ਹਿਮਾਚਲ ''ਚ ਕੋਰੋਨਾ ਨਾਲ ਪੀੜਤ ਜਨਾਨੀ ਨੇ ਤੋੜਿਆ ਦਮ, ਪਤੀ ਵੀ ਹਸਪਤਾਲ ''ਚ ਭਰਤੀ
07/03/2020 5:32:28 PM
ਬੱਦੀ- ਹਿਮਾਚਲ ਪ੍ਰਦੇਸ਼ 'ਚ ਕੋਰੋਨਾ ਵਾਇਰਸ ਨਾਲ ਇਕ ਹੋਰ ਮੌਤ ਹੋ ਗਈ ਹੈ। ਮ੍ਰਿਤਕ ਜਨਾਨੀ ਨੇ ਪੀ.ਜੀ.ਆਈ. ਚੰਡੀਗੜ੍ਹ 'ਚ ਦਮ ਤੋੜਿਆ। ਉਹ ਸੋਲਨ ਜ਼ਿਲ੍ਹਾ ਦੇ ਝਾੜਮਾਜਰੀ ਖੇਤਰ ਦੀ ਰਹਿਣ ਵਾਲੀ ਹੈ। ਜਾਣਕਾਰੀ ਅਨੁਸਾਰ ਕੋਰੋਨਾ ਵਾਇਰਸ ਦਾ ਬੀਬੀਐੱਨ 'ਚ ਪਹਿਲਾ ਮਰੀਜ਼ ਸਾਹਮਣੇ ਆਇਆ ਹੈ। ਕੋਰੋਨਾ ਪਾਜ਼ੇਟਿਵ ਮਿਲਣ ਨਾਲ ਇਲਾਕੇ 'ਚ ਸਨਸਨੀ ਫੈਲ ਗਈ ਹੈ। ਜਨਾਨੀ ਪਤੀ ਨਾਲ 14 ਮਾਰਚ ਨੂੰ ਦਿੱਲੀ ਤੋਂ ਆ ਕੇ ਇਕ ਨਿੱਜੀ ਕੰਪਨੀ ਦੇ ਗੈਸਟ ਹਾਊਸ 'ਚ ਰਹਿ ਰਹੀ ਸੀ। 70 ਸਾਲਾ ਸਨੇਹਲੱਤਾ ਦੀ ਵੀਰਵਾਰ ਨੂੰ ਅਚਾਨਕ ਸਿਹਤ ਖਰਾਬ ਹੋ ਗਈ।
ਇਸ ਕਾਰਨ ਉਸ ਨੂੰ ਨਜ਼ਦੀਕੀ ਹਸਪਤਾਲ ਬਰੂਕਲਿਨ ਹਿਮਾਲਿਆ ਝਾੜਮਾਜਰੀ 'ਚ ਭਰਤੀ ਕਰਵਾਇਆ ਗਿਆ, ਜਿੱਥੇ ਉਸ ਦੀ ਹਾਲਤ ਨੂੰ ਦੇਖਦੇ ਹੋਏ ਉਸ ਨੂੰ ਪੀ.ਜੀ.ਆਈ. ਰੈਫਰ ਕਰ ਦਿੱਤਾ ਗਿਆ ਪਰ ਪੀ.ਜੀ.ਆਈ. 'ਚ ਇਲਾਜ ਦੌਰਾਨ ਜਨਾਨੀ ਦੀ ਦੇਰ ਰਾਤ ਮੌਤ ਹੋ ਗਈ। ਜਨਾਨੀ ਦੇ ਪਤੀ ਦੀ ਵੀ ਸਿਹਤ ਖਰਾਬ ਹੈ ਅਤੇ ਉਹ ਵੀ ਪੀ.ਜੀ.ਆਈ. ਚੰਡੀਗੜ੍ਹ 'ਚ ਇਲਾਜ ਅਧੀਨ ਹੈ।
