ਮਾਸੂਮ ਬੱਚੀਆਂ ਨਾਲ ਸ਼ਰਾਬ ਦੇ ਨਸ਼ੇ ''ਚ ਕਰਦਾ ਸੀ ਜਬਰ-ਜ਼ਨਾਹ

ਫਗਵਾੜਾ, (ਜਲੋਟਾ, ਹਰਜੋਤ, ਰੁਪਿੰਦਰ ਕੌਰ)— 2 ਮਾਸੂਮ ਬੱਚੀਆਂ ਨਾਲ ਮੈਂ ਸ਼ਰਾਬ ਦੇ ਨਸ਼ੇ 'ਚ ਜਬਰ-ਜ਼ਨਾਹ ਕੀਤਾ ਸੀ ਤੇ ਉਸ ਤੋਂ ਬਾਅਦ ਉਨ੍ਹਾਂ ਦਾ ਗਲਾ ਘੁੱਟ ਕੇ ਹੱਤਿਆ ਕਰ ਦਿੱਤੀ ਸੀ। ਇਹ ਖੁਲਾਸਾ ਅੱਜ ਰੇਲਵੇ ਪੁਲਸ ਫਗਵਾੜਾ ਦੀ ਮੌਜੂਦਗੀ 'ਚ ਕਥਿਤ ਦੋਸ਼ੀ ਤੇ ਭਗੌੜੇ ਸੁਰਿੰਦਰ ਪ੍ਰਸਾਦ ਪਟੇਲ ਪੁੱਤਰ ਵਿਰੰਜਨ ਪਟੇਲ ਵਾਸੀ ਹਰੀ ਨਗਰ ਬਨਹੋਰਾ ਬਾਜ਼ਾਰ ਪੁਲਸ ਥਾਣਾ ਲਕਸ਼ਮੀਪੁਰ ਜ਼ਿਲਾ ਬੇਤੀਆਂ (ਬਿਹਾਰ) ਨੇ ਕੀਤਾ, ਜਿਸ ਨੂੰ ਰੇਲਵੇ ਪੁਲਸ ਲਗਭਗ 10 ਸਾਲਾਂ ਤੋਂ ਫਗਵਾੜਾ 'ਚ ਹੋਏ 8 ਸਾਲਾ ਬੱਚੀ ਮਹਿਕ (ਕਾਲਪਨਿਕ ਨਾਂ) ਦੀ ਹੱਤਿਆ ਦੇ ਸਬੰਧ 'ਚ ਲੱਭ ਰਹੀ ਸੀ।  ਪੁਲਸ ਚੌਕੀ ਫਗਵਾੜਾ ਦੇ ਇੰਚਾਰਜ ਸਹਾਇਕ ਸਬ ਇੰਸਪੈਕਟਰ ਗੁਰਭੇਜ ਸਿੰਘ ਨੇ ਦੱਸਿਆ ਕਿ ਉਕਤ ਕਥਿਤ ਦੋਸ਼ੀ ਨੂੰ ਅਦਾਲਤ ਵਲੋਂ ਸਾਲ 2008 'ਚ ਭਗੌੜਾ ਐਲਾਨਿਆ ਗਿਆ ਸੀ ਤੇ ਪੁਲਸ ਉਸ ਨੂੰ ਲੱਭ ਰਹੀ ਸੀ। ਇਸ ਦੌਰਾਨ ਪਤਾ ਲੱਗਾ ਕਿ ਨੇੜਲੇ ਪਿੰਡ ਬੜਾ ਪਿੰਡ 'ਚ ਇਕ ਛੋਟੀ ਬੱਚੀ ਦੀ ਹੱਤਿਆ ਉਸੇ ਤਰ੍ਹਾਂ ਕੀਤੀ ਗਈ ਹੈ, ਜਿਸ ਤਰ੍ਹਾਂ ਮਹਿਕ ਦੀ ਹੋਈ ਸੀ ਤੇ ਇਹ ਹੱਤਿਆ ਵੀ ਕਥਿਤ ਦੋਸ਼ੀ ਸੁਰਿੰਦਰ ਪਟੇਲ ਨੇ ਹੀ ਕੀਤੀ ਹੈ ਪਰ ਇਸ ਵਾਰ ਪੁਲਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਤੇ ਸੈਂਟਰਲ ਜੇਲ ਕਪੂਰਥਲਾ ਭੇਜ ਦਿੱਤਾ। 
