ਆਂਗਣਵਾੜੀ ਜਾਣ ਵਾਲੇ ਮਾਸੂਮਾਂ ਦਾ ਰਾਸ਼ਣ ਵੀ ਸਰਕਾਰ ਨੇ ਕਿਸੇ ਹੋਰ ਨੂੰ ਖੁਆਇਆ

ਮੋਹਾਲੀ  (ਨਿਆਮੀਆਂ) - ਪੰਜਾਬ ਵਿਚ ਜਦੋਂ ਤੋਂ ਸੱਤਾ ਵਿਚ ਬਦਲਾਅ ਹੋਇਆ ਹੈ ਉਦੋਂ ਤੋਂ ਆਂਗਣਵਾੜੀ ਕੇਂਦਰਾਂ ਵਿਚ ਪੜ੍ਹ ਰਹੇ ਛੋਟੇ-ਛੋਟੇ ਬੱਚਿਆਂ ਲਈ ਕੇਂਦਰ ਸਰਕਾਰ ਵਲੋਂ ਭੇਜੀ ਜਾਂਦੀ ਖੁਰਾਕ ਅਤੇ ਹੋਰ ਸਮੱਗਰੀ ਕੇਂਦਰਾਂ ਵਿਚ ਨਹੀਂ ਭੇਜੀ ਜਾ ਰਹੀ ਜਿਸ ਕਰਕੇ ਇਨ੍ਹਾਂ ਬੱਚਿਆਂ ਨੂੰ ਖੁਰਾਕ ਦੇਣ ਲਈ ਵਰਕਰਾਂ ਕੋਲ ਕੁੱਝ ਵੀ ਨਹੀਂ ਹੈ। ਇਸੇ ਦੌਰਾਨ ਇਕ ਹੈਰਾਨੀਜਨਕ ਖੁਲਾਸਾ ਇਹ ਵੀ ਹੋਇਆ ਹੈ ਕਿ ਕੇਂਦਰ ਸਰਕਾਰ ਨੇ ਤਾਂ ਬੱਚਿਆਂ ਦੀ ਖੁਰਾਕ ਲਈ ਬਾਕਾਇਦਾ ਗ੍ਰਾਂਟ ਭੇਜ ਦਿੱਤੀ ਸੀ ਪਰ ਪੰਜਾਬ ਸਰਕਾਰ ਨੇ ਇਹ ਫੰਡ ਕਿਸੇ ਹੋਰ ਕੰਮ ਲਈ ਵਰਤ ਲਏ। ਇਸ ਗੱਲ ਦੀ ਭਾਵੇਂ ਪੁਸ਼ਟੀ ਨਹੀਂ ਹੋਈ ਹੈ ਪਰ ਇਕ ਗੱਲ ਸਾਫ ਹੈ ਕਿ ਪਿਛਲੇ 6 ਮਹੀਨਿਆਂ ਤੋਂ ਵੀ ਵੱਧ ਸਮੇਂ ਤੋਂ ਆਂਗਣਵਾੜੀ ਦੇ ਬੱਚਿਆਂ ਨੂੰ ਖੁਰਾਕ ਨਹੀਂ ਮਿਲੀ। ਇਸ ਸਬੰਧ ਵਿਚ ਪੰਜਾਬ ਆਂਗਣਵਾੜੀ ਮੁਲਾਜ਼ਮ ਯੂਨੀਅਨ ਦੀ ਪ੍ਰਧਾਨ ਹਰਗੋਬਿੰਦ ਕੌਰ ਨੇ ਦੱਸਿਆ ਕਿ ਮਿਡ ਡੇ ਮੀਲ ਲਈ ਤਾਂ ਅਧਿਆਪਕ ਆਪਣੇ ਪੱਲਿਓਂ ਪੈਸੇ ਖਰਚ ਲੈਂਦੇ ਹਨ ਪਰ ਆਂਗਣਵਾੜੀ ਵਰਕਰਾਂ ਦੀਆਂ ਇੰਨੀਆਂ ਤਨਖਾਹਾਂ ਨਹੀਂ ਕਿ ਉਹ ਆਪਣੇ ਪੱਲਿਓਂ ਪੈਸੇ ਖਰਚ ਕੇ ਬੱਚਿਆਂ ਲਈ ਖੁਰਾਕ ਲਿਆ ਸਕਣ। ਉਨ੍ਹਾਂ ਕਿਹਾ ਕਿ ਕੇਂਦਰ ਸਰਕਾਰ ਵਲੋਂ ਰਾਸ਼ਣ ਲਈ ਬਾਕਾਇਦਾ ਗ੍ਰਾਂਟ ਜਾਰੀ ਕੀਤੀ ਜਾ ਚੁੱਕੀ ਹੈ ਪਰ ਮਈ ਤੋਂ ਬਾਅਦ ਪੰਜਾਬ ਸਰਕਾਰ ਨੇ ਇਹ ਗ੍ਰਾਂਟ ਕਿਸੇ ਹੋਰ ਕੰਮਾਂ ਲਈ ਵਰਤ ਲਈ ਜਾਪਦੀ ਹੈ। ਉਨ੍ਹਾਂ ਕਿਹਾ ਕਿ ਬੱਚਿਆਂ ਦੇ ਰਾਸ਼ਣ ਵਿਚ ਉਚ ਪੱਧਰ 'ਤੇ ਕਾਫੀ ਘਾਲਾਮਾਲਾ ਹੋ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਜਦੋਂ ਸਰਕਾਰ ਇਹ ਰਾਸ਼ਣ ਜਾਰੀ ਕਰੇਗੀ ਤਾਂ ਵਿਭਾਗ ਵਲੋਂ ਪਿਛਲੇ ਮਹੀਨਿਆਂ ਦਾ ਰਾਸ਼ਣ ਨਹੀਂ ਭੇਜਿਆ ਜਾਣਾ ਬਲਕਿ ਹੁਣ ਤੋਂ ਬਾਅਦ ਅਗਲੇ ਮਹੀਨਿਆਂ ਲਈ ਹੀ ਰਾਸ਼ਣ ਦਿੱਤਾ ਜਾਣਾ ਹੈ। ਆਂਗਣਵਾੜੀ ਕੇਂਦਰਾਂ ਵਿਚ 3 ਤੋਂ 6 ਸਾਲ ਤਕ ਦੇ ਬੱਚਿਆਂ ਨੂੰ ਪੜ੍ਹਾਇਆ ਜਾਂਦਾ ਹੈ। ਇਨ੍ਹਾਂ ਨੂੰ ਕੇਂਦਰ ਸਰਕਾਰ ਵਲੋਂ ਸਮਾਜਿਕ ਭਲਾਈ ਵਿਭਾਗ ਰਾਹੀਂ ਖੁਰਾਕ ਵੀ ਦਿੱਤੀ ਜਾਂਦੀ ਹੈ।
ਜਦੋਂ ਹਰਗੋਬਿੰਦ ਕੌਰ ਤੋਂ ਬੱਚਿਆਂ ਨੂੰ ਦਿੱਤੀ ਜਾਂਦੀ ਖੁਰਾਕ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਦੱਸਿਆ ਕਿ ਲਗਭਗ 4 ਰੁਪਏ ਦਾ ਰਾਸ਼ਣ ਰੋਜ਼ਾਨਾ ਬੱਚਿਆਂ ਨੂੰ ਮਿਲਦਾ ਹੈ ਜਿਸ ਵਿਚ 6 ਮਹੀਨੇ ਤੋਂ ਇਕ ਸਾਲ ਤਕ ਦੇ ਬੱਚਿਆਂ ਨੂੰ 100 ਗ੍ਰਾਮ ਦਲੀਆ, 38 ਗ੍ਰਾਮ ਖੰਡ, 14 ਗ੍ਰਾਮ ਦੁੱਧ ਦਿੱਤਾ ਜਾਂਦਾ ਹੈ। ਖੀਰ ਬਣਾਉਣ ਲਈ 80 ਗ੍ਰਾਮ ਚਾਵਲ, 32 ਗ੍ਰਾਮ ਖੰਡ ਅਤੇ 12 ਗ੍ਰਾਮ ਦੁੱਧ ਮਿਲਦਾ ਹੈ ਅਤੇ 85 ਗ੍ਰਾਮ ਪੰਜੀਰੀ ਵੀ ਇਸ ਵਰਗ ਦੇ ਬੱਚਿਆਂ ਨੂੰ ਦਿੱਤੀ ਜਾਂਦੀ ਹੈ।
