ਪਾਕਿਸਤਾਨ ਨੇ 8 ਤੋਂ ਵਧ ਭਾਰਤੀ ਕਿਸ਼ਤੀਆਂ, 50 ਤੋਂ ਵਧ ਮਛੇਰਿਆਂ ਨੂੰ ਫੜਿਆ

ਪੋਰਬੰਦਰ— ਗੁਜਰਾਤ ਤੱਟ ਤੋਂ ਦੂਰ ਅਰਬ ਸਾਗਰ ''ਚ ਸ਼ੁੱਕਰਵਾਰ ਨੂੰ ਇਕ ਪਾਕਿਸਤਾਨੀ ਕਿਸ਼ਤੀ ਅਤੇ ਇਸ ''ਤੇ ਸਵਾਰ 9 ਲੋਕਾਂ ਨੂੰ ਫੜੇ ਜਾਣ ਦੇ ਇਕ ਦਿਨ ਬਾਅਦ ਸ਼ਨੀਵਾਰ ਨੂੰ ਪਾਕਿਸਤਾਨੀ ਮਰੀਨ ਸੁਰੱਖਿਆ ਏਜੰਸੀ ਨੇ ਬਦਲਾ ਲੈਣ ਦੀ ਨੀਅਤ ਨਾਲ ਜਖੌ ਤੱਟ ਤੋਂ ਦੂਰ ਕੌਮਾਂਤਰੀ ਜਲ ਸਰਹੱਦ ਕੋਲੋਂ 8 ਤੋਂ ਵਧ ਭਾਰਤੀ ਕਿਸ਼ਤੀਆਂ ਅਤੇ ਇਨ੍ਹਾਂ ''ਤੇ ਸਵਾਰ 50 ਤੋਂ ਵਧ ਮਛੇਰਿਆਂ ਨੂੰ ਫੜ ਲਿਆ। ਰਾਸ਼ਟਰੀ ਮਛੇਰਾ ਮੰਚ ਦੇ ਸਕੱਤਰ ਮਨੀਸ਼ ਲੋਢਾਰੀ ਨੇ ਸ਼ੱਕ ਜ਼ਾਹਰ ਕੀਤਾ ਕਿ ਫੜੀਆਂ ਗਈਆਂ ਭਾਰਤੀ ਕਿਸ਼ਤੀਆਂ ਦੀ ਗਿਣਤੀ ਹੋਰ ਵਧ ਹੋ ਸਕਦੀ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਗੁਜਰਾਤ ਦੇ ਔਖਾ ਅਤੇ ਮਾਂਗਰੋਲ ਤੋਂ ਸਮੁੰਦਰ ''ਚ ਮੱਛੀ ਫੜਨ ਗਈਆਂ ਤਿੰਨ ਕਿਸ਼ਤੀਆਂ ਅਤੇ ਇਨ੍ਹਾਂ ''ਤੇ ਸਵਾਰ 18 ਮਛੇਰਿਆਂ ਨੂੰ ਪਹਿਲਾਂ ਪਾਕਿਸਤਾਨੀ ਮਰੀਨ ਨੇ ਫੜ ਲਿਆ। ਇਸ ਤੋਂ ਬਾਅਦ ਇਨ੍ਹਾਂ ਸਥਾਨਾਂ ਤੋਂ ਗਈਆਂ 5 ਹੋਰ ਕਿਸ਼ਤੀਆਂ ਅਤੇ ਕਰੀਬ 30 ਮਛੇਰਿਆਂ ਨੂੰ ਫੜਿਆ ਗਿਆ। 
ਦੱਸਿਆ ਜਾ ਰਿਹਾ ਹੈ ਕਿ ਕੌਮਾਂਤਰੀ ਜਲ ਸਰਹੱਦ ਨੇੜੇ ਪਾਕਿਸਤਾਨੀ ਮਰੀਨ ਦੀ ਖਾਸੀ ਹੱਲ-ਚੱਲ ਹੈ ਅਤੇ ਫੜੀਆਂ ਗਈਆਂ ਭਾਰਤੀ ਕਿਸ਼ਤੀਆਂ ਦੀਆਂ ਗਿਣਤੀ ਹੋਰ ਵਧ ਸਕਦੀ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਪਾਕਿਸਤਾਨ ਨੇ ਇਹ ਕਾਰਵਾਈ ਸ਼ੁੱਕਰਵਾਰ ਨੂੰ ਉਸ ਦੀ ਕਿਸ਼ਤੀ ਦੇ ਫੜੇ ਜਾਣ ਦੇ ਮੱਦੇਨਜ਼ਰ ਭਾਰਤ ''ਤੇ ਦਬਾਅ ਬਣਾਉਣ ਲਈ ਕੀਤੀ ਹੈ। ਜ਼ਿਕਰਯੋਗ ਹੈ ਕਿ ਪਿਛਲੇ ਕਰੀਬ 7 ਮਹੀਨਿਆਂ ''ਚ ਪਾਕਿਸਤਾਨ ਨੇ ਗੁਜਰਾਤ ਦੀਆਂ ਹੀ 60 ਤੋਂ ਵਧ ਕਿਸ਼ਤੀਆਂ ਅਤੇ ਇਨ੍ਹਾਂ ''ਤੇ ਸਵਾਰ 370 ਤੋਂ ਵਧ ਮਛੇਰਿਆਂ ਨੂੰ ਫੜਿਆ ਹੈ। ਸਿਰਫ ਇਸ ਸਾਲ ਜਨਵਰੀ ਤੋਂ ਹੁਣ ਤੱਕ ਪਾਕਿਸਤਾਨ ਨੇ 35 ਅਜਿਹੀਆਂ ਕਿਸ਼ਤੀਆਂ ਅਤੇ 200 ਤੋਂ ਵਧ ਮਛੇਰਿਆਂ ਨੂੰ ਫੜਿਆ ਹੈ। ਇਸ ਦੌਰਾਨ ਭਾਰਤੀ ਤੱਟ ਰੱਖਿਅਕ ਦਲ ਵੱਲੋਂ ਫੜੀ ਗਈ ਪਾਕਿਸਤਾਨੀ ਕਿਸ਼ਤੀ ਅਤੇ ਇਸ ''ਤੇ ਸਵਾਰ 9 ਲੋਕਾਂ ਨੂੰ ਜਖੌ ਮਰੀਨ ਪੁਲਸ ਨੂੰ ਸੌਂਪ ਦਿੱਤਾ ਗਿਆ ਹੈ। ਇਨ੍ਹਾਂ ਕਲੋਂ ਕੋਈ ਇਤਰਾਜ਼ਯੋਗ ਵਸਤੂ ਨਹੀਂ ਮਿਲੀ ਹੈ।