ਏ. ਐੱਸ. ਆਈ. ਗੁਰਭੇਜ ਸਿੰਘ ਨੇ ਦੱਸਿਆ ਕਿ ਰੇਲਵੇ ਪੁਲਸ ਦੀ ਟੀਮ ਦੋਸ਼ੀ ਨੂੰ ਪ੍ਰੋਡਕਸ਼ਨ ਵਾਰੰਟ 'ਤੇ ਫਗਵਾੜਾ ਲਿਆਈ, ਜਿਥੇ ਉਸ ਨੇ ਮੰਨਿਆ ਕਿ ਉਸ ਨੇ ਹੀ 16 ਮਾਰਚ 2008 'ਚ 8 ਸਾਲਾ ਬੱਚੀ ਮਹਿਕ ਨਾਲ ਜਬਰ-ਜ਼ਨਾਹ ਕਰਨ ਤੋਂ ਬਾਅਦ ਗਲਾ ਘੁੱਟ ਕੇ ਉਸ ਦੀ ਹੱਤਿਆ ਕੀਤੀ ਸੀ ਤੇ ਲਾਸ਼ ਰੇਲਵੇ ਸਟੇਸ਼ਨ ਦੇ ਨੇੜੇ ਝਾੜੀਆਂ 'ਚ ਸੁੱਟ ਦਿੱਤੀ ਸੀ। 
ਕਥਿਤ ਦੋਸ਼ੀ ਨੇ ਦੱਸਿਆ ਕਿ ਉਸ ਨੇ ਇਸੇ ਤਰ੍ਹਾਂ ਇਸ ਸਾਲ ਨੇੜਲੇ ਪਿੰਡ ਬੜਾ ਪਿੰਡ 'ਚ ਇਕ ਹੋਰ 8 ਸਾਲਾ ਬੱਚੀ ਪਾਰੂਲ (ਕਾਲਪਨਿਕ ਨਾਂ) ਦੇ ਨਾਲ ਵੀ ਪਹਿਲਾਂ ਜਬਰ-ਜ਼ਨਾਹ ਕੀਤਾ ਤੇ ਫਿਰ ਉਸ ਦੀ ਵੀ ਗਲਾ ਘੁੱਟ ਕੇ ਹੱਤਿਆ ਕਰ ਦਿੱਤੀ। ਪੁਲਸ ਨੇ ਇਲਾਕੇ 'ਚ ਲੱਗੇ ਸੀ. ਸੀ. ਟੀ. ਵੀ. ਕੈਮਰਿਆਂ ਦੀ ਮਦਦ ਨਾਲ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਤੇ ਕਪੂਰਥਲਾ ਜੇਲ ਭੇਜ ਦਿੱਤਾ। 
ਜਿਸ ਬੱਚੀ ਨਾਲ ਕਰਦਾ ਸੀ ਜਬਰ-ਜ਼ਨਾਹ, ਪਹਿਲਾਂ ਉਸ ਦੇ ਪਰਿਵਾਰ ਨਾਲ ਕਰਦਾ ਸੀ ਦੋਸਤੀ
ਏ. ਐੱਸ. ਆਈ. ਗੁਰਭੇਜ ਸਿੰਘ ਨੇ ਦੱਸਿਆ ਕਿ ਕਥਿਤ ਦੋਸ਼ੀ ਸੁਰਿੰਦਰ ਨੇ ਇਹ ਵੀ ਮੰਨਿਆ ਕਿ ਉਹ ਆਮ ਤੌਰ 'ਤੇ ਉਸ ਪਰਿਵਾਰ ਨਾਲ ਦੋਸਤੀ ਕਰ ਲੈਂਦਾ ਸੀ, ਜਿਨ੍ਹਾਂ ਦੀ ਨਾਬਾਲਗ ਬੱਚੀ ਨਾਲ ਉਸ ਨੇ ਜਬਰ-ਜ਼ਨਾਹ ਕਰਨਾ ਹੁੰਦਾ ਸੀ। ਉਸ ਨੇ ਇਹ ਵੀ ਮੰਨਿਆ ਕਿ ਉਸ ਨੇ ਹੱਤਿਆ ਤੋਂ ਪਹਿਲਾਂ ਦੋਵੇਂ ਬੱਚੀਆਂ ਦੇ ਪਰਿਵਾਰਾਂ ਨਾਲ ਪਹਿਲਾਂ ਦੋਸਤਾਨਾ ਸਬੰਧ ਬਣਾਏ ਤੇ ਫਿਰ ਉਨ੍ਹਾਂ ਨਾਲ ਵਧੀਆ ਨਜ਼ਦੀਕੀਆਂ ਦਾ ਫਾਇਦਾ ਉਠਾਇਆ। 
ਸਾਇਕੋ ਕੇਸ ਹੈ ਸੁਰਿੰਦਰ
ਏ. ਐੱਸ. ਆਈ. ਗੁਰਭੇਜ ਸਿੰਘ ਨੇ ਦੱਸਿਆ ਕਿ ਜਿਸ ਤਰੀਕੇ ਨਾਲ ਕਥਿਤ ਦੋਸ਼ੀ ਗੱਲ ਕਰ ਰਿਹਾ ਹੈ, ਉਸ ਤੋਂ ਲੱਗਦਾ ਹੈ ਕਿ ਇਹ ਇਕ ਸਾਇਕੋ ਕੇਸ ਹੈ, ਇਸ ਲਈ ਅਜਿਹੇ ਦੋਸ਼ੀ ਵਿਰੁੱਧ ਸਖਤ ਕਾਨੂੰਨੀ ਕਾਰਵਾਈ ਹੋਣੀ ਚਾਹੀਦੀ ਹੈ।
ਇਕ ਹੋਰ ਵੀ ਹੈ ਵੱਡਾ ਸਵਾਲ 
ਜੋ ਦੋਸ਼ੀ ਖੁੱਲ੍ਹੇਆਮ ਇਹ ਮੰਨ ਰਿਹਾ ਹੈ ਕਿ ਉਸ ਨੇ 2 ਮਾਸੂਮ ਬੱਚੀਆਂ ਨਾਲ ਜਬਰ-ਜ਼ਨਾਹ ਕਰਕੇ ਉਨ੍ਹਾਂ ਦੀ ਹੱਤਿਆ ਕੀਤੀ ਹੈ, ਕੀ ਇਹ ਸੰਭਵ ਨਹੀਂ ਹੈ ਕਿ ਉਸ ਨੇ 10 ਸਾਲਾਂ ਦੇ ਇਸ ਵਕਫੇ ਦੌਰਾਨ ਹੋਰ ਸਥਾਨਾਂ 'ਤੇ ਹੋਰ ਬੱਚੀਆਂ ਦੇ ਨਾਲ ਅਜਿਹੀਆਂ ਹੋਰ ਘਟਨਾਵਾਂ ਨੂੰ ਵੀ ਅੰਜਾਮ ਦਿੱਤਾ ਹੋਵੇਗਾ। ਅਜਿਹੇ 'ਚ ਉਸ ਤੋਂ ਪੁਲਸ ਨੂੰ ਹੋਰ ਸਖਤੀ ਤੇ ਗਹਿਰਾਈ ਨਾਲ ਪੁੱਛਗਿੱਛ ਕਰਨੀ ਜ਼ਰੂਰੀ ਹੈ। ਜਾਣਕਾਰਾਂ ਅਨੁਸਾਰ ਅਜਿਹੇ ਮਾਮਲਿਆਂ 'ਚ ਪੁਲਸ ਦੀ ਵਿਸ਼ੇਸ਼ ਐੱਸ. ਆਈ. ਟੀ. ਗਠਿਤ ਕਰਕੇ ਸਖਤ ਜਾਂਚ ਹੋਣੀ ਚਾਹੀਦੀ ਹੈ।
ਜਦੋਂ ਨਸ਼ਾ ਹੋ ਜਾਂਦਾ ਸੀ ਵੱਧ ਤਾਂ ਜਾਗ ਉੱਠਦੀ ਸੀ ਹਵਸ
