ਅਮਰੀਕਾ: ਯੂਟਿਊਬ ’ਤੇ ਬੱਚਿਆਂ ਦੇ ਪਾਲਣ-ਪੋਸ਼ਣ ਸਬੰਧੀ ਸਲਾਹ ਦੇਣ ਵਾਲੀ ਔਰਤ ਬਾਲ ਸ਼ੋਸ਼ਣ ਦੇ ਦੋਸ਼ 'ਚ ਗ੍ਰਿਫਤਾਰ

ਯੂਟਾਹ/ਅਮਰੀਕਾ (ਭਾਸ਼ਾ)- ਯੂਟਿਊਬ ’ਤੇ ਬੱਚਿਆਂ ਦੇ ਪਾਲਣ-ਪੋਸ਼ਣ ਸਬੰਧੀ ਸਲਾਹ ਦੇਣ ਵਾਲੀ ਯੂਟਾਹ ਦੀ ਇੱਕ ਔਰਤ ਨੂੰ ਬਾਲ ਸ਼ੋਸ਼ਣ ਦੇ ਗੰਭੀਰ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿੱਤੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਔਰਤ ਦਾ ਕੁਪੋਸ਼ਿਤ ਪੁੱਤਰ ਖਿੜਕੀ ਦੀ ਮਦਦ ਨਾਲ ਘਰ ਤੋਂ ਬਾਹਰ ਆ ਗਿਆ ਸੀ ਅਤੇ ਉਸ ਨੇ ਨੇੜਲੇ ਘਰ ਤੋਂ ਮਦਦ ਦੀ ਅਪੀਲ ਕੀਤੀ ਸੀ। ਰੂਬੀ ਫ੍ਰੈਂਕੇ, ਜੋ ਹੁਣ ਬੰਦ ਹੋ ਚੁੱਕੇ ਯੂਟਿਊਬ ਚੈਨਲ "8 ਪੈਸੇਂਜਰਸ" ਨੂੰ ਚਲਾਉਂਦੀ ਸੀ, ਨੂੰ ਬੁੱਧਵਾਰ ਰਾਤ ਨੂੰ ਦੱਖਣੀ ਯੂਟਾਹ ਦੇ ਇਵਿੰਸ ਸ਼ਹਿਰ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।

ਔਰਤ ਨੂੰ ਕਾਉਂਸਲਿੰਗ ਦਾ ਕਾਰੋਬਾਰ ਕਰਨ ਵਾਲੇ ਜੋਡੀ ਹਿਲਡੇਬ੍ਰਾਂਟ ਦੇ ਘਰ ਤੋਂ ਹਿਰਾਸਤ ਵਿੱਚ ਲਿਆ ਗਿਆ। ਹਿਲਡੇਬ੍ਰਾਂਟ ਦਾ ਕਹਿਣਾ ਹੈ ਕਿ ਉਹ ਲੋਕਾਂ ਨੂੰ ਇਮਾਨਦਾਰੀ, ਜ਼ਿੰਮੇਵਾਰੀ ਅਤੇ ਨਿਮਰਤਾ ਨਾਲ ਆਪਣੇ ਜੀਵਨ ਨੂੰ ਬਿਹਤਰ ਬਣਾਉਣ ਦੀ ਸਲਾਹ ਦਿੰਦੀ ਹੈ। ਫ੍ਰੈਂਕੇ ਹਾਲ ਹੀ ਵਿੱਚ ਹਿਲਡੇਬ੍ਰਾਂਟ ਨਾਲ ਯੂਟਿਊਬ ਵੀਡੀਓ ਵਿੱਚ ਦਿਖੀ ਸੀ, ਜਿਸ ਨੂੰ ਹਿਲਡੇਬ੍ਰਾਂਟ ਦੇ ਕਾਉਂਸਲਿੰਗ ਕਾਰੋਬਾਰ, Connexions Classroom ਨੇ ਆਨਲਾਈਨ ਪੋਸਟ ਕੀਤਾ ਸੀ। ਸਾਂਤਾ ਕਲਾਰਾ-ਇਵਿੰਸ ਡਿਪਾਰਟਮੈਂਟ ਆਫ ਪਬਲਿਕ ਸੇਫਟੀ ਦੇ ਇੱਕ ਅਧਿਕਾਰੀ ਵੱਲੋਂ ਦਾਇਰ ਹਲਫਨਾਮੇ ਦੇ ਅਨੁਸਾਰ, ਫ੍ਰੈਂਕੇ ਦੇ 12 ਸਾਲਾ ਬੇਟੇ ਨੇ ਬੁੱਧਵਾਰ ਸਵੇਰੇ ਇਵਿੰਸ ਵਿੱਚ ਹਿਲਡੇਬ੍ਰਾਂਟ ਦੀ ਰਿਹਾਈਸ਼ ਦੀ ਖਿੜਕੀ ਤੋਂ ਛਾਲ ਮਾਰ ਦਿੱਤੀ ਅਤੇ ਇੱਕ ਗੁਆਂਢੀ ਦੇ ਘਰੋਂ ਭੋਜਨ ਅਤੇ ਪਾਣੀ ਮੰਗਿਆ।

