ਅਮਰੀਕਾ : ਨਿਊਯਾਰਕ ’ਚ ਹਥੌੜੇ ਨਾਲ ਏਸ਼ੀਅਨ ਔਰਤ ’ਤੇ ਹਮਲਾ ਕਰਨ ਦੇ ਮਾਮਲੇ ’ਚ 1 ਕਾਬੂ
05/15/2021 8:30:24 PM
ਫਰਿਜ਼ਨੋ (ਕੈਲੀਫੋਰਨੀਆ) (ਗੁਰਿੰਦਰਜੀਤ ਨੀਟਾ ਮਾਛੀਕੇ)-ਨਿਊਯਾਰਕ ’ਚ ਇਸ ਮਹੀਨੇ ਦੇ ਸ਼ੁਰੂ ’ਚ ਇੱਕ ਏਸ਼ੀਅਨ ਔਰਤ ਦੇ ਸਿਰ ’ਚ ਹਥੌੜਾ ਮਾਰਨ ਵਾਲੀ ਇਕ ਸ਼ੱਕੀ ਔਰਤ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਨਿਊਯਾਰਕ ਦੇ ਪੁਲਸ ਵਿਭਾਗ ਨੇ ਦੱਸਿਆ ਕਿ 37 ਸਾਲਾ ਐਬਨੀ ਜੈਕਸਨ, ਜੋ ਇਕ ਬੇਘਰ ਔਰਤ ਹੈ, ਨੂੰ ਬੁੱਧਵਾਰ ਹਮਲੇ, ਹਥਿਆਰ ਦੇ ਅਪਰਾਧਿਕ ਕਬਜ਼ੇ ਅਤੇ ਮਾਰ-ਕੁਟਾਈ ਦੇ ਦੋਸ਼ਾਂ ’ਚ ਗ੍ਰਿਫਤਾਰ ਕੀਤਾ ਗਿਆ ਹੈ। ਨਿਊਯਾਰਕ ਪੁਲਸ ਵਿਭਾਗ ਦੀ ਹੇਟ ਕ੍ਰਾਈਮ ਟਾਸਕ ਫੋਰਸ ਇਸ ਘਟਨਾ ਦੀ ਜਾਂਚ ਕਰ ਰਹੀ ਹੈ ਤੇ ਜਾਂਚ ਜਾਰੀ ਹੈ। ਇਸ ਘਟਨਾ ’ਚ 31 ਅਤੇ 29 ਸਾਲ ਦੀ ਉਮਰ ਦੀਆਂ ਦੋ ਏਸ਼ੀਆਈ ਔਰਤਾਂ 2 ਮਈ ਨੂੰ ਰਾਤ 8 ਵੱਜ ਕੇ 40 ਮਿੰਟ ’ਤੇ 411 ਡਬਲਯੂ 42ਵੀਂ ਸਟ੍ਰੀਟ 'ਤੇ ਫੁੱਟਪਾਥ ’ਤੇ ਜਾ ਰਹੀਆਂ ਸਨ, ਜਿਸ ਦੌਰਾਨ ਹਮਲਾਵਰ ਔਰਤ ਨੇ ਉਨ੍ਹਾਂ ਦੇ ਮਾਸਕ ਹਟਾਉਣ ਦੀ ਮੰਗ ਕਰਨ ਦੇ ਨਾਲ 31 ਸਾਲਾ ਔਰਤ ਦੇ ਸਿਰ ’ਚ ਹਥੌੜੇ ਨਾਲ ਵਾਰ ਕੀਤੇ।
ਇਸ ਹਮਲੇ ਦੀ ਪੀੜਤ ਨੂੰ ਸਿਰ ’ਤੇ ਸੱਟ ਲੱਗਣ ਕਰਕੇ ਹਸਪਤਾਲ ਦਾਖਲ ਕਰਵਾਇਆ ਗਿਆ ਸੀ। ਹਮਲੇ ਦੀ ਪੀੜਤ ਥੈਰੇਸਾ, ਜੋ ਫੈਸ਼ਨ ਇੰਸਟੀਚਿਊਟ ਆਫ ਟੈਕਨਾਲੋਜੀ ’ਚ ਮਾਸਟਰ ਡਿਗਰੀ ਕਰਨ ਲਈ ਸਾਲ 2019 ’ਚ ਨਿਊਯਾਰਕ ਸੀ। ਕੋਰੋਨਾ ਮਹਾਮਾਰੀ ਸ਼ੁਰੂ ਹੋਣ ਤੋਂ ਬਾਅਦ ਉਹ ਆਪਣੇ ਮਾਪਿਆਂ ਨਾਲ ਰਹਿਣ ਲਈ ਤਾਈਵਾਨ ਗਈ ਸੀ ਅਤੇ ਪਿਛਲੇ ਮਹੀਨੇ ਹੀ ਨੌਕਰੀ ਲੱਭਣ ਲਈ ਨਿਊਯਾਰਕ ਵਾਪਸ ਆਈ ਸੀ। ਜ਼ਿਕਰਯੋਗ ਹੈ ਕਿ ਐੱਨ. ਵਾਈ. ਪੀ. ਡੀ. ਨੇ 2021 ’ਚ 9 ਮਈ ਤੱਕ 81 ਏਸ਼ੀਆਈ ਵਿਰੋਧੀ ਨਫ਼ਰਤੀ ਅਪਰਾਧਾਂ ਦੀ ਰਿਪੋਰਟ ਕੀਤੀ ਹੈ, ਜੋ ਪਿਛਲੇ ਸਾਲ ਇਸ ਮਹੀਨੇ ਤੱਕ ਦੀ ਗਿਣਤੀ ਨਾਲੋਂ 17 ਵੱਧ ਹਨ।