PM ਬਣਨਾ ਚਾਹੁੰਦੇ ਹਨ ਨਿਤੀਸ਼, ਇਸ ਲਈ ਉਨ੍ਹਾਂ ਨੇ ਭਾਜਪਾ ਨੂੰ ਦਿੱਤਾ ਧੋਖਾ : ਅਮਿਤ ਸ਼ਾਹ

ਪੂਰਨੀਆ (ਭਾਸ਼ਾ)- ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਪ੍ਰਧਾਨ ਮੰਤਰੀ ਬਣਨ ਦੀ ਇੱਛਾ ਕਾਰਨ ਬਿਹਾਰ ਦੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨੇ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨੂੰ ਧੋਖਾ ਕੀਤਾ ਅਤੇ ਰਾਸ਼ਟਰੀ ਜਨਤਾ ਦਲ (ਰਾਜਦ) ਅਤੇ ਕਾਂਗਰਸ ਨਾਲ ਹੱਥ ਮਿਲਾ ਲਿਆ। ਅਮਿਤ ਸ਼ਾਹ ਨੇ ਦਾਅਵਾ ਕੀਤਾ ਕਿ ਭਾਜਪਾ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ 'ਚ ਪੂਰਨ ਬਹੁਮਤ ਨਾਲ ਸਰਕਾਰ ਬਣਾਏਗੀ। ਨਾਲ ਹੀ ਉਨ੍ਹਾਂ ਦੋਸ਼ ਲਗਾਇਆ ਕਿ ਕੁਮਾਰ ਦੀ ਕੋਈ ਵਿਚਾਰਧਾਰਾ ਨਹੀਂ ਹੈ, ਇਸ ਲਈ ਉਨ੍ਹਾਂ ਨੇ ਜਾਤੀ ਆਧਾਰਤ ਰਾਜਨੀਤੀ ਲਈ ਸਮਾਜਵਾਦ ਨੂੰ ਤਿਆਗ ਦਿੱਤਾ। ਸ਼ਾਹ ਨੇ ਇਕ ਰੈਲੀ 'ਚ ਕਿਹਾ,''ਨਿਤੀਸ਼ ਜੀ, ਤੁਸੀਂ ਇਹੀ 2014 'ਚ ਕੀਤਾ ਸੀ। ਸਾਲ 2024 ਦੀਆਂ ਲੋਕ ਸਭਾ ਚੋਣਾਂ 'ਚ ਜਨਤਾ ਬਿਹਾਰ 'ਚ ਮਹਾਗਠਜੋੜ ਨੂੰ ਉਖਾੜ ਦੇਵੇਗੀ। ਸਾਲ 2025 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਬਾਅਦ ਭਾਜਪਾ ਪੂਰਨ ਬਹੁਮਤ ਨਾਲ ਸਰਕਾਰ ਬਣਾਏਗੀ।

ਉਨ੍ਹਾਂ ਕਿਹਾ,''ਅਸੀਂ ਸੇਵਾ ਅਤੇ ਵਿਕਾਸ ਦੀ ਰਾਜਨੀਤੀ 'ਚ ਭਰੋਸਾ ਰੱਖਦੇ ਹਨ, ਸੁਆਰਥ ਅਤੇ ਸੱਤਾ ਦੀ ਰਾਜਨੀਤੀ 'ਚ ਨਹੀਂ। ਪ੍ਰਧਾਨ ਮੰਤਰੀ ਬਣਨ ਦੀ ਇੱਛਾ 'ਚ ਨਿਤੀਸ਼ ਕੁਮਾਰ ਨੇ ਧੋਖਾ ਦਿੱਤਾ ਅਤੇ ਹੁਣ ਰਾਜਦ ਅਤੇ ਕਾਂਗਰਸ ਦੀ ਗੋਦ 'ਚ ਜਾ ਬੈਠੇ ਹਨ।'' ਸ਼ਾਹ ਨੇ ਕਿਹਾ ਕਿ ਬਿਹਾਰ ਦੇ ਮੁੱਖ ਮੰਤਰੀ ਦੀ ਸਿਰਫ਼ ਇਕ ਹੀ ਵਿਚਾਰਧਾਰਾ ਹੈ ਕਿ- 'ਮੇਰੀ ਕੁਰਸੀ ਬਚੀ ਰਹਿੰਦੀ ਚਾਹੀਦੀ ਹੈ।' ਸ਼ਾਹ ਬਿਹਾਰ ਦੇ ਸੀਮਾਂਚਲ ਖੇਤਰ ਦੇ 2 ਦਿਨਾ ਦੌਰੇ 'ਤੇ ਹਨ ਅਤੇ ਉਨ੍ਹਾਂ ਦਾ ਸੰਸਦ ਮੈਂਬਰਾਂ, ਵਿਧਾਇਕਾਂ ਅਤੇ ਵੱਖ-ਵੱਖ ਦਲਾਂ ਦੇ ਨੇਤਾਵਾਂ ਨਾਲ ਮੁਲਾਕਾਤ ਦਾ ਪ੍ਰੋਗਰਾਮ ਹੈ। ਦੱਸਣਯੋਗ ਹੈ ਕਿ ਬਿਹਾਰ 'ਚ ਪਿਛਲੇ ਮਹੀਨੇ ਸਿਆਸੀ ਉੱਥਲ-ਪੁਥਲ ਕਾਰਨ ਭਾਜਪਾ ਦੇ ਸੱਤਾ ਗੁਆਉਣ ਤੋਂ ਬਾਅਦ ਸ਼ਾਹ ਪਹਿਲੀ ਵਾਰ ਸੂਬੇ ਦੇ ਦੌਰੇ 'ਤੇ ਆਏ ਹਨ।