ਨਾਨ ਬਾਰਡਰ ’ਤੇ ਡਿਊਟੀ ਨਿਭਾ ਰਹੇ 3582 ਅਧਿਆਪਕਾਂ ਨੂੰ ਦਿੱਤਾ ਜਾਵੇ ਬਦਲੀ ਦਾ ਮੌਕਾ: ਰਾਜਪਾਲ ਖਨੌਰੀ
05/27/2020 3:15:36 PM
ਜਲੰਧਰ - 3582 ਅਧਿਆਪਕ ਜੁਲਾਈ 2018 ਤੋਂ ਸਿੱਖਿਆ ਵਿਭਾਗ ਵਿੱਚ ਸਿੱਖਿਆ ਦੇ ਮਿਆਰ ਨੂੰ ਉੱਚਾ ਚੁੱਕਣ ਵਿਚ ਅਹਿਮ ਯੋਗਦਾਨ ਪਾ ਰਹੇ ਹਨ। ਵੱਖ-ਵੱਖ ਮੌਕਿਆਂ ’ਤੇ ਸਿੱਖਿਆ ਸਕੱਤਰ ਵੀ 3582 ਅਧਿਆਪਕਾਂ ਦੀ ਪ੍ਰਸੰਸਾ ਕਰ ਚੁੱਕੇ ਹਨ । ਸਰਕਾਰ ਨੇ ਇਨ੍ਹਾਂ ਅਧਿਆਪਕਾਂ ਦੇ ਤਿੰਨ ਸਾਲ ਤੱਕ ਬਦਲੀ ਨਾ ਕਰਵਾਉਣ ਦੀ ਸ਼ਰਤ ਲਾਈ ਹੋਈ ਸੀ ਪਰ ਪੰਜਾਬ ਕੈਬਨਿਟ ਨੇ ਦੋ ਮਈ ਨੂੰ ਤਿੰਨ ਸਾਲ ਵਾਲੀ ਸ਼ਰਤ ਨੂੰ ਖਤਮ ਕਰ ਦਿੱਤਾ ਸੀ। ਭਾਵ ਜਿਨ੍ਹਾਂ ਅਧਿਆਪਕਾਂ ਦੀ ਸਰਵਿਸ ਕੁਝ ਮਹੀਨੇ ਹੋ ਗਈ ਹੈ, ਉਹ ਇਸ ਵਾਰ ਆਨਲਾਈਨ ਬਦਲੀ ਲਈ ਅਪਲਾਈ ਕਰ ਸਕਦੇ ਹਨ। ਪਰ ਕੈਬਨਿਟ ਨੇ ਇਹ ਫੈਸਲਾ ਸਿਰਫ ਬਾਰਡਰ ਜ਼ਿਲ੍ਹਿਆਂ ਦੇ ਅਧਿਆਪਕਾਂ ’ਤੇ ਹੀ ਲਾਗੂ ਕੀਤਾ ਹੈ। ਜੋ ਅਧਿਆਪਕ ਨਾਨ ਬਾਰਡਰ ਜ਼ਿਲ੍ਹੇ ਵਿੱਚ ਸੇਵਾ ਕਰ ਰਹੇ ਹਨ, ਉਨ੍ਹਾਂ ਦੀ ਬਦਲੀ ਦੀ ਸ਼ਰਤ ਤਿੰਨ ਸਾਲ ਹੀ ਰੱਖੀ ਹੋਈ ਹੈ।
ਅਧਿਆਪਕ ਯੂਨੀਅਨ ਦੇ ਸਰਪ੍ਰਸਤ ਰਾਜਪਾਲ ਖਨੌਰੀ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਨਾਨ ਬਾਰਡਰ ਅਧਿਆਪਕਾਂ ਨੂੰ ਵੀ ਇਸ ਵਾਰ ਆਨਲਾਈਨ ਬਦਲੀ ਵਿੱਚ ਮੌਕਾ ਦਿੱਤਾ ਜਾਵੇ। ਯੂਨੀਅਨ ਸਰਪ੍ਰਸਤ ਰਾਜਪਾਲ ਖਨੌਰੀ ਨੇ ਕਿਹਾ ਕਿ ਸਾਡੇ ਖਨੌਰੀ ਤੋਂ ਹੀ ਕੁਝ ਅਧਿਆਪਕ ਜਲੰਧਰ ਜ਼ਿਲ੍ਹੇ ਦੇ ਲੋਹੀਆਂ ਖਾਸ ਸੇਵਾ ਕਰ ਰਹੇ ਹਨ, ਜੋ ਖਨੌਰੀ ਤੋਂ 225 ਕਿਲੋਮੀਟਰ ਹੈ। ਬਹੁਤ ਸਾਰੇ ਅਧਿਆਪਕ ਸਾਥੀ ਮਾਲਵੇ ਤੋਂ ਦੁਆਬੇ ਵਿੱਚ ਸੇਵਾ ਕਰ ਰਹੇ ਹਨ, ਜਿਨ੍ਹਾਂ ਨੂੰ ਸਫਰ ਦੋ ਸੌ ਕਿਲੋਮੀਟਰ ਦਾ ਲੱਗਭਗ ਪੈਂਦਾ ਹੈ। ਯੂਨੀਅਨ ਆਗੂ ਨੇ ਕਿਹਾ ਕਿ ਜਿਹੜੇ ਅਧਿਆਪਕ ਬਾਰਡਰ ਏਰੀਆ ਵਿੱਚ ਸੇਵਾ ਕਰ ਰਹੇ ਹਨ, ਉਹ ਵੀ ਹੁਣ ਬਦਲੀ ਕਰਾ ਕੇ ਨਾਨ ਬਾਰਡਰ ਜ਼ਿਲ੍ਹਿਆਂ ਵਿੱਚ ਆਉਣਗੇ ਅਤੇ ਅਸੀਂ ਨਾਨ ਬਾਰਡਰ ਵਾਲੇ ਅਧਿਆਪਕਾਂ ਨੇ ਵੀ ਬਦਲੀ ਨਾਨ ਬਾਰਡਰ ਜ਼ਿਲ੍ਹਿਆਂ ਵਿੱਚ ਹੀ ਕਰਾਉਣੀ ਹੈ। ਇਸ ਲਈ ਨਾਨ ਬਾਰਡਰ ਜ਼ਿਲ੍ਹਿਆਂ ਵਿੱਚ ਕਿਤੇ ਵੀ ਸਟਾਫ ਦੀ ਕੋਈ ਘਾਟ ਨਹੀਂ ਰਹੇਗੀ।
3582 ਅਧਿਆਪਕ ਯੂਨੀਅਨ ਨੇ ਸਰਕਾਰ ਤੋਂ ਮੰਗ ਕੀਤੀ ਕਿ ਨਾਨ ਬਾਰਡਰ ਜ਼ਿਲ੍ਹਿਆਂ ਵਿੱਚ ਜੋ ਅਧਿਆਪਕ ਸੇਵਾ ਕਰ ਰਹੇ ਹਨ ਉਨ੍ਹਾਂ ਸਭ ਨੂੰ ਇਸ ਵਾਰ ਪੋਰਟਲ ਵਿੱਚ ਬਦਲੀ ਕਰਵਾਉਣ ਦਾ ਮੌਕਾ ਦਿੱਤਾ ਜਾਵੇ। ਯੂਨੀਅਨ ਨੇ ਮਾਨਯੋਗ ਸਿੱਖਿਆ ਮੰਤਰੀ ਸ਼੍ਰੀ ਵਿਜੈਇੰਦਰ ਸਿੰਗਲਾ ਜੀ ਅਤੇ ਸਿੱਖਿਆ ਸਕੱਤਰ ਸ਼੍ਰੀ ਕ੍ਰਿਸ਼ਨ ਕੁਮਾਰ ਜੀ ਨੂੰ ਬੇਨਤੀ ਕੀਤੀ ਹੈ ਕਿ ਅਪਲਾਈ ਦੀ ਮਿਤੀ ਨੂੰ ਅੱਗੇ ਵਧਾ ਕੇ ਨਾਨ ਬਾਰਡਰ ਅਧਿਆਪਕਾਂ ਨੂੰ ਵੀ ਇਸ ਬਾਰ ਬਦਲੀ ਦਾ ਮੌਕਾ ਦਿੱਤਾ ਜਾਵੇ। ਇਸ ਮੌਕੇ ਸ਼ਾਮ ਪਾਤੜਾਂ, ਪ੍ਰਫੈਸਰ ਅਮਨਦੀਪ ਸਿੰਘ ਹੰਜਰਾ ਖਨੌਰੀ, ਸੰਦੀਪ ਖਨੌਰੀ, ਗੁਰਬਚਨ ਸਿੰਘ ਬਨਾਰਸੀ, ਮੈਡਮ ਊਸ਼ਾ, ਮੈਡਮ ਸੰਜੇ ਦੇਵੀ, ਅਸ਼ੋਕ ਚੱਠਾ ਅਤੇ ਸੰਦੀਪ ਅਨਦਾਣਾ ਨੇ ਵੀ ਇਨ੍ਹਾਂ ਮੰਗਾਂ ਲਈ ਆਪਣੀ ਸਹਿਮਤੀ ਪ੍ਰਗਟਾਈ ਹੈ।