ਬ੍ਰਿਟਿਸ਼ ਸ਼ਾਹੀ ਜੋੜੇ ਨੇ ਪਾਕਿ ਸਕੂਲ 'ਚ ਬੱਚਿਆਂ ਨਾਲ ਕੀਤੀ ਮੁਲਾਕਾਤ

ਇਸਲਾਮਾਬਾਦ— ਬ੍ਰਿਟੇਨ ਦੇ ਪ੍ਰਿੰਸ ਵਿਲੀਅਮ ਤੇ ਉਨ੍ਹਾਂ ਦੀ ਪਤਨੀ ਕੇਟ ਮਿਡਲਟਨ ਆਪਣੇ ਪੰਜ ਦਿਨਾਂ ਅਧਿਕਾਰਿਤ ਦੌਰੇ 'ਤੇ ਪਾਕਿਸਤਾਨ ਆਏ ਹੋਏ ਹਨ। ਸ਼ਾਹੀ ਜੋੜੇ ਨੇ ਆਪਣੀ ਪਹਿਲੀ ਪਾਕਿ ਅਧਿਕਾਰਿਤ ਯਾਤਰਾ ਦੌਰਾਨ ਲੜਕੀਆਂ ਦੇ ਸਕੂਲ ਦਾ ਦੌਰਾ ਕੀਤਾ ਤੇ ਬੱਚਿਆਂ ਨਾਲ ਵੀ ਮੁਲਾਕਾਤ ਕੀਤੀ।

ਡਿਊਕ ਤੇ ਡੱਚਸ ਆਫ ਕੈਂਬ੍ਰਿਜ ਸੋਮਵਾਰ ਨੂੰ ਇਕ ਦਹਾਕੇ ਬਾਅਦ ਪਾਕਿਸਤਾਨ ਦੀ ਆਪਣੀ ਪਹਿਲੀ ਸ਼ਾਹੀ ਯਾਤਰਾ 'ਤੇ ਪਹੁੰਚਿਆ। ਇਸ ਦੌਰਾਨ ਸ਼ਾਹੀ ਜੋੜੇ ਨੇ ਇਸਲਾਮਾਬਾਦ 'ਚ ਮੌਜੂਦ ਲੜਕੀਆਂ ਦੇ ਮਾਲਡ ਕਾਲਜ ਦਾ ਦੌਰਾ ਕੀਤਾ। ਇਹ ਕਾਲਜ ਚਾਰ ਤੋਂ 18 ਸਾਲ ਦੇ ਬੱਚਿਆਂ, ਜੋ ਕਿ ਸਿੱਖਿਆ ਤੋਂ ਵਾਂਝੇ ਹਨ, ਲਈ ਇਕ ਸਰਕਾਰੀ ਸਕੂਲ ਹੈ। ਬ੍ਰਿਟੇਨ ਦਾ 'ਟੀਚ ਫਸਟ' 'ਤੇ ਆਧਾਰਿਤ 'ਟੀਚ ਫਾਰ ਪਾਕਿਸਤਾਨ' ਬੇਸਡ ਸਕੂਲ ਇਸ ਦੀ ਸਹਾਇਤਾ ਕਰਦਾ ਹੈ।

ਆਪਣੇ ਕਾਲਜ ਦੌਰੇ ਦੌਰਾਨ ਕੇਟ ਮਿਡਲਟਨ ਨੇ ਪਾਕਿਸਤਾਨੀ ਡਿਜ਼ਾਇਨਰ ਮਹੀਨ ਖਾਨ ਵਲੋਂ ਤਿਆਰ ਕੀਤੀ ਨੀਲੇ ਰੰਗ ਦੀ ਪੋਸ਼ਾਕ ਪਹਿਨੀ ਹੋਈ ਸੀ। 37 ਸਾਲਾ ਸ਼ਾਹੀ ਜੋੜੇ ਨੇ ਸਕੂਲ ਦੇ ਵੱਖ-ਵੱਖ ਹਿੱਸਿਆਂ ਦਾ ਦੌਰਾ ਕੀਤਾ ਤੇ ਗਣਿਤ ਦੀ ਕਲਾਸ 'ਚ ਬੱਚਿਆਂ ਨਾਲ ਗੱਲਬਾਤ ਕੀਤੀ। ਇਸ ਦੌਰਾਨ ਸ਼ਾਹੀ ਜੋੜਾ ਬੱਚਿਆਂ ਨਾਲ ਘੁਲ-ਮਿਲ ਗਿਆ। ਸਕੂਲ ਪ੍ਰਬੰਧਨ ਨੇ ਸ਼ਾਹੀ ਜੋੜੇ ਨੂੰ ਬੱਚਿਆਂ ਤੇ ਸਕੂਲ ਬਾਰੇ ਜਾਣਕਾਰੀ ਦਿੱਤੀ, ਜੋ ਕਿ ਲੜਕੀਆਂ ਦੀ ਸਿੱਖਿਆ ਦੀ ਵਕਾਲਤ ਕਰਦਾ ਹੈ।

ਆਪਣੀ ਇਸ ਪੰਜ ਦਿਨਾਂ ਯਾਤਰਾ ਦੌਰਾਨ ਸ਼ਾਹੀ ਜੋੜਾ ਉੱਤਰੀ ਇਲਾਕਿਆਂ ਤੇ ਖੈਬਰ ਪਖਤੂਨਖਵਾ ਦੀ ਯਾਤਰਾ ਕਰੇਗਾ। ਜਿਓ ਨਿਊਜ਼ ਏਜੰਸੀ ਮੁਤਾਬਕ ਸ਼ਾਹੀ ਜੋੜਾ ਦੇਸ਼ ਦੇ ਰਾਸ਼ਟਰਪਤੀ ਆਰਿਫ ਅਲਵੀ ਤੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨਾਲ ਵੀ ਮੁਲਾਕਾਤ ਕਰੇਗਾ। ਇਸ ਤੋਂ ਬਾਅਦ ਬ੍ਰਿਟਿਸ਼ ਹਾਈ ਕਮਿਸ਼ਨਰ ਥਾਮਸ ਡ੍ਰੀਊ ਨਾਲ ਵੀ ਬੈਠਕ ਕੀਤੀ ਜਾਵੇਗੀ।