ਦੂਜੀ ਜਮਾਤ ''ਚ ਪੜ੍ਹਦੀ 9 ਸਾਲਾ ਮਾਸੂਮ ਨਾਲ ਪਿੰਡ ਦੇ ਵਿਅਕਤੀ ਵਲੋਂ ਜਬਰ-ਜ਼ਨਾਹ
11/07/2019 5:44:35 PM
ਮਮਦੋਟ (ਸ਼ਰਮਾ, ਜਸਵੰਤ) - ਬਲਾਕ ਮਮਦੋਟ ਅਧੀਨ ਪੈਂਦੇ ਪਿੰਡ ਫੱਤੇਵਾਲਾ ਹਿਠਾੜ ਵਿਖੇ ਦੂਜੀ ਜਮਾਤ 'ਚ ਪੜ੍ਹਦੀ ਇਕ ਨਾਬਾਲਗ ਕੁੜੀ ਨਾਲ ਪਿੰਡ ਦੇ ਹੀ ਵਿਅਕਤੀ ਵਲੋਂ ਜਬਰ-ਜ਼ਨਾਹ ਕੀਤੇ ਜਾਣ ਦੀ ਸੂਚਨਾ ਮਿਲੀ ਹੈ। ਜਾਣਕਾਰੀ ਮੁਤਾਬਕ ਥਾਣਾ ਮਮਦੋਟ ਵਿਖੇ ਪੀੜਤ ਦੀ ਮਾਂ ਨੇ ਦੱਸਿਆ ਕਿ ਉਸ ਦੀ 9 ਸਾਲਾ ਨਾਬਾਲਗ ਬੱਚੀ ਸਰਕਾਰੀ ਪ੍ਰਾਇਮਰੀ ਸਕੂਲ ਫੱਤੇਵਾਲਾ ਪੜ੍ਹਦੀ ਹੈ। 4 ਨਵੰਬਰ ਨੂੰ ਮੇਰਾ ਘਰਵਾਲਾ ਵਿਸ਼ੰਬਰ ਸਿੰਘ ਕੰਮ ਕਰਨ ਲਈ ਬਾਹਰ ਗਿਆ ਹੋਇਆ ਸੀ ਅਤੇ ਮੈਂ ਬੱਚੀ ਨੂੰ ਸਕੂਲ ਭੇਜ ਕੇ ਮਰਗ ਦਾ ਅਫਸੋਸ ਕਰਨ ਕਿਸੇ ਦੇ ਘਰ ਗਈ ਹੋਈ ਸੀ। ਸਕੂਲ ਤੋਂ ਵਾਪਸ ਆਉਣ 'ਤੇ ਮੇਰੀ ਬੱਚੀ ਘਰ 'ਚ ਇਕੱਲੀ ਸੀ। ਮੇਰੀ ਗੈਰ-ਮੌਜੂਦਗੀ 'ਚ ਸੁਰਜੀਤ ਸਿੰਘ ਉਰਫ ਧੌਰੀ ਪੁੱਤਰ ਬਚਨ ਸਿੰਘ ਸਾਡੇ ਘਰ ਆਇਆ ਅਤੇ ਮੇਰੀ ਬੱਚੀ ਨਾਲ ਅਸ਼ਲੀਲ ਹਰਕਤਾਂ ਕਰਨ ਲੱਗ ਪਿਆ।
ਬੱਚੀ ਦੀ ਮਾਂ ਨੇ ਦੱਸਿਆ ਕਿ ਉਕਤ ਦੋਸ਼ੀ ਉਸ ਦੀ ਬੱਚੀ ਨਾਲ ਗਲਤ ਕੰਮ ਰਿਹਾ ਹੀ ਰਿਹਾ ਸੀ ਕਿ ਇਨ੍ਹੇ 'ਚ ਮੈਂ ਉਥੇ ਪਹੁੰਚ ਗਈ। ਮੇਰੇ ਰੌਲਾ ਪਾਉਣ 'ਤੇ ਕਥਿਤ ਦੋਸ਼ੀ ਮੈਨੂੰ ਮਾਰਨ ਦੀਆਂ ਧਮਕੀਆਂ ਦਿੰਦਾ ਹੋਇਆ ਭੱਜ ਗਿਆ। ਸੂਚਨਾ ਮਿਲਣ 'ਤੇ ਪੁੱਜੇ ਥਾਣਾ ਮਮਦੋਟ ਦੇ ਐੱਸ.ਐੱਚ.ਓ. ਸੁਖਪਾਲ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੇ ਬੱਚੀ ਦੀ ਮਾਂ ਦੇ ਬਿਆਨਾਂ 'ਤੇ ਕਥਿਤ ਦੋਸ਼ੀ ਸੁਰਜੀਤ ਸਿੰਘ ਧੌਰੀ ਪੁੱਤਰ ਬਚਨ ਸਿੰਘ ਖਿਲਾਫ ਮਾਮਲਾ ਦਰਜ ਕਰ ਲਿਆ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਬੱਚੀ ਨੂੰ ਮੈਡੀਕਲ ਵਾਸਤੇ ਸਿਵਲ ਹਸਪਤਾਲ ਭੇਜ ਦਿੱਤਾ।