ਹਲਫਨਾਮੇ ਵਿਚ ਕਿਹਾ ਗਿਆ ਹੈ ਕਿ ਇਕ ਗੁਆਂਢੀ ਨੇ ਲੜਕੇ ਦੇ ਗਿੱਟੇ ਅਤੇ ਗੁੱਟ 'ਤੇ ਟੇਪ ਲੱਗੀ ਦੇਖੀ, ਜਿਸ ਤੋਂ ਬਾਅਦ ਉਸ ਨੇ ਅਧਿਕਾਰੀਆਂ ਨੂੰ ਸੂਚਿਤ ਕੀਤਾ। ਮੁੰਡੇ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਸ ਦਾ ਇਲਾਜ ਚੱਲ ਰਿਹਾ ਹੈ। ਰੱਸੀ ਨਾਲ ਬੰਨ੍ਹੇ ਹੋਣ ਕਾਰਨ ਮੁੰਡੇ ਦੇ ਸਰੀਰ 'ਤੇ ਜ਼ਖ਼ਮ ਸਨ ਅਤੇ ਸਹੀ ਭੋਜਨ ਨਾ ਮਿਲਣ ਕਾਰਨ ਉਹ ਕੁਪੋਸ਼ਣ ਦਾ ਸ਼ਿਕਾਰ ਲੱਗ ਰਿਹਾ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਬਾਅਦ ਵਿੱਚ, ਫ੍ਰੈਂਕੇ ਦੀ 10 ਸਾਲ ਦੀ ਧੀ ਵੀ ਹਿਲਡੇਬ੍ਰਾਂਟ ਦੇ ਘਰ ਵਿੱਚ ਕੁਪੋਸ਼ਿਤ ਹਾਲਤ ਵਿਚ ਪਾਈ ਗਈ ਅਤੇ ਉਸ ਨੂੰ ਵੀ ਹਸਪਤਾਲ ਲਿਜਾਇਆ ਗਿਆ। ਹਲਫਨਾਮੇ ਦੇ ਅਨੁਸਾਰ, ਫ੍ਰੈਂਕੇ ਦੇ 2 ਹੋਰ ਬੱਚਿਆਂ ਨੂੰ ਬਾਲ ਸੁਰੱਖਿਆ ਸੇਵਾਵਾਂ ਦੀ ਦੇਖਭਾਲ ਅਧੀਨ ਰੱਖਿਆ ਗਿਆ ਹੈ। ਅਧਿਕਾਰੀਆਂ ਦੇ ਅਨੁਸਾਰ, ਫ੍ਰੈਂਕੇ ਅਤੇ ਹਿਲਡੇਬ੍ਰਾਂਟ ਦੋਵਾਂ ਨੂੰ ਬਾਲ ਸ਼ੋਸ਼ਣ ਦੇ ਦੋਸ਼ਾਂ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਹੈ, ਹਾਲਾਂਕਿ ਅਜੇ ਤੱਕ ਦੋਸ਼ ਦਾਇਰ ਨਹੀਂ ਕੀਤੇ ਗਏ ਹਨ। ਜੱਜ ਨੇ ਵੀਰਵਾਰ ਨੂੰ ਰੂਬੀ ਫ੍ਰੈਂਕੇ ਦੀ ਵਕੀਲ ਦੀ ਮੰਗ ਦੀ ਬੇਨਤੀ ਨੂੰ ਮਨਜ਼ੂਰੀ ਦੇ ਦਿੱਤੀ ਪਰ ਜ਼ਮਾਨਤ ਤੋਂ ਇਨਕਾਰ ਕਰ ਦਿੱਤਾ। ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ, ਅਦਾਲਤ ਨੇ ਹਿਲਡੇਬ੍ਰਾਂਟ ਨੂੰ ਜ਼ਮਾਨਤ ਦੇਣ ਤੋਂ ਵੀ ਇਨਕਾਰ ਕਰ ਦਿੱਤਾ।