ਯੋ-ਯੋ ਫਿੱਟਨੈਸ ਟੈਸਟ ਦੇ ਬਾਅਦ ਹੋਵੇਗੀ ਖਿਡਾਰੀਆਂ ਦੀ ਚੋਣ

ਨਵੀਂ ਦਿੱਲੀ— ਭਾਰਤੀ ਕ੍ਰਿਕਟ ਬੋਰਡ (ਬੀ.ਸੀ.ਸੀ.ਆਈ.) ਨੇ ਸ਼ਰਮਿੰਦਗੀ ਤੋਂ ਬਚਣ ਲਈ ਹੁਣ ਯੋ ਯੋ ਟੈਸਟ ਦੇ ਬਾਅਦ ਹੀ ਰਾਸ਼ਟਰੀ ਟੀਮ ਲਈ ਖਿਡਾਰੀਆਂ ਦੀ ਚੋਣ ਕਰਨ ਦਾ ਫੈਸਲਾ ਕੀਤਾ ਹਨ । ਬੋਰਡ ਨੂੰ ਹਾਲ ਹੀ ਵਿੱਚ ਉਸ ਸਮੇਂ ਸ਼ਰਮਿੰਦਗੀ ਦਾ ਸਾਹਮਣਾ ਕਰਨਾ ਪਿਆ ਸੀ ਜਦੋਂ ਟੈਸਟ ਟੀਮ ਵਿੱਚ ਸ਼ਾਮਲ ਮੁਹੰਮਦ ਸ਼ਮੀ ਅਤੇ ਇਕ ਰੋਜ਼ਾ ਟੀਮ ਲਈ ਚੁਣੇ ਗਏ ਅੰਬਾਤੀ ਰਾਇਡੂ ਯੋ-ਯੋ ਟੈਸਟ ਵਿੱਚ ਅਸਫਲ ਹੋ ਗਏ ਸਨ । ਰਾਸ਼ਟਰੀ ਟੀਮ ਲਈ ਚੁਣੇ ਗਏ ਇਨ੍ਹਾਂ ਖਿਡਾਰੀਆਂ ਤੋਂ ਇਲਾਵਾ ਇੰਗਲੈਂਡ ਦੌਰੇ ਲਈ ਚੁਣੇ ਗਏ ਭਾਰਤ ਏ ਦੇ ਖਿਡਾਰੀ ਸੰਜੂ ਸੈਮਸਨ ਵੀ ਇਸ ਟੈਸਟ ਵਿੱਚ ਅਸਫਲ ਰਹੇ ਸਨ । ਅਫਗਾਨਿਸਤਾਨ ਟੈਸਟ, ਭਾਰਤ ਅਤੇ ਭਾਰਤ ਏ ਦੇ ਇੰਗਲੈਂਡ ਦੌਰੇ ਲਈ ਟੀਮ ਦੀ ਘੋਸ਼ਣਾ ਪਿਛਲੇ ਮਹੀਨੇ ਆਈ.ਪੀ.ਐੱਲ ਦੇ ਦੌਰਾਨ ਕੀਤੀ ਗਈ ਸੀ ।        

