ਸ਼ੰਘਾਈ ਦੇ ਹਸਪਤਾਲ ''ਚ ਮ੍ਰਿਤਕ ਘੋਸ਼ਿਤ ਵਿਅਕਤੀ ਮੁਰਦਾਘਰ ''ਚ ਨਿਕਲਿਆ ਜ਼ਿੰਦਾ

ਬੀਜਿੰਗ (ਭਾਸ਼ਾ)- ਚੀਨ ਵਿਖੇ ਸ਼ੰਘਾਈ ਵਿੱਚ ਇੱਕ ਸੀਨੀਅਰ ਨਾਗਰਿਕ ਨੂੰ ਗਲਤੀ ਨਾਲ ਮ੍ਰਿਤਕ ਐਲਾਨੇ ਜਾਣ ਤੋਂ ਬਾਅਦ ਉਸ ਦੀ ਲਾਸ਼ ਨੂੰ ਮੁਰਦਾਘਰ ਵਿੱਚ ਭੇਜ ਦਿੱਤਾ ਗਿਆ ਪਰ ਉੱਥੇ ਉਸ ਦੇ ਜ਼ਿੰਦਾ ਹੋਣ ਬਾਰੇ ਪਤਾ ਚੱਲਿਆ। ਇਸ ਤੋਂ ਬਾਅਦ ਸ਼ਹਿਰ 'ਚ ਤਾਲਾਬੰਦੀ ਦੌਰਾਨ ਇਸ ਘਟਨਾ ਨੂੰ ਲੈ ਕੇ ਲੋਕਾਂ 'ਚ ਗੁੱਸਾ ਹੈ ਅਤੇ ਅਧਿਕਾਰੀਆਂ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਚੀਨ 'ਚ ਸੋਸ਼ਲ ਮੀਡੀਆ 'ਤੇ ਜਾਰੀ ਕੁਝ ਵੀਡੀਓਜ਼ 'ਚ ਐਤਵਾਰ ਨੂੰ ਸ਼ੰਘਾਈ ਜ਼ਿੰਚੈਂਗਜ਼ੇਂਗ ਹਸਪਤਾਲ ਦੇ ਬਾਹਰ ਦੋ ਲੋਕਾਂ ਨੂੰ ਪੀਲੇ ਰੰਗ ਦੇ ਵੱਡੇ ਬੈਗ ਨਾਲ ਦੇਖਿਆ ਗਿਆ। ਦੋਵੇਂ ਮੁਰਦਾਘਰ ਦੇ ਕਰਮਚਾਰੀ ਜਾਪਦੇ ਸਨ।