ਆਸਟ੍ਰੇਲੀਆ 'ਚ ਗੁੰਮ ਹੋਇਆ 'ਰੇਡੀਓਐਕਟਿਵ ਕੈਪਸੂਲ', ਰੈੱਡ ਅਲਰਟ ਜਾਰੀ

ਕੈਨਬਰਾ (ਬਿਊਰੋ): ਇੱਕ ਰੇਡੀਓਐਕਟਿਵ ਕੈਪਸੂਲ ਦੇ ਗੁੰਮ ਹੋਣ ਤੋਂ ਬਾਅਦ ਆਸਟ੍ਰੇਲੀਆ ਵਿੱਚ ਹਲਚਲ ਮਚ ਗਈ ਹੈ। ਇਸ ਕੈਪਸੂਲ ਦੀ ਭਾਲ ਲਈ ਕਈ ਟੀਮਾਂ ਵੀ ਬਣਾਈਆਂ ਗਈਆਂ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਰੇਡੀਓਐਕਟਿਵ ਕੈਪਸੂਲ ਬਹੁਤ ਛੋਟਾ ਹੈ। ਇਸ ਦੇ ਬਾਹਰੀ ਖੋਲ ਵਿੱਚ ਰੇਡੀਓਐਕਟਿਵ ਸੀਜ਼ੀਅਮ-137 ਦੀ ਥੋੜ੍ਹੀ ਮਾਤਰਾ ਹੁੰਦੀ ਹੈ, ਜਿਸ ਨੂੰ ਛੂਹਣ 'ਤੇ ਗੰਭੀਰ ਬੀਮਾਰੀ ਹੋ ਸਕਦੀ ਹੈ। ਇਹ ਜਨਵਰੀ ਦੇ ਅੱਧ ਵਿੱਚ ਨਿਊਮੈਨ ਸ਼ਹਿਰ ਅਤੇ ਪਰਥ ਸ਼ਹਿਰ ਦੇ ਵਿਚਕਾਰ 1,400 ਕਿਲੋਮੀਟਰ ਦੀ ਦੂਰੀ ਵਿੱਚ ਕਿਤੇ ਗੁਆਚ ਗਿਆ ਸੀ। 

ਹੈਲਪਲਾਈਨ ਨੰਬਰ ਜਾਰੀ

ਆਸਟ੍ਰੇਲੀਆਈ ਸਰਕਾਰ ਨੇ ਨਾਗਰਿਕਾਂ ਨੂੰ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਉਹ ਕੈਪਸੂਲ ਦੇਖਦੇ ਹਨ ਤਾਂ ਇਸ ਤੋਂ ਦੂਰ ਰਹਿਣ। ਸਰਕਾਰ ਨੇ ਇਹ ਵੀ ਕਿਹਾ ਹੈ ਕਿ ਜੋ ਵੀ ਵਿਅਕਤੀ ਅਜਿਹੀ ਸ਼ੱਕੀ ਵਸਤੂ ਨੂੰ ਦੇਖਦਾ ਹੈ, ਉਹ ਸਾਨੂੰ ਸੂਚਿਤ ਕਰੇ। ਸਰਕਾਰ ਨੇ ਚੇਤਾਵਨੀ ਵਿਚ ਕਿਹਾ ਹੈ ਕਿ ਜੇਕਰ ਕੋਈ ਸੋਚਦਾ ਹੈ ਕਿ ਉਹ ਇਸਦੇ ਸੰਪਰਕ ਵਿੱਚ ਆਇਆ ਹੈ, ਤਾਂ ਉਸਨੂੰ ਤੁਰੰਤ ਡਾਕਟਰੀ ਸਹਾਇਤਾ ਲੈਣ ਦੀ ਲੋੜ ਹੈ।ਲੋਕਾਂ ਨੂੰ ਸੁਚੇਤ ਕਰਦੇ ਹੋਏ ਡੀਐਫਈਐਸ ਨੇ ਕਿਹਾ ਕਿ ਜੇਕਰ ਉਹ ਅਜਿਹੀ ਕੋਈ ਵਸਤੂ ਦੇਖਦੇ ਹਨ ਤਾਂ ਉਸ ਤੋਂ ਘੱਟੋ-ਘੱਟ 5 ਮੀਟਰ ਦੂਰ ਰਹਿਣ। ਡੀਐਫਈਐਸ ਨੇ ਇੱਕ ਨੰਬਰ 133337 ਜਾਰੀ ਕੀਤਾ ਹੈ ਅਤੇ ਇਸ 'ਤੇ ਕਾਲ ਕਰਕੇ ਜਾਣਕਾਰੀ ਦੇਣ ਦੀ ਅਪੀਲ ਕੀਤੀ ਹੈ।