ਇਸ ਮੁੱਦੇ ਉੱਤੇ ਕ੍ਰਿਕਟ ਅਨੁਸ਼ਾਸਕਾਂ ਦੀ ਕਮੇਟੀ ਦੀ ਬੈਠਕ ਵਿੱਚ ਚਰਚਾ ਕੀਤੀ ਗਈ ਜਿਸ ਵਿੱਚ ਸੀ.ਓ.ਏੇ. ਪ੍ਰਮੁੱਖ ਵਿਨੋਦ ਰਾਏ, ਡਾਇਨਾ ਇਡੁਲਜੀ, ਬੀਸੀਸੀਆਈ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਰਾਹੁਲ ਜੌਹਰੀ ਅਤੇ ਕ੍ਰਿਕਟ ਸੰਚਾਲਨ ਦੇ ਮਹਾਪ੍ਰਬੰਧਕ ਸਬਾ ਕਰੀਮ ਮੌਜੂਦ ਸਨ । ਬੀ.ਸੀ.ਸੀ.ਆਈ. ਦੇ ਇੱਕ ਅਧਿਕਾਰੀ ਨੇ ਦੱਸਿਆ, ''ਅੱਗੇ ਤੋਂ ਖਿਡਾਰੀਆਂ ਦੀ ਚੋਣ ਫਿੱਟਨਸ ਟੈਸਟ ਵਿੱਚ ਸਫਲ ਹੋਣ ਦੇ ਬਾਅਦ ਹੀ ਕੀਤੀ ਜਾਵੇਗੀ ।  ਇੰਗਲੈਂਡ ਦੌਰੇ ਲਈ ਟੀਮ ਦੀ ਚੋਣ ਆਈ.ਪੀ.ਐੱਲ  ਦੇ ਦੌਰਾਨ ਹੋਈ ਸੀ। ਇਸ ਲਈ ਖਿਡਾਰੀ ਚੋਣ ਦੇ ਬਾਅਦ ਫਿੱਟਨੈਸ ਟੈਸਟ ਲਈ ਉਪਲੱਬਧ ਹੋਏ ।'' ਉਨ੍ਹਾਂ ਨੇ ਕਿਹਾ, ''ਚੋਣ ਦੇ ਬਾਅਦ ਟੈਸਟ ਹੋਣ ਨਾਲ ਖਿਡਾਰੀ ਅਸਹਿਜ ਹਾਲਤ ਵਿੱਚ ਆ ਜਾਂਦੇ ਹਨ ਅਤੇ ਅੱਗੇ ਤੋਂ ਅਜਿਹਾ ਨਹੀਂ ਹੋਵੇਗਾ ।'' ਰਾਇਡੂ ਨੇ ਆਈ.ਪੀ.ਐੱਲ ਵਿੱਚ ਦਮਦਾਰ ਪ੍ਰਦਰਸ਼ਨ ਦੇ ਬੂਤੇ ਇਕ ਰੋਜ਼ਾ ਟੀਮ ਵਿੱਚ ਵਾਪਸੀ ਕੀਤੀ ਸੀ ਪਰ ਬੋਰਡ ਦੁਆਰਾ ਫਿੱਟਨੈਸ ਲਈ ਤੈਅ ਮਿਆਰਾਂ ਉੱਤੇ ਉਹ ਖਰੇ ਨਹੀਂ ਉਤਰੇ ਅਤੇ ਉਨ੍ਹਾਂ ਦੀ ਜਗ੍ਹਾ ਇੰਗਲੈਂਡ ਦੌਰੇ 'ਤੇ ਹੋਣ ਵਾਲੀ ਇਕ ਰੋਜ਼ਾ ਲੜੀ ਲਈ ਟੀਮ ਵਿੱਚ ਸੁਰੇਸ਼ ਰੈਨਾ ਨੂੰ ਸ਼ਾਮਿਲ ਕੀਤਾ ਗਿਆ ਹੈ ।        

ਪਿਛਲੇ ਕੁਝ ਸਮੇ ਤੋਂ ਮੈਦਾਨ ਤੋਂ ਬਾਹਰ ਦੀਆਂ ਗਤੀਵਿਧੀਆਂ ਦੇ ਕਾਰਨ ਸੂਰਖੀਆਂ ਵਿੱਚ ਰਹੇ ਸ਼ਮੀ ਵੀ ਯੋ-ਯੋ ਟੈਸਟ ਵਿੱਚ ਸਫਲ ਨਹੀਂ ਹੋ ਸਕੇ ਅਤੇ ਅਫਗਾਨਿਸਤਾਨ ਟੈਸਟ ਲਈ ਟੀਮ ਵਿੱਚ ਉਨ੍ਹਾਂ ਦੀ ਜਗ੍ਹਾ ਦਿੱਲੀ ਦੇ ਤੇਜ ਗੇਂਦਬਾਜ਼ ਨਵਦੀਨ ਸੈਨੀ ਨੂੰ ਸ਼ਾਮਿਲ ਕੀਤਾ ਗਿਆ ਸੀ । ਸ਼ਮੀ ਨੂੰ ਇੰਗਲੈਂਡ ਦੇ ਖਿਲਾਫ ਹੋਣ ਵਾਲੀ ਪੰਜ ਮੈਚਾਂ ਦੀ ਟੈਸਟ ਲੜੀ ਲਈ ਟੀਮ ਚੋਣ ਤੋਂ ਪਹਿਲਾਂ ਫਿੱਟਨੈਸ ਸਾਬਤ ਕਰਣ ਦਾ ਇੱਕ ਹੋਰ ਮੌਕਾ ਮਿਲੇਗਾ । ਸੀ.ਓ.ਏ. ਦੀ ਬੈਠਕ ਵਿੱਚ ਇਹ ਵੀ ਫੈਸਲਾ ਕੀਤਾ ਗਿਆ ਕਿ ਅਗਲੀ ਰਣਜੀ ਟਰਾਫੀ ਵਿੱਚ ਸ਼ਾਮਿਲ ਹੋਣ ਵਾਲੀਆਂ ਬਿਹਾਰ, ਉਤਰਾਖੰਡ ਅਤੇ ਉੱਤਰ-ਪੂਰਬ ਦੀਆਂ ਨਵੀਆਂ ਟੀਮਾਂ ਗਰੁਪ ਡੀ ਵਿੱਚ ਇੱਕ ਦੂਜੇ ਦੇ ਖਿਲਾਫ ਖੇਡਣਗੀਆਂ ਅਤੇ ਸਿਰਫ ਇਕ ਟੀਮ ਕੁਆਰਟਰ ਫਾਈਨਲ ਲਈ ਕੁਆਲੀਫਾਈ ਕਰੇਗੀ ।