ਅੱਤਵਾਦ ਦੀ ਰਾਹ ਛੱਡ ਆਮ ਜ਼ਿੰਦਗੀ ਜਿਉਣ ਦੀ ਕੋਸ਼ਿਸ਼ ''ਚ 9 ਸਾਲਾ ਮੀਲਾ

ਜਕਾਰਤਾ (ਭਾਸ਼ਾ)— ਗੁਲਾਬੀ ਰੰਗ ਦਾ ਹਿਜਾਬ ਪਹਿਨੇ 9 ਸਾਲ ਦੀ ਮੀਲਾ ਅੱਤਵਾਦ ਦੀ ਰਾਹ ਛੱਡ ਕੇ ਨਵੀਂ ਜ਼ਿੰਦਗੀ ਜਿਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਹੁਣ ਉਸ ਵਿਚ ਦੁਨੀਆ ਦੇ ਪ੍ਰਤੀ ਸਿਰਫ ਪਿਆਰ ਦੀ ਭਾਵਨਾ ਹੋਵੇਗੀ। ਮੀਲਾ ਦੇ ਮਾਤਾ-ਪਿਤਾ ਨੇ ਖੁਦ ਨੂੰ ਬੰਬ ਨਾਲ ਉਡਾਉਣ ਤੋਂ ਪਹਿਲਾਂ ਉਸ ਨੂੰ ਮੋਟਰ ਸਾਈਕਲ ਤੋਂ ਸੁੱਟ ਦਿੱਤਾ ਸੀ। ਉਹ ਆਤਮਘਾਤੀ ਹਮਲਾ ਕਰਨ ਵਾਲੇ ਪਰਿਵਾਰ ਵਿਚ ਜਿਉਂਦੀ ਬੱਚੀ ਇਕਲੌਤੀ ਕੁੜੀ ਹੈ। ਇੱਥੇ ਦੱਸ ਦਈਏ ਕਿ ਇੰਡੋਨੇਸ਼ੀਆ ਬੱਚਿਆਂ ਸਮੇਤ ਪਰਿਵਾਰ ਵੱਲੋਂ ਆਤਮਘਾਤੀ ਧਮਾਕਿਆਂ ਨਾਲ ਦਹਿਲਿਆ ਹੋਇਆ ਹੈ। 

ਯਤੀਮ ਅਤੇ ਕੱਟੜ ਬਣਾ ਦਿੱਤੀ ਗਈ ਮੀਲਾ ਦੇ ਭਵਿੱਖ ਨੂੰ ਲੈ ਕੇ ਚਿੰਤਾਵਾਂ ਪੈਦਾ ਹੋ ਗਈਆਂ ਸਨ ਪਰ ਪੁਨਰਵਾਸ ਦੀਆਂ ਕੋਸ਼ਿਸ਼ਾਂ ਨਾਲ ਮੀਲਾ ਅਤੇ ਉਸ ਵਰਗੇ ਹੋਰ ਬੱਚਿਆਂ ਨੂੰ ਸਧਾਰਨ ਜ਼ਿੰਦਗੀ ਜਿਉਣ ਦਾ ਮੌਕਾ ਦਿੱਤਾ ਗਿਆ ਹੈ। ਬੱਚੀ ਨੂੰ ਮੀਲਾ ਨਾਮ ਏ.ਐੱਫ.ਪੀ. ਨੇ ਦਿੱਤਾ ਹੈ। ਉਹ ਉਸ ਛੋਟੇ ਜਿਹੇ ਸਮੂਹ ਦੀ ਮੈਂਬਰ ਹੈ ਜਿਨ੍ਹਾਂ ਦਾ ਜਕਾਰਤਾ ਵਿਚ ਇਕ ਅਨੋਖੀ ਯੋਜਨਾ ਦੇ ਤਹਿਤ ਇਲਾਜ ਚੱਲ ਰਿਹਾ ਹੈ। ਉੱਥੇ ਉਸ ਦੀ ਮਨੋ ਵਿਗਿਆਨਕ ਅਤੇ ਸਮਾਜਿਕ ਦੇਖਭਾਲ ਕੀਤੀ ਜਾ ਰਹੀ ਹੈ। ਇਹ ਅੱਤਵਾਦੀ ਸਾਜਿਸ਼ਾਂ ਵਿਚ ਸ਼ਾਮਲ ਆਤਮਘਾਤੀ ਹਮਲਾਵਰਾਂ ਜਾਂ ਬੱਚਿਆਂ ਨੂੰ ਸਹੀ ਰਸਤੇ 'ਤੇ ਲਿਆਉਣ ਦੀ ਯੋਜਨਾ ਹੈ। 

