AUS vs NZ : ਆਸਟਰੇਲੀਆ ਨਿਊਜ਼ੀਲੈਂਡ ਨੂੰ ਪਛਾੜ ਕੇ ਬਣਿਆ ਚੈਂਪੀਅਨ
02/21/2018 5:01:32 PM
ਈਡਨ ਪਾਰਕ, (ਨਿਊਜ਼ੀਲੈਂਡ)— ਆਸਟਰੇਲੀਆਈ ਸਲਾਮੀ ਬੱਲੇਬਾਜ਼ ਡਾਰਸ਼ੀ ਸ਼ਾਰਟ ਨੇ ਆਈ.ਪੀ.ਐੱਲ.-2018 ਤੋਂ ਪਹਿਲਾਂ ਇੱਕ ਬਹੁਤ ਵੱਡਾ ਰਿਕਾਰਡ ਆਪਣੇ ਨਾਂ ਕਰ ਲਿਆ ਹੈ । 27 ਸਾਲ ਦੇ ਡਾਰਸ਼ੀ ਨੇ ਨਿਊਜ਼ੀਲੈਂਡ ਦੇ ਖਿਲਾਫ ਈਡਨ ਪਾਰਕ ਵਿੱਚ ਤਿਕੋਣੀ ਟੀ-20 ਦੇ ਫਾਈਨਲ 'ਚ 28 ਗੇਂਦਾਂ ਵਿੱਚ ਅਰਧ ਸੈਂਕੜਾ ਪੂਰਾ ਕੀਤਾ । ਇਸਦੇ ਨਾਲ ਹੀ ਉਨ੍ਹਾਂ ਦੇ ਨਾਂ ਇਕ ਅਨੋਖਾ ਰਿਕਾਰਡ ਜੁੜ ਗਿਆ ਹੈ । ਡਾਰਸ਼ੀ ਨੂੰ ਰਾਜਸਥਾਨ ਰਾਇਲਸ ਨੇ 4 ਕਰੋੜ ਰੁਪਏ ਵਿੱਚ ਖਰੀਦਿਆ ਹੈ । ਆਈ.ਪੀ.ਐੱਲ ਦੇ ਮੁਕਾਬਲੇ 7 ਅਪ੍ਰੈਲ ਤੋਂ ਸ਼ੁਰੂ ਹੋਣਗੇ । ਆਸਟਰੇਲੀਆ ਨੇ ਇਹ ਫਾਈਨਲ 19 ਦੌੜਾਂ ( ਡੀ.ਐੱਲ. ਮੈਥਡ) ਨਾਲ ਜਿੱਤ ਲਿਆ ।
ਦਰਅਸਲ, ਡਾਰਸ਼ੀ ਕਿਸੇ ਟੀ-20 ਇੰਟਰਨੈਸ਼ਨਲ ਦੇ ਫਾਈਨਲ ਵਿੱਚ ਸਭ ਤੋਂ ਘੱਟ ਗੇਂਦਾਂ ਵਿੱਚ ਫਿਫਟੀ ਲਗਾਉਣ ਵਾਲੇ ਖਿਡਾਰੀ ਬਣ ਗਏ । ਇਸਦੇ ਪਹਿਲਾਂ ਇਹ ਰਿਕਾਰਡ ਸ਼੍ਰੀਲੰਕਾਈ ਦਿੱਗਜ ਕੁਮਾਰ ਸੰਗਕਾਰਾ ਅਤੇ ਇੰਗਲਿਸ਼ ਬੱਲੇਬਾਜ਼ ਜੋ ਰੂਟ ਦੇ ਨਾਂ ਸੀ । ਦੋਨਾਂ ਨੇ 33-33 ਗੇਂਦਾਂ ਵਿੱਚ ਕ੍ਰਮਵਾਰ 2014 ਅਤੇ 2016 ਦੇ ਟੀ-20 ਵਰਲਡ ਕਪ ਦੇ ਫਾਈਨਲ ਵਿੱਚ ਫਿਫਟੀ ਲਗਾਈ ਸੀ । ਇਸ ਤੋਂ ਪਹਿਲਾਂ ਈਡਨ ਪਾਰਕ ਉੱਤੇ ਡਾਰਸ਼ੀ ਨੇ 76 ਦੌੜਾਂ ਬਣਾਈਆਂ ਸਨ, ਜਦੋਂ ਨਿਊਜ਼ੀਲੈਂਡ ਦੇ ਖਿਲਾਫ 244 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਆਸਟਰੇਲੀਆਈ ਟੀਮ ਨੇ 7 ਗੇਂਦਾਂ ਬਾਕੀ ਰਹਿੰਦੇ ਇਹ ਮੁਕਾਬਲਾ 5 ਵਿਕਟਾਂ ਨਾਲ ਜਿੱਤ ਲਿਆ ਸੀ । ਜਿਸਦੇ ਨਾਲ ਟੀ-20 ਇੰਟਰਨੈਸ਼ਨਲ ਵਿੱਚ ਸਫਲਤਾਪੂਰਵਕ ਟੀਚੇ ਦਾ ਪਿੱਛਾ ਕਰਨ ਦਾ ਵਰਲਡ ਰਿਕਾਰਡ ਬਣਿਆ ।
