ਪੰਡਿਤ ਜਸਰਾਜ ਦੇ ਨਾਮ 'ਤੇ ਰੱਖਿਆ ਗਿਆ ਇਕ ਗ੍ਰਹਿ ਦਾ ਨਾਮ
09/30/2019 2:04:48 PM
ਵਾਸ਼ਿੰਗਟਨ (ਬਿਊਰੋ)— ਭਾਰਤੀ ਸ਼ਾਸਤਰੀ ਸੰਗੀਤ ਦੇ ਮਸ਼ਹੂਰ ਸਿਤਾਰੇ ਪੰਡਿਤ ਜਸਰਾਜ ਦਾ ਨਾਮ ਹੁਣ ਗਲੈਕਸੀ ਵਿਚ ਚਮਕੇਗਾ। ਅਸਲ ਵਿਚ ਮੰਗਲ ਅਤੇ ਜੂਪੀਟਰ ਦੇ ਵਿਚ ਸਥਿਤ ਇਕ ਬਹੁਤ ਛੋਟੇ ਗ੍ਰਹਿ ਦਾ ਨਾਮ ਉਨ੍ਹਾਂ ਦੇ ਨਾਮ 'ਤੇ ਰੱਖਿਆ ਗਿਆ ਹੈ। ਪੁਲਾੜ ਵਿਗਿਆਨੀਆਂ ਨੇ 13 ਸਾਲ ਪਹਿਲਾਂ ਇਸ ਗ੍ਰਹਿ ਨੂੰ ਖੋਜਿਆ ਸੀ। ਅੰਤਰਰਾਸ਼ਟਰੀ ਖਗੋਲ ਸੰਘ (IAU) ਵੱਲੋਂ 11 ਨਵੰਬਰ 2006 ਨੂੰ ਖੋਜੇ ਗਏ ਇਸ ਗ੍ਰਹਿ 2006 ਵੀ.ਪੀ. 32 ਨੂੰ ਹੁਣ ਤੱਕ ਸੰਖਿਆ 300128 ਦੇ ਨਾਮ ਨਾਲ ਜਾਣਿਆ ਜਾਂਦਾ ਸੀ। ਹੁਣ ਇਹ ਸਿਰਫ ਸੰਜੋਗ ਹੈ ਕਿ ਪੰਡਿਤ ਜਸਰਾਜ ਦੀ ਜਨਮ ਤਰੀਕ 28/01/30 ਹੈ, ਜੋ ਇਸ ਤਾਰੇ ਦੇ ਪਹਿਲੇ ਰੱਖੇ ਗਏ ਨਾਮ ਦੇ ਠੀਕ ਉਲਟ ਹੈ।
ਪੰਡਿਤ ਜਸਰਾਜ ਦੀ ਬੇਟੀ ਦੁਰਗਾ ਜਸਰਾਜ ਨੇ ਦੱਸਿਆ ਕਿ 23 ਸਤੰਬਰ ਨੂੰ ਆਈ.ਏ.ਯੂ. ਵੱਲੋਂ ਸਾਈਟੇਸ਼ਨ ਦੇਣ ਦੇ ਨਾਲ ਇਸ ਦਾ ਅਧਿਕਾਰਕ ਰੂਪ ਨਾਲ ਐਲਾਨ ਕੀਤਾ ਗਿਆ। ਇਸ ਸਨਮਾਨ ਦੇ ਨਾਲ ਪਦਮ ਭੂਸ਼ਣ ਨਾਲ ਸਨਮਾਨਿਤ ਪੰਡਿਤ ਜਸਰਾਜ ਮੋਜਾਰਟ, ਬੀਥੋਵੇਨ ਅਤੇ ਟੇਨੋਰ ਲੁਸੀਆਨੋ ਪਵਾਰੋਟੀ ਜਿਹੇ ਅਮਰ ਸੰਗੀਤਕਾਰਾਂ ਦੀ ਗਲੈਕਸੀ ਵਿਚ ਸ਼ਾਮਲ ਹੋਣ ਵਾਲੇ ਪਹਿਲੇ ਭਾਰਤੀ ਸੰਗੀਤਕਾਰ ਬਣ ਗਏ ਹਨ।
ਪੰਡਿਤ ਜਸਰਾਜ ਨੇ ਅਮਰੀਕਾ ਨੂੰ ਦਿੱਤੇ ਆਪਣੇ ਸੰਦੇਸ਼ ਵਿਚ ਕਿਹਾ ਕਿ ਇਸ ਸਨਮਾਨ ਨੂੰ ਪਾ ਕੇ ਈਸ਼ਵਰ ਦੀ ਕ੍ਰਿਪਾ ਦਾ ਅਨੁਭਵ ਹੋ ਰਿਹਾ ਹੈ। ਸਾਈਟੇਸ਼ਨ ਵਿਚ ਕਿਹਾ ਗਿਆ ਹੈ ਕਿ ਸੰਗੀਤ ਸਮਰਾਟ ਪੰਡਿਤ ਜਸਰਾਜ ਭਾਰਤੀ ਸ਼ਾਸਤਰੀ ਸੰਗੀਤ ਦੇ ਪ੍ਰਤੀਪਾਦਕ ਹਨ। ਉਨ੍ਹਾਂ ਨੇ ਆਪਣੀ ਜ਼ਿੰਦਗੀ ਸੰਗੀਤ ਨੂੰ ਸਮਰਪਿਤ ਕਰ ਦਿੱਤੀ ਹੈ। 'ਪੰਡਿਤਜਸਰਾਜ' ਨਾਮ ਦੇ ਇਸ ਛੋਟੇ ਗ੍ਰਹਿ ਨੂੰ ਆਈ.ਏ.ਯੂ. ਦੀ ਅਧਿਕਾਰਕ ਵੈਬਸਾਈਟ 'ਤੇ 300128 ਨੰਬਰ 'ਤੇ ਦੇਖਿਆ ਜਾ ਸਕਦਾ ਹੈ।