ਕਥਿਤ ਦੋਸ਼ੀ ਸੁਰਿੰਦਰ ਨੇ ਪੁਲਸ ਰਿਮਾਂਡ ਦੌਰਾਨ ਦੱਸਿਆ ਕਿ ਸਾਲ 2008 ਦੌਰਾਨ ਜਦ ਉਸ ਨੇ ਮਹਿਕ ਦੀ ਹੱਤਿਆ ਕੀਤੀ ਸੀ ਤਾਂ ਉਦੋਂ ਉਹ ਫਗਵਾੜਾ ਦੇ ਸ਼ਿਆਮ ਨਗਰ 'ਚ ਹੀ ਰਹਿੰਦਾ ਸੀ। ਇਥੇ ਉਹ ਰਿਕਸ਼ਾ ਚਲਾਉਂਦਾ ਸੀ। ਉਸ ਨੂੰ ਸ਼ਰਾਬ ਪੀਣ ਦਾ ਸ਼ੌਕ ਹੈ ਤੇ ਜਦੋਂ ਉਹ ਨਸ਼ਾ ਜ਼ਿਆਦਾ ਕਰ ਲੈਂਦਾ ਹੈ ਤਾਂ ਉਸ 'ਚ ਬੱਚੀਆਂ ਨਾਲ ਸੈਕਸ ਕਰਨ ਦੀ ਹਵਸ ਜਾਗ ਉਠਦੀ। ਇਸੇ ਹਵਸ ਕਾਰਨ ਹੀ ਉਸ ਨੇ ਪਾਰੂਲ ਨੂੰ ਵੀ ਆਪਣਾ ਸ਼ਿਕਾਰ ਬਣਾਇਆ। ਉਸ ਨੇ ਦੱਸਿਆ ਕਿ ਮਹਿਕ ਦੀ ਹੱਤਿਆ ਕਰਨ ਤੋਂ ਬਾਅਦ ਉਹ ਲੰਬੇ ਸਮੇਂ ਲਈ ਬਿਹਾਰ ਚਲਾ ਗਿਆ ਸੀ ਤੇ ਉਥੋਂ ਸਾਲ 2016 'ਚ ਵਾਪਸ ਆ ਕੇ ਬੜਾ ਪਿੰਡ 'ਚ ਰਹਿਣ ਲੱਗ ਪਿਆ। 
ਕਥਿਤ ਦੋਸ਼ੀ ਖੁੱਦ ਲਈ ਮੰਗ ਰਿਹਾ ਹੈ ਮੌਤ ਦੀ ਸਜ਼ਾ !
ਕਥਿਤ ਦੋਸ਼ੀ ਸੁਰਿੰਦਰ ਪ੍ਰਸਾਦ ਪਟੇਲ ਆਪਣੇ ਕੀਤੇ ਤੋਂ ਇੰਨਾ ਦੁਖੀ ਤੇ ਪ੍ਰੇਸ਼ਾਨ ਹੈ ਕਿ ਉਹ ਹੁਣ ਆਪਣੇ ਲਈ ਮੌਤ ਦੀ ਸਜ਼ਾ ਮੰਗ ਰਿਹਾ ਹੈ। ਉਸ ਨੇ ਕਿਹਾ ਕਿ ਉਸ ਨੇ ਜੋ ਗਲਤ ਕੰਮ ਸ਼ਰਾਬ ਦੇ ਨਸ਼ੇ 'ਚ ਕੀਤੇ ਹਨ ਉਹ ਮੁਆਫੀ ਯੋਗ ਨਹੀਂ ਹੈ ਤੇ ਉਸ ਨੂੰ ਆਪਣੇ ਕੀਤੇ 'ਤੇ ਪਛਤਾਵਾ ਹੈ। ਉਸ ਨੇ ਕਿਹਾ ਕਿ ਉਸ ਨੂੰ ਹੁਣ ਸਿਰਫ ਮੌਤ ਦੀ ਹੀ ਸਜ਼ਾ ਮਿਲਣੀ ਚਾਹੀਦੀ ਹੈ। ਉਸ ਨੇ ਕਿਹਾ ਕਿ ਜੋ ਗਲਤ ਕੰਮ ਮੈਂ ਕੀਤੇ ਹਨ, ਉਸ ਨਾਲ ਹੁਣ ਮੈਨੂੰ ਖੁਦ ਨਾਲ ਨਫਰਤ ਹੋ ਰਹੀ ਹੈ।