ਨਿਊਮੈਨ ਤੋਂ ਪਰਥ ਜਾਂਦੇ ਸਮੇਂ ਟਰੱਕ ਤੋਂ ਡਿੱਗਿਆ

ਰਿਪੋਰਟ ਦੇ ਅਨੁਸਾਰ ਰੇਡੀਓਐਕਟਿਵ ਕੈਪਸੂਲ ਨੂੰ 10-16 ਜਨਵਰੀ ਦੇ ਵਿਚਕਾਰ ਪਿਲਬਾਰਾ ਖੇਤਰ ਵਿੱਚ ਨਿਊਮੈਨ ਦੇ ਉੱਤਰ ਵਿੱਚ ਇੱਕ ਖਾਨ ਸਾਈਟ ਤੋਂ ਪਰਥ ਲਿਜਾਇਆ ਜਾ ਰਿਹਾ ਸੀ। ਇਸ ਦੌਰਾਨ ਇਹ ਗ਼ਲਤੀ ਨਾਲ ਟਰੱਕ ਤੋਂ ਹੇਠਾਂ ਡਿੱਗ ਗਿਆ। ਸੀਜ਼ੀਅਮ-137 ਇੱਕ ਪਦਾਰਥ ਹੈ ਜੋ ਆਮ ਤੌਰ 'ਤੇ ਮਾਈਨਿੰਗ ਕਾਰਜਾਂ ਵਿੱਚ ਵਰਤਿਆ ਜਾਂਦਾ ਹੈ। ਡਿਪਾਰਟਮੈਂਟ ਆਫ ਫਾਇਰ ਐਂਡ ਐਮਰਜੈਂਸੀ ਸਰਵਿਸਿਜ਼ (ਡੀਐਫਈਐਸ) ਨੇ ਕਿਹਾ ਹੈ ਕਿ ਕੈਪਸੂਲ ਨੂੰ ਹਥਿਆਰ ਵਜੋਂ ਨਹੀਂ ਵਰਤਿਆ ਜਾ ਸਕਦਾ, ਪਰ ਇਹ ਰੇਡੀਏਸ਼ਨ ਛੱਡ ਸਕਦਾ ਹੈ ਅਤੇ ਕੈਂਸਰ ਵਰਗੇ ਹੋਰ ਲੰਬੇ ਸਮੇਂ ਦੇ ਖਤਰੇ ਪੈਦਾ ਕਰ ਸਕਦਾ ਹੈ।

ਪੜ੍ਹੋ ਇਹ ਅਹਿਮ ਖ਼ਬਰ- ਖੁਸ਼ਖ਼ਬਰੀ: ਸਾਲ 2024 ਲਈ H-1B ਰਜਿਸਟ੍ਰੇਸ਼ਨਾਂ 1 ਮਾਰਚ ਤੋਂ ਸ਼ੁਰੂ

ਰੇਡੀਓਐਕਟਿਵ ਸਮੱਗਰੀ ਦੇ ਸੰਪਰਕ ਵਿੱਚ ਆਉਣ ਦਾ ਡਰ

ਪਰਥ ਦੇ ਮੁੱਖ ਸਿਹਤ ਅਧਿਕਾਰੀ ਅਤੇ ਰੇਡੀਓਲੌਜੀਕਲ ਕੌਂਸਲ ਦੇ ਚੇਅਰਮੈਨ ਡਾਕਟਰ ਐਂਡਰਿਊ ਰੌਬਰਟਸਨ ਨੇ ਕਿਹਾ ਕਿ ਵਸਤੂ ਕਾਫ਼ੀ ਮਾਤਰਾ ਵਿੱਚ ਰੇਡੀਏਸ਼ਨ ਛੱਡਦੀ ਹੈ। "ਸਾਡੀ ਚਿੰਤਾ ਇਹ ਹੈ ਕਿ ਕੋਈ ਇਸ ਨੂੰ ਚੁੱਕ ਸਕਦਾ ਹੈ, ਇਹ ਜਾਣੇ ਬਿਨਾਂ ਕਿ ਇਹ ਕੀ ਹੈ। ਉਹ ਸੋਚ ਸਕਦੇ ਹਨ ਕਿ ਇਹ ਕੋਈ ਦਿਲਚਸਪ ਚੀਜ਼ ਹੈ ਅਤੇ ਇਸਨੂੰ ਆਪਣੇ ਕਮਰੇ ਵਿੱਚ ਰੱਖ ਸਕਦੇ ਹਨ, ਇਸਨੂੰ ਆਪਣੀ ਕਾਰ ਵਿੱਚ ਰੱਖ ਸਕਦੇ ਹਨ, ਜਾਂ ਕਿਸੇ ਨੂੰ ਦੇ ਸਕਦੇ ਹਨ।"

ਪੂਰੇ ਰਸਤੇ ਦੀ ਕੀਤੀ ਜਾ ਰਹੀ ਸਕੈਨਿੰਗ

DFES ਨੇ ਲਾਪਤਾ ਰੇਡੀਓਐਕਟਿਵ ਕੈਪਸੂਲ ਦੀ ਤਸਵੀਰ ਜਾਰੀ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਕੈਪਸੂਲ ਦਾ ਆਕਾਰ 6 ਮਿਲੀਮੀਟਰ ਗੁਣਾ 8 ਮਿ.ਮੀ. ਹੈ।ਜਿਸ ਥਾਂ ਤੋਂ ਇਸ ਨੂੰ ਟਰੱਕ 'ਤੇ ਲੱਦਿਆ ਗਿਆ ਸੀ ਅਤੇ ਕਿੱਥੇ ਪਹੁੰਚਣਾ ਸੀ, ਦੀ ਜਾਂਚ ਕੀਤੀ ਗਈ ਹੈ। ਹੁਣ ਖੋਜ ਖੇਤਰ ਨੂੰ ਤੰਗ ਕਰਨ ਲਈ ਬਣਾਏ ਗਏ ਸਹੀ ਰਸਤੇ ਅਤੇ ਸਟਾਪਾਂ ਦਾ ਪਤਾ ਲਗਾਉਣ ਦੇ ਯਤਨ ਜਾਰੀ ਹਨ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।