ਗਰਭਵਤੀ ਔਰਤਾਂ ਨੂੰ 110 ਗ੍ਰਾਮ ਦਲੀਆ, 44 ਗ੍ਰਾਮ ਖੰਡ ਅਤੇ 16 ਗ੍ਰਾਮ ਦੁੱਧ, ਖੀਰ ਲਈ 100 ਗ੍ਰਾਮ ਚਾਵਲ, 40 ਗ੍ਰਾਮ ਖੰਡ ਅਤੇ 16 ਗ੍ਰਾਮ ਦੁੱਧ ਪਾਊਡਰ ਰੂਪ ਵਿਚ ਮਿਲਦਾ ਹੈ। ਗਰਭਵਤੀ ਔਰਤਾਂ ਨੂੰ 100 ਗ੍ਰਾਮ ਪੰਜੀਰੀ ਵੀ ਦਿੱਤੀ ਜਾਂਦੀ ਹੈ।
ਉਨ੍ਹਾਂ ਦੱਸਿਆ ਕਿ 3 ਤੋਂ 6 ਸਾਲ ਦੇ ਬੱਚਿਆਂ ਨੂੰ ਨਾਸ਼ਤਾ ਕਰਵਾਉਣ ਲਈ 20 ਗ੍ਰਾਮ ਆਟਾ, 15 ਗ੍ਰਾਮ ਖੰਡ ਅਤੇ 5 ਗ੍ਰਾਮ ਘਿਓ ਦਾ ਹਲਵਾ ਬਣਾਉਣ ਲਈ ਰਾਸ਼ਣ ਮਿਲਦਾ ਹੈ, ਪੀਣ ਲਈ 5 ਗ੍ਰਾਮ ਦੁੱਧ ਪਾਊਡਰ ਅਤੇ 1 ਗ੍ਰਾਮ ਖੰਡ ਮਿਲਦੀ ਹੈ। ਇਹ ਰਾਸ਼ਣ ਉਨ੍ਹਾਂ ਦੇ ਦੁਪਹਿਰ ਵਾਲੇ ਖਾਣੇ ਵਿਚੋਂ ਕੱਟ ਲਿਆ ਜਾਂਦਾ ਹੈ ਅਤੇ ਉਨ੍ਹਾਂ ਨੂੰ 85 ਗ੍ਰਾਮ ਦਲੀਆ, 32 ਗ੍ਰਾਮ ਖੰਡ ਅਤੇ 8 ਗ੍ਰਾਮ ਦੁੱਧ, ਖੀਰ ਬਣਾਉਣ ਲਈ 70 ਗ੍ਰਾਮ ਚਾਵਲ, 20 ਗ੍ਰਾਮ ਖੰਡ ਤੇ 8 ਗ੍ਰਾਮ ਦੁੱਧ ਅਤੇ 65 ਗ੍ਰਾਮ ਪੰਜੀਰੀ ਰਾਸ਼ਣ ਵਜੋਂ ਦਿੱਤੀ ਜਾਂਦੀ ਹੈ। ਉਨ੍ਹਾਂ ਕਿਹਾ ਕਿ ਛੋਟੇ-ਛੋਟੇ ਬੱਚਿਆਂ ਲਈ ਜੋ ਗ੍ਰਾਮਾਂ ਵਿਚ ਦੁੱਧ ਅਤੇ ਰਾਸ਼ਣ ਮਿਲਦਾ ਹੈ ਉੁਸ ਲਈ ਆਈ ਗ੍ਰਾਂਟ ਵੀ ਪੰਜਾਬ ਸਰਕਾਰ ਛਕ ਗਈ ਹੈ।