ਦੁਨੀਆ ਦਾ ਸਭ ਤੋਂ ਵੱਡਾ ਮੁਸਲਿਮ ਬਹੁ ਗਿਣਤੀ ਦੇਸ਼ ਆਤਮਘਾਤੀ ਪਰਿਵਾਰਕ ਹਮਲਿਆਂ ਨਾਲ ਜੂਝ ਰਿਹਾ ਹੈ। ਦੇਸ਼ ਇਸ ਸਮੱਸਿਆ ਨਾਲ ਵੀ ਜੂਝ ਰਿਹਾ ਹੈ ਕਿ ਆਈ.ਐੱਸ.ਆਈ.ਐੱਸ. ਤੋਂ ਪਰਤੇ ਜਿਹਾਦੀਆਂ ਨੂੰ ਮੁੜ ਕਿਵੇਂ ਮੁੱਖਧਾਰਾ ਨਾਲ ਜੋੜਿਆ ਜਾਵੇ। ਪੁਨਰਵਾਸ ਕੇਂਦਰ ਦੀ ਪ੍ਰਮੁੱਖ ਨੇਨੇਂਗ ਹੇਯਾਰਨੀ ਨੇ ਕਿਹਾ,''ਬੱਚਿਆਂ ਨਾਲ ਨਜਿੱਠਣਾ ਆਸਾਨ ਨਹੀਂ ਰਿਹਾ ਕਿਉਂਕਿ ਉਹ ਅੱਤਵਾਦ ਵਿਚ ਵਿਸ਼ਵਾਸ ਰੱਖਦੇ ਹਨ ਅਤੇ ਮੰਨਦੇ ਹਨ ਕਿ ਧਮਾਕੇ ਕਰਨਾ ਚੰਗੀ ਚੀਜ਼ ਹੈ।'' ਉਨ੍ਹਾਂ ਨੇ ਦੱਸਿਆ,''ਬੱਚਿਆਂ ਨੂੰ ਸਿਖਾਇਆ ਗਿਆ ਹੈ ਕਿ ਜੰਨਤ ਜਾਣ ਲਈ ਜਿਹਾਦ ਜ਼ਰੂਰੀ ਹੈ ਅਤੇ ਉਨ੍ਹਾਂ ਨੂੰ ਅੱਤਵਾਦ ਵਿਚ ਭਰੋਸਾ ਨਾ ਰੱਖਣ ਵਾਲਿਆਂ ਨੂੰ ਮਾਰਨਾ ਹੋਵੇਗਾ। ਉਨ੍ਹਾਂ ਦੀ ਮਾਨਸਿਕਤਾ ਬਦਲਣੀ ਮੁਸ਼ਕਲ ਹੈ।''

ਸਮਾਜਿਕ ਕਾਰਕੁੰਨ ਅਤੇ ਮਨੋਵਿਗਿਆਨੀ ਕਾਊਂਸਲਿੰਗ ਜ਼ਰੀਏ ਉਨ੍ਹਾਂ ਨੂੰ ਮੁੜ ਮੁੱਖ ਧਾਰਾ ਵਿਚ ਸ਼ਾਮ ਲ ਕਰ ਰਹੇ ਹਨ। ਉਨ੍ਹਾਂ ਨੂੰ ਰੋਜ਼ਾਨਾ ਦੇ ਕੰਮਾਂ ਵਿਚ ਸ਼ਾਮਲ ਕੀਤਾ ਜਾ ਰਿਹਾ ਹੈ ਜਿਵੇਂ ਮਸਜਿਦ ਵਿਚ ਜਾਣਾ, ਖੇਡਣਾ ਆਦਿ। ਪਿਛਲੇ ਸਾਲ ਸੁਰਾਬਾਇਆ ਵਿਚ ਆਤਮਘਾਤੀ ਹਮਲਿਆਂ ਨਾਲ ਜੁੜੇ ਅੱਤਵਾਦੀ ਸ਼ੱਕੀਆਂ ਦੇ ਬੱਚਿਆਂ ਦਾ ਵੀ ਇੱਥੇ ਇਲਾਜ ਚੱਲ ਰਿਹਾ ਹੈ। ਸਮਾਜਿਕ ਕਾਰਕੁੰਨ ਮੁਸਫੀਆ ਹਾਂਡਯਾਨੀ ਨੇ ਕਿਹਾ,''ਅਸੀਂ ਹਾਲੇ ਵੀ ਉਨ੍ਹਾਂ ਨੂੰ ਪੜ੍ਹਾਉਂਦੇ ਹਾਂ ਕਿ ਕੁਰਾਨ ਹਰੇਕ ਚੀਜ਼ ਦੀ ਨੀਂਹ ਹੈ ਅਤੇ ਉਨ੍ਹਾਂ ਨੂੰ ਇਸ ਵਿਚ ਭਰੋਸਾ ਕਰਨਾ ਹੋਵੇਗਾ। ਜੇਕਰ ਤੁਸੀਂ ਦੂਜੇ ਲੋਕਾਂ ਦੇ ਅਧਿਕਾਰਾਂ ਦੀ ਉਲੰਘਣਾ ਕਰੋਗੇ ਤਾਂ ਇਹ ਠੀਕ ਨਹੀਂ।'' 

ਆਸਟ੍ਰੇਲੀਅਨ ਨੈਸ਼ਨਲ ਯੂਨੀਵਰਸਿਟੀ (ਏ.ਐੱਨ.ਯੂ.) ਦੇ ਅੱਤਵਾਦੀ ਪਰਿਵਾਰਾਂ ਦੀ ਮਾਹਰ ਹੌਲਾ ਨੂਰ ਨੇ ਕਿਹਾ,''ਸਾਨੂੰ ਇਨ੍ਹਾਂ ਬੱਚਿਆਂ ਨੂੰ ਪੀੜਤਾਂ ਦੇ ਨਾਲ-ਨਾਲ ਸੰਭਾਵਿਤ ਹਮਲਾਵਰਾਂ ਦੇ ਤੌਰ 'ਤੇ ਦੇਖਣਾ ਚਾਹੀਦਾ ਹੈ।''