ਆਸਟਰੇਲੀਆਈ ਗੇਂਦਬਾਜ਼ਾਂ ਨੇ ਆਪਣੀ ਛੋਟੀ ਬਾਂਉਡਰੀ ਲਈ ਚਰਚਾ ਵਿੱਚ ਰਹੇ ਈਡਨ ਪਾਰਕ ਵਿੱਚ ਨਿਊਜ਼ੀਲੈਂਡ ਨੂੰ 9 ਵਿਕਟ ਉੱਤੇ 150 ਦੌੜਾਂ ਬਣਾਉਣ ਦਿੱਤੀਆਂ ।ਆਸਟਰੇਲੀਆਈ ਗੇਂਦਬਾਜ਼ਾਂ ਨੇ ਇਸ ਮੈਦਾਨ ਉੱਤੇ 243 ਦੌੜਾਂ ਲੁਟਾਈਆਂ ਸਨ, ਪਰ ਉਨ੍ਹਾਂ ਨੇ ਅੱਜ ਇਸਦਾ ਬਦਲਾ ਚੁਕਤਾ ਕਰਦੇ ਹੋਏ ਕੀਵੀ ਬੱਲੇਬਾਜ਼ਾਂ ਉੱਤੇ ਰੋਕ ਲਗਾਈ ਰੱਖੀ । ਖੱਬੇ ਹੱਥ ਦੇ ਸਪਿਨਰ ਐਸ਼ਟਨ ਏਗਰ ਨੇ 27 ਦੌੜਾਂ ਦੇ ਕੇ 3 ਵਿਕਟ ਲਏ, ਜੋ ਉਨ੍ਹਾਂ ਦੇ ਕਰੀਅਰ ਦਾ ਸਰਵਸ਼੍ਰੇਸ਼ਠ ਪ੍ਰਦਰਸ਼ਨ ਹੈ । ਕੇਨ ਰਿਚਰਡਸਨ ਅਤੇ ਐਂਡ੍ਰਿਊ ਟਾਈ ਨੇ ਦੋ-ਦੋ ਵਿਕਟ ਹਾਸਲ ਕੀਤੇ ।
ਨਿਊਜ਼ੀਲੈਂਡ ਦੇ ਬੱਲੇਬਾਜ਼ਾਂ ਨੇ ਘਟੀਆ ਪ੍ਰਦਰਸ਼ਨ ਕੀਤਾ । ਉਸ ਦੇ ਵੱਲੋਂ ਰਾਸ ਟੇਲਰ ਨੇ 38 ਗੇਂਦਾਂ ਉੱਤੇ ਸਭ ਤੋਂ ਜਿਆਦਾ ਅਜੇਤੂ 43 ਦੌੜਾਂ ਬਣਾਈਆਂ । ਉਨ੍ਹਾਂ ਦੇ ਇਲਾਵਾ ਕਾਲਿਨ ਮੁਨਰੋ ਨੇ 29 ਅਤੇ ਪਿਛਲੇ ਮੈਚ ਵਿੱਚ ਸੈਂਕੜਾ ਮਾਰਨ ਵਾਲੇ ਮਾਰਟਿਨ ਗਪਟਿਲ ਨੇ 21 ਦੌੜਾਂ ਬਣਾਈਆਂ । ਇਸ ਮੈਦਾਨ ਦੀ ਬਾਉਂਡਰੀ ਭਾਵੇਂ ਛੋਟੀ ਹੈ । ਪਰ ਨਿਊਜ਼ੀਲੈਂਡ ਵੱਲੋਂ ਸਿਰਫ ਪੰਜ ਛੱਕੇ ਲੱਗੇ । ਨਿਊਜ਼ੀਲੈਂਡ ਨੇ ਟਾਸ ਜਿੱਤਕੇ ਪਹਿਲਾਂ ਬੱਲੇਬਾਜ਼ੀ ਦਾ ਫੈਸਲਾ ਕੀਤਾ ਸੀ ।
ਆਸਟਰੇਲੀਆ ਵਲੋਂ ਡੇਵਿਡ ਵਾਰਨਰ (25) ਅਤੇ ਡਾਰਸ਼ੀ (50) ਨੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਪਹਿਲੇ ਵਿਕਟ ਲਈ 72 ਦੌੜਾਂ ਜੋੜੀਆਂ । ਸਕੋਰ ਜਦੋਂ 14.4 ਓਵਰ ਵਿੱਚ 121/3 ਸੀ, ਉਦੋਂ ਮੀਂਹ ਦੀ ਵਜ੍ਹਾ ਕਰਕੇ ਮੈਚ ਰੁਕਿਆ ਅਤੇ ਇਸਦੇ ਬਾਅਦ ਆਸਟਰੇਲੀਆ ਨੂੰ ਡਕਵਰਥ ਲੁਈਸ ਸਿਸਟਮ ਦੇ ਤਹਿਤ 19 ਦੌੜਾਂ ਨਾਲ ਜੇਤੂ ਘੋਸ਼ਿਤ ਕਰ ਦਿੱਤਾ ਗਿਆ । ਐਰੋਨ ਫਿੰਚ (18) ਅਤੇ ਗਲੇਨ ਮੈਕਸਵੇਲ (20) ਅਜੇਤੂ ਰਹੇ ।
