ਸਿਡਨੀ ''ਚ ਲਗਾਤਾਰ ਹੋ ਰਹੀ ਬਾਰਿਸ਼ ਨਾਲ ਬਣੇ ਹੜ੍ਹ ਵਰਗੇ ਆਸਾਰ
03/20/2021 11:12:20 AM
ਸਿਡਨੀ (ਸਨੀ ਚਾਂਦਪੁਰੀ):- ਬੀਤੇ ਦਿਨ ਤੋਂ ਹੋ ਰਹੀ ਲਗਾਤਾਰ ਤੇਜ਼ ਬਾਰਿਸ਼ ਨੂੰ ਦੇਖਦੇ ਹੋਏ ਮੌਸਮ ਵਿਗਿਆਨ ਵਿਭਾਗ (ਬੀ.ਓ.ਐਮ.) ਨੇ ਚਿਤਾਵਨੀ ਦਿੱਤੀ ਹੈ ਕਿ ਸਿਡਨੀ ਦੇ ਕੁਝ ਹਿੱਸਿਆਂ ਵਿੱਚ ਹੜ੍ਹ ਵਰਗੇ ਆਸਾਰ ਬਣ ਸਕਦੇ ਹਨ। ਕਿਉਂਕਿ ਮੱਧ-ਉੱਤਰੀ ਤੱਟ ਤੋਂ ਭਾਰੀ ਬਾਰਸ਼ ਦੱਖਣ ਵੱਲ ਵਧ ਰਹੀ ਹੈ।
ਪੱਛਮੀ ਸਿਡਨੀ ਵਿਚ ਵਾਰਾਗਾਂਬਾ ਡੈਮ ਵਿਚ ਪਾਣੀ ਓਵਰਫਲੋ ਹੋਣ ਕਾਰਨ ਕਿਸੇ ਵੀ ਸਮੇਂ ਪਾਣੀ ਬਾਹਰ ਆ ਸਕਦਾ ਹੈ। ਮੌਸਮ ਮਾਹਰਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਸਿਡਨੀ ਦੇ ਪੱਛਮ ਵਿਚ ਪੈਨਰਿਥ ਅਤੇ ਉੱਤਰੀ ਰਿਚਮੰਡ ਦੇ ਵਸਨੀਕਾਂ ਨੂੰ ਹੜ੍ਹਾਂ ਦੀ ਮਾਰ ਝੱਲਣੀ ਪੈ ਸਕਦੀ ਹੈ। ਮੀਡੀਆ ਨਾਲ ਗੱਲਬਾਤ ਕਰਦਿਆਂ, ਬੀ.ਓ.ਐਮ. ਦੇ ਫਲੱਡ ਆਪ੍ਰੇਸ਼ਨ ਮੈਨੇਜਰ, ਜਸਟਿਨ ਰੌਬਿਨਸਨ ਨੇ ਚਿਤਾਵਨੀ ਦਿੱਤੀ ਕਿ ਇਹ ਖੇਤਰ ਮਾਮੂਲੀ ਹੜ੍ਹਾਂ ਦਾ ਅਨੁਭਵ ਕਰਨਗੇ, ਜੋ ਸਥਿਤੀ ਦੇ ਅਧਾਰ 'ਤੇ ਜਲਦੀ ਹੀ "ਵੱਡਾ" ਹੜ੍ਹ ਬਣ ਸਕਦੇ ਹਨ। ਹਾਕਸਬਰੀ-ਨੇਪਨ ਦਰਿਆ ਦੇ ਇਲਾਕਿਆਂ ਵਿਚ ਹੜ੍ਹ ਆਉਣ ਦੀ ਸੰਭਾਵਨਾ ਹੈ। ਸਾਡੇ ਮੌਜੂਦਾ ਮਾਡਲ ਦੇ ਆਧਾਰ 'ਤੇ ਪੈਨਰਿਥ ਅਤੇ ਨੌਰਥ ਰਿਚਮੰਡ ਦੇ ਇਲਾਕਿਆਂ ਵਿੱਚ ਹੜ੍ਹ ਆਉਣ ਦੀ ਆਸ਼ੰਕਾ ਵੱਧ ਹੈ।
ਸਿਡਨੀ ਵਾਸੀਆਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਬਾਰਸ਼ ਵਧਣ ਕਾਰਨ ਉਹ ਘਰ ਹੀ ਰਹਿਣ। ਸਿਡਨੀ ਦੇ ਪੱਛਮ ਵਿਚ ਚੈਸਟਰ ਹਿੱਲ ਵਿਚਲੇ ਮਕਾਨ ਪਹਿਲਾਂ ਹੀ ਤੂਫਾਨ ਨਾਲ ਪ੍ਰਭਾਵਿਤ ਹੋਏ ਹਨ। ਐਨ.ਐਸ.ਡਬਲਯੂ. ਫਾਇਰ ਐਂਡ ਬਚਾਅ ਦਲ ਹਵਾ ਅਤੇ ਡਿੱਗੇ ਦਰੱਖਤਾਂ ਨਾਲ ਨੁਕਸਾਨੀਆਂ 30 ਤੋਂ ਵੱਧ ਸੰਪਤੀਆਂ ਦੀ ਮਦਦ ਕਰਨ ਵਿਚ ਜੁਟੇ ਹੋਏ ਹਨ । ਰੌਬਿਨਸਨ ਨੇ ਸਿਡਨੀ ਦੇ ਪੱਛਮ ਨੂੰ ਸਭ ਤੋਂ ਵੱਧ ਚਿੰਤਾ ਦਾ ਖੇਤਰ ਕਿਹਾ ਅਤੇ ਚਿਤਾਵਨੀ ਦਿੱਤੀ ਕਿ ਹੜ੍ਹ ਫਰਵਰੀ 2020 ਵਿੱਚ ਆਏ ਹੜ੍ਹਾਂ ਵਾਂਗ ਹੋ ਸਕਦੇ ਹਨ। ਐਨ.ਐਸ.ਡਬਲਯੂ. ਐਸ.ਈ.ਐਸ. ਨੇ ਇਨ੍ਹਾਂ ਇਲਾਕਿਆਂ ਵਿਚ ਨੀਵੇਂ ਮਕਾਨਾਂ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਉੱਚ ਪੱਧਰੀ ਜਗ੍ਹਾ ਉੱਤੇ ਜਾਣ ਨੂੰ ਕਿਹਾ ਹੈ।