ਟਰੇਨ ਹੇਠਾਂ ਆਉਣ ਕਾਰਨ ਬਿਜਲੀ ਬੋਰਡ ਦੇ ਸਹਾਇਕ ਲਾਈਨਮੈਨ ਦੀ ਮੌਤ

ਭੋਗਪੁਰ, (ਰਾਣਾ, ਰਜਿੰਦਰ)- ਬੁੱਧਵਾਰ ਸਵੇਰੇ ਆਦਮਪੁਰ ਚੌਕ ਰੇਲਵੇ ਫਾਟਕ 'ਤੇ ਟਰੇਨ ਹੇਠਾਂ ਆਉਣ ਕਾਰਨ ਭੋਗਪੁਰ ਦੇ ਰਾਧੇ ਕ੍ਰਿਸ਼ਨ ਮੰਦਰ ਦੇ ਪੁਜਾਰੀ ਤੇ ਬਿਜਲੀ ਬੋਰਡ ਦੇ ਸਹਾਇਕ ਲਾਈਨਮੈਨ ਕਿਸ਼ਨ ਪ੍ਰਸਾਦ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਰੇਲਵੇ ਪੁਲਸ ਪਚਰੰਗਾ ਦੇ ਚੌਕੀ ਇੰਚਾਰਜ ਅਮਰਜੀਤ ਸਿੰਘ ਨੇ ਮੌਕੇ 'ਤੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਕਿਸ਼ਨ ਪ੍ਰਸਾਦ ਰਾਧੇ ਕ੍ਰਿਸ਼ਨ ਮੰਦਰ 'ਚ ਪੁਜਾਰੀ ਦੀ ਸੇਵਾ ਕਰਨ ਦੇ ਨਾਲ-ਨਾਲ ਬਿਜਲੀ ਬੋਰਡ ਸਬ ਡਵੀਜ਼ਨ ਨੰਬਰ 2 'ਚ ਸਹਾਇਕ ਲਾਈਨਮੈਨ ਦੀ ਨੌਕਰੀ ਵੀ ਕਰਦਾ ਸੀ। ਸਵੇਰੇ ਦਫਤਰ ਜਾਣ ਸਮੇਂ ਉਹ ਰੇਲਵੇ ਲਾਈਨ ਪਾਰ ਕਰਦਿਆਂ ਪਠਾਨਕੋਟ ਤੋਂ ਜਲੰਧਰ ਜਾ ਰਹੀ ਟਰੇਨ ਦੀ ਲਪੇਟ 'ਚ ਆ ਗਿਆ ਤੇ ਉਸਦੀ ਮੌਤ ਹੋ ਗਈ। ਪੁਲਸ ਵੱਲੋਂ 174 ਦੀ ਕਾਰਵਾਈ ਕਰਕੇ ਲਾਸ਼ ਪੋਸਟਰਮਾਰਟਮ ਕਰਵਾ ਕੇ ਵਾਰਸਾਂ ਦੇ ਹਵਾਲੇ ਕਰ ਦਿੱਤੀ ਜਾਵੇਗੀ।
ਪ੍ਰੀ-ਮਚਿਓਰ ਰਿਟਾਇਰਮੈਂਟ ਲਈ ਕੀਤਾ ਹੋਇਆ ਸੀ ਅਪਲਾਈ
ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਕਿਸ਼ਨ ਪ੍ਰਸਾਦ ਨੇ ਬਿਜਲੀ ਬੋਰਡ ਤੋਂ ਪ੍ਰੀ-ਮਚਿਊਰ ਰਿਟਾਇਰਮੈਂਟ ਲੈਣ ਲਈ ਅਪਲਾਈ ਕੀਤਾ ਹੋਇਆ ਸੀ ਅਤੇ 31 ਦਸੰਬਰ ਨੂੰ ਕਿਸ਼ਨ ਪ੍ਰਸਾਦ ਨੇ ਰਿਟਾਇਰ ਹੋਣਾ ਸੀ। ਰਾਧੇ ਕ੍ਰਿਸ਼ਨ ਮੰਦਰ ਭੋਗਪੁਰ 'ਚ ਉਹ ਪਿਛਲੇ ਲਗਭਗ 25 ਸਾਲ ਤੋਂ ਪੁਜਾਰੀ ਦੀ ਸੇਵਾ ਨਿਭਾਅ ਰਿਹਾ ਸੀ।