਸ਼ ਹੇਠ ਇਕ ਪਟਵਾਰੀ ਨੂੰ ਰੰਗੇ ਹੱਥੀਂ ਕਾਬੂ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਿਸ ਸਬੰਧ 'ਚ ਥਾਣਾ ਵਿਜੀਲੈਂਸ ਅੰਮ੍ਰਿਤਸਰ ਵਿਖੇ ਮੁਕੱਦਮਾ ਨੰਬਰ 22 ਦਰਜ ਕਰ ਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ। 
ਪ੍ਰਾਪਤ ਜਾਣਕਾਰੀ ਅਨੁਸਾਰ ਵਿਧਵਾ ਬਲਜੀਤ ਕੌਰ ਪਤਨੀ ਗੁਰਜਿੰਦਰ ਸਿੰਘ ਵਾਸੀ ਪਿੰਡ ਮਾਣਕ ਦੇਊਕੇ ਜ਼ਿਲਾ ਤਰਨਤਾਰਨ ਦੀ ਵਿਰਾਸਤੀ ਜਾਇਦਾਦ ਲੈਣ ਲਈ ਉਸਦੀਆਂ 8 ਨਨਾਣਾਂ ਨੇ ਮਾਣਯੋਗ ਅਦਾਲਤ ਵਿਚ ਕੇਸ ਦਾਇਰ ਕੀਤਾ ਹੋਇਆ ਸੀ। ਜਿਸ ਸਬੰਧੀ ਅਦਾਲਤ ਵੱਲੋਂ ਉਸਦੀਆਂ ਨਨਾਣਾਂ ਦੇ ਹੱਕ ਵਿਚ ਕੇਸ ਦਾ ਫੈਸਲਾ ਸੁਣਾਇਆ ਗਿਆ। ਇਸ ਸਬੰਧੀ ਮਾਲ ਮਹਿਕਮੇ ਦੇ ਪਟਵਾਰੀ ਅਮਰੀਕ ਸਿੰਘ ਪੁੱਤਰ ਆਤਮਾ ਸਿੰਘ ਵਾਸੀ ਨੌਰਗਾਬਾਦ ਜੋ ਕਿ ਭੈਲ ਢਾਏ ਵਾਲੇ ਵਿਖੇ ਬਤੌਰ ਪਟਵਾਰੀ ਤਾਇਨਾਤ ਸੀ ਨੇ ਬਲਜੀਤ ਕੌਰ ਪਾਸੋਂ ਇਕ ਲੱਖ ਰੁਪਏ ਦੀ ਮੰਗ ਕਰਨੀ ਇਸ ਲਈ ਸ਼ੁਰੂ ਕਰ ਦਿੱਤੀ ਕਿ ਉਹ ਅਦਾਲਤ ਦੇ ਹੁਕਮ ਦੇ ਅਨੁਸਾਰ ਵਿਰਾਸਤੀ ਜਾਇਦਾਦ ਨੂੰ ਉਸਦੀਆਂ ਨਨਾਣਾਂ ਦੇ ਹੱਕ ਵਿਚ ਦਰਜ ਕਰ ਦੇਵੇਗਾ। ਇਸ ਦੌਰਾਨ ਬਲਜੀਤ ਕੌਰ ਦਾ ਪਟਵਾਰੀ ਅਮਰੀਕ ਸਿੰਘ ਨਾਲ 60 ਹਜ਼ਾਰ ਰੁਪਏ ਵਿਚ ਇੰਤਕਾਲ ਬਲਜੀਤ ਕੌਰ ਦੇ ਹੱਕ ਵਿਚ ਦਰਜ ਕਰਨ ਦਾ ਸੌਦਾ ਤੈਅ ਹੋ ਗਿਆ। ਅੱਜ ਵਿਜੀਲੈਂਸ ਟੀਮ ਨੇ ਬਲਜੀਤ ਕੌਰ ਵੱਲੋਂ ਦਿੱਤੀ ਦਰਖਾਸਤ ਦੇ ਆਧਾਰ 'ਤੇ ਸ੍ਰੀ ਗੋਇੰਦਵਾਲ ਸਾਹਿਬ ਵਿਖੇ ਪਟਵਾਰੀ ਨੂੰ ਉਸਦੇ ਦਫਤਰ ਤੋਂ 20 ਹਜ਼ਾਰ ਰੁਪਏ ਦੀ ਪਹਿਲੀ ਕਿਸ਼ਤ (2000 ਵਾਲੇ 10 ਨੋਟ) ਨਾਲ ਇੰਸਪੈਕਟਰ ਗੁਰਜਿੰਦਰ ਸਿੰਘ ਢਿੱਲੋਂ ਦੀ ਅਗਵਾਈ ਵਾਲੀ ਟੀਮ ਜਿਸ ਵਿਚ ਖੇਤੀਬਾੜੀ ਵਿਭਾਗ ਦੇ ਸਰਬਰਿੰਦਰ ਸਿੰਘ ਅਤੇ ਸਤਪਾਲ ਸਿੰਘ ਸਰਕਾਰੀ ਗਵਾਹਾਂ ਦੀ ਹਾਜ਼ਰੀ ਵਿਚ ਟੀਮ ਨੇ ਰੰਗੇ ਹੱਥੀਂ ਕਾਬੂ ਕਰ ਲਿਆ। ਇਸ ਮੌਕੇ ਇੰਸਪੈਕਟਰ ਗੁਰਜਿੰਦਰ ਸਿੰਘ ਢਿੱਲੋਂ, ਏ. ਐੱਸ. ਆਈ. ਸੋਮਨਾਥ, ਏ. ਐੱਸ. ਆਈ. ਰਿਪਨਦੀਪ, ਸੁਖਦੇਵ ਸਿੰਘ ਆਦਿ ਹਾਜ਼ਰ ਸਨ।