ਜੰਗਲਾਤ ਵਿਭਾਗ ਵਲੋਂ 50 ਏਕੜ ਜ਼ਮੀਨ ਤੋਂ ਹਟਾਏ ਗਏ ਨਾਜਾਇਜ਼ ਕਬਜ਼ੇ
11/12/2019 4:00:03 PM
ਪਠਾਨਕੋਟ (ਧਰਮਿੰਦਰ)—ਪਠਾਨਕੋਟ ਹਲਕੇ ਦੇ ਨੰਗਲਭੂਰ ਇਲਾਕੇ 'ਚ ਜੰਗਲਾਤ ਵਿਭਾਗ ਵਲੋਂ 50 ਏਕੜ ਜ਼ਮੀਨ 'ਤੇ ਪੁਲਸ ਫੋਰਸ ਦੇ ਨਾਲ ਨਾਜਾਇਜ਼ ਕਬਜ਼ੇ ਹਟਾਏ ਗਏ ਹਨ। ਇਸ ਕਾਰਵਾਈ 'ਚ ਭਾਰੀ ਪੁਲਸ ਫੋਰਸ ਜੰਗਲਾਤ ਵਿਭਾਗ ਦੇ ਅਫਸਰਾਂ ਦੇ ਨਾਲ ਮੌਜੂਦ ਰਿਹਾ, ਤਾਂਕਿ ਕਿਸੇ ਤਰ੍ਹਾਂ ਦੀ ਜੇਕਰ ਟਕਰਾਅ ਵਾਲੀ ਸਥਿਤੀ ਬਣਦੀ ਹੈ ਤਾਂ ਉਸ ਨਾਲ ਨਿਪਟਿਆ ਜਾ ਸਕੇ। ਇਸ 'ਤੇ ਸਾਰੀ ਕਾਰਵਾਈ ਦੀ ਵੀਡੀਓਗ੍ਰਾਫੀ ਡਰੋਨ ਵਲੋਂ ਕਰਵਾਈ ਗਈ ਹੈ।
ਜਾਣਕਾਰੀ ਮੁਤਾਬਕ 50 ਏਕੜ ਜ਼ਮੀਨ 'ਤੇ ਕਈ ਸਾਲਾਂ ਤੋਂ ਨੇੜੇ-ਤੇੜੇ ਦੇ ਇਲਾਕੇ ਦੇ ਲੋਕਾਂ ਨੇ ਜੰਗਲਾਤ ਵਿਭਾਗ ਦੀ ਜ਼ਮੀਨ 'ਤੇ ਨਾਜਾਇਜ਼ ਕਬਜ਼ ਕਰਕੇ ਰੱਖਿਆ ਸੀ ਅਤੇ ਇਕ ਲੰਬੀ ਕਾਨੂੰਨੀ ਲੜਾਈ ਦੇ ਬਾਅਦ ਇਸ ਜ਼ਮੀਨ ਨਾਲ ਜੁੜੇ ਸਾਰੇ ਕੇਸਾਂ ਦਾ ਫੈਸਲਾ ਜੰਗਲਾਤ ਵਿਭਾਗ ਦੇ ਹੱਕ 'ਚ ਹੋਇਆ ਹੈ, ਜਿਸ ਦੇ ਬਾਅਦ ਤੁਰੰਤ ਕਾਰਵਾਈ ਕਰਦੇ ਹੋਏ ਜੰਗਲਾਤ ਵਿਭਾਗ ਵਲੋਂ ਇਸ 50 ਏਕੜ ਜ਼ਮੀਨ ਨੂੰ ਆਪਣੇ ਕਬਜ਼ੇ 'ਚ ਲਿਆ ਹੈ। ਇਸ ਪੂਰੀ ਜ਼ਮੀਨ 'ਤੇ ਅੱਜ ਜੰਗਲਾਤ ਵਿਭਾਗ ਦੇ ਅਫਸਰਾਂ ਵਲੋਂ ਇਸ ਦਾ ਰਵਿਊ ਰਿਕਾਰਡ ਖੰਗਾਲਿਆ ਗਿਆ ਅਤੇ ਡਰੋਨ ਦੇ ਨਾਲ ਵੀਡੀਓਗ੍ਰਾਫੀ ਕਰਦੇ ਹੋਏ ਇਸ ਸਾਰੀ ਜ਼ਮੀਨ 'ਤੇ ਟਰੈਕਟਰ ਵਲੋਂ ਹੱਲ ਚਲਾ ਕੇ ਇਸ ਜ਼ਮੀਨ 'ਤੇ 20,000 ਤੋਂ ਵਧ ਪੌਦੇ ਲਗਾਏ ਜਾਣ ਦਾ ਕੰਮ ਸ਼ੁਰੂ ਕਰ ਦਿੱਤਾ ਗਿਆ। ਅੱਜ ਪਹਿਲੇ ਦਿਨ ਦੋ ਹਜ਼ਾਰ ਤੋਂ ਵਧ ਪੌਦੇ ਲਗਾਏ